MGA TAGA-ROMA 4 - Cebuano Form-Based Bible (2011)

Si Abraham Panig-ingnan

1Ug karon, unsa may atong ikasulti mahitungod kang Abraham, ang atong ginikanan sumala sa unod?

2Kay kon si Abraham nahimo pang matarong tungod sa iyang mga binuhatan, aduna unta siyay ikapasigarbo, apan dili sa atubangan sa Dios.

3Gen. 15:6; Gal. 3:6. Kay unsa may giingon sa kasulatan? “Si Abraham mituo sa Dios, ug kadto giisip alang kaniya ingon nga pagkamatarong.”

4Ngadto sa tawo nga nagbuhat, ang madawat niya dili maisip ingon nga gasa kondili suhol.

5Ug ngadto sa tawo nga wala magbuhat kondili nagtuo kaniya nga naghimong matarong sa dili diosnon, ang iyang pagtuo isipon nga pagkamatarong.

6Sa ingon niini usab, si David naghisgot sa pagkabulahan niadtong tawo nga gihimong matarong sa Dios nga walay kalabotan sa mga buhat:

7 Sal. 32:1-2. “Bulahan sila nga gipasaylo

sa ilang pagkamasinupakon sa Balaod

ug nga ang mga sala gitabonan;

8bulahan ang tawo nga

dili na isipon sa Ginoo ang iyang sala.”

9Kining maong kabulahanan, alang ba lamang sa mga tinuli o alang ba usab sa mga dili tinuli? Kita nag-ingon nga ang pagtuo giisip alang kang Abraham ingon nga pagkamatarong.

10Karon giunsa man kini pag-isip ngadto kaniya? Sa diha bang natuli na siya o sa wala pa? Dili sa natuli na siya, kondili sa wala pa siya matuli.

11Gen. 17:10. Gidawat niya ang pagtuli ingon nga usa ka ilhanan o silyo sa pagkamatarong nga iyang naangkon pinaagi sa pagtuo, bisan sa wala pa siya matuli. Kini aron mahimo siya nga amahan sa tanang magtutuo bisan ug dili tinuli ug aron maisip ngadto kanila ang pagkamatarong.

12Amahan usab siya sa mga tinuli, sa mga tawo nga dili lamang tinuli kondili nagsunod usab sa mga lakang sa pagtuo sa atong amahan nga si Abraham bisan sa dili pa siya tinuli.

Ang Saad sa Dios Madawat Pinaagi sa Pagtuo

13 Gen. 17:4-6, 22; Gal. 3:29. Ang saad ngadto kang Abraham ug sa iyang mga kaliwat, nga sila manununod sa kalibotan, wala moabot pinaagi sa Balaod kondili pinaagi sa pagkamatarong sa pagtuo.

14Gal. 3:18. Kay kon ang mga nagpailalom sa Balaod mao pa ang mga manununod, wala na diay bili ang pagtuo ug wala nay kapuslanan ang saad.

15Apan ang Balaod mobunga ug kapungot, apan kon walay Balaod, wala usay kalapasan.

16Gal. 3:7. Busa kini gipasikad sa pagtuo aron nga sumala sa grasya malig-on ang saad ngadto sa tanang kaliwat, dili lamang ngadto sa mga nagpailalom sa Balaod kondili ngadto usab sa mga nakig-ambit sa pagtuo ni Abraham kay siya mao man ang amahan natong tanan,

17Gen. 17:5. sumala sa nasulat, “Gihimo ko ikaw nga amahan sa daghang mga nasod,”—sa atubangan sa Dios nga gituohan ni Abraham, ang Dios nga naghatag ug kinabuhi sa mga patay ug nagpatungha sa mga butang nga kaniadto wala pa.

18Gen. 15:5. Kay siya milaom bisan ug wala nay paglaom, mituo nga siya mahimong amahan sa daghang mga nasod, sumala sa gisulti kaniya, “Sama niana kadaghan ang imong kaliwatan.”

19Gen. 17:17. Wala siya maluya sa iyang pagtuo bisan sa iyang pagpamalandong mahitungod sa iyang lawas, nga daw patay na kay siya mga usa ka gatos na ka tuig o sa iyang pagpamalandong mahitungod sa pagkadili na manganak ni Sara.

20Apan siya wala magduhaduha sa saad sa Dios, kondili nalig-on pinaagi sa pagtuo, samtang naghimaya siya sa Dios,

21masaligon sa hingpit nga ang Dios makatuman gayod sa iyang saad.

22Maoy hinungdan nga kini “giisip alang kaniya nga pagkamatarong.”

23Apan ang mga pulong, “giisip kaniya,” wala sulata alang kaniya lamang,

24kondili alang kanato usab. Kini isipon nganhi kanato nga nagtuo kaniya nga nagbanhaw kang Jesus nga atong Ginoo gikan sa mga patay,

25Isa. 53:4-5. nga gitugyan ngadto sa kamatayon tungod sa atong kalapasan ug gibanhaw alang sa paghimo kanato nga matarong.