LEVITICO 25 - Cebuano Form-Based Bible (2011)

Ang Tuig sa Pahulay

1 Ex. 23:10-11. Ang Ginoo miingon kang Moises didto sa Bukid sa Sinai,

2“Sultihi ang katawhan sa Israel: Sa inyong pagsulod sa yuta nga gihatag nako kaninyo, ang yuta maggahin ug usa ka pahulay alang sa Ginoo.

3Sa unom ka tuig magpugas kamo sa inyong yuta, ug sa unom ka tuig magpul-ong kamo sa inyong parasan ug magpupo sa mga bunga niini.

4Apan ang ikapito nga tuig usa ka tuig nga igpapahulay sa pahulay nga balaan alang sa yuta, usa ka pahulay alang sa Ginoo. Ayaw pugsi ang inyong yuta, ug ayaw pul-ongi ang inyong parasan.

5Kadtong moturok sa inyong yuta gikan sa kaugalingon niini ayaw ninyo aniha ug ang mga paras sa inyong parasan nga wala kapul-ongi ayaw ninyo pupoa. Kini tuig sa balaan nga pahulay alang sa yuta.

6Ang mga bunga sa tuig sa pagpahulay sa yuta mahimo nga pagkaon ninyo, alang kanimo ug sa imong mga ulipon nga lalaki ug babaye, ug sa imong mga sinuholan ug sa mga dumuduong nga magpuyo uban kanimo.

7Alang sa imong mga baka ug sa kahayopan nga anaa sa imong yuta, ang tanan nga bunga niini mahimong kaonon.

Ang Tuig sa Kalipay

8“Mag-ihap ikaw ug pito ka tuig sa pahulay alang kanimo, pito ka pito ka tuig, ug niana ang mga adlaw sa pito ka tuig sa pahulay mahimo kanimo nga 49 ka tuig.

9Unya patingoga ug kusog ang trumpeta sa ikanapulo nga adlaw sa ikapito nga bulan, sa Adlaw sa Pagtabon sa Sala, patingoga ninyo ang trumpeta ngadto sa tibuok ninyong yuta.

10Balaanon ninyo ang ika-50 nga tuig ug ipahibalo ninyo ang kagawasan ngadto sa tibuok nga yuta alang sa tanang mga nagpuyo niini. Kini mao ang pagkalipay alang kaninyo, ug mamalik kamo ang matag tawo ngadto sa iyang kaugalingong yuta ug ang matag usa mamalik sa iyang panimalay.

11Ang ika-50 nga tuig mao ang tuig sa kalipay alang kaninyo. Ayaw kamo pagpugas o pag-ani sa moturok sa iyang kaugalingon diha sa yuta, ayaw pamupo sa paras diha sa parasan nga wala kapul-ongi.

12Kay kini tuig sa kalipay, kini balaan alang kaninyo. Ang abot sa yuta maoy inyong kaonon.

13“Niining tuig sa kalipay, ang matag usa kaninyo mamauli sa iyang kaugalingong yuta.

14Kon magbaligya ikaw ug bisan unsa sa imong isigkatawo, o magpalit ikaw gikan sa imong isigkatawo, ayaw kamo paglimbong sa usa ug usa.

15Sumala sa gidaghanon sa mga tuig human sa tuig sa kalipay ikaw magpalit gikan sa imong isigkatawo, sumala sa gidaghanon sa mga tuig nga kini may abot ibaligya niya kini.

16Kon daghan ang mga tuig patas-an nimo ang bili niini ug kon diyotay na lang ang mga tuig paubsan nimo ang bili niini, kay ang gidaghanon sa mga abot maoy iyang gibaligya kanimo.

17Busa ayaw kamo paglimbong sa usa ug usa, apan kahadloki ninyo ang inyong Dios, kay ako mao ang Ginoo nga inyong Dios.

Ang Kalisod sa Ikapito nga tuig

18“Busa, buhata ninyo ang akong mga lagda ug tumana ninyo ang akong mga tulumanon ug buhaton ninyo kini ug magpuyo kamo sa yuta nga layo sa kakuyaw.

19Ang yuta maghatag sa iyang abot ug magkaon kamo hangtod sa pagkabusog ug magpuyo kamo niini nga layo sa kakuyaw.

20Kon moingon kamo, ‘Unsa may among kaonon sa ikapito nga tuig kon dili kami makapugas o mag-ani sa among mga abot?’

21Magpadala unya ako sa akong panalangin kaninyo sa ikaunom nga tuig, ug kini magpabunga alang sa tulo ka tuig.

22Sa dihang magpugas kamo sa ikawalo nga tuig, magkaon pa kamo sa daan nga abot hangtod sa ikasiyam nga tuig, hangtod nga moabot na ang iyang abot, magkaon pa kamo sa daan nga abot.

Ang Paglukat ug Pag-uli sa Kabtangan

23“Ang yuta dili ibaligya sa dayon kay ang yuta akoa, kay kamo mga langyaw ug mga dumuduong uban kanako.

24Ug sa tanan nga yuta nga inyong nahuptan, itugot ninyo nga malukat kini.

25Kon ang imong igsoon mahimong kabos ug magbaligya ug diyotay sa iyang kaugalingong yuta, moanha ang iyang labing suod nga kadugo, ug lukaton ang gibaligya sa iyang igsoon.

26Ug kon walay makalukat niini alang sa maong tawo apan unya mahimo siyang adunahan ug makakaplag siya ug igo nga ikalukat sa yuta,

27ihapon niya ang mga tuig sa pagkabaligya niini ug ulian niya ang kapin nga nabayad sa tawo nga iyang gibaligyaan ug mopauli siya ngadto sa iyang kaugalingong yuta.

28Apan kon siya dili makaabot aron ulian niya ang nakapalit, ang iyang gibaligya magpabilin sa kamot sa nakapalit niini hangtod sa tuig sa kalipay, ug sa tuig sa kalipay kini iuli kaniya ug siya mopauli ngadto sa iyang kaugalingong yuta.

29“Kon ang usa ka tawo magbaligya ug balay nga puluy-anan sulod sa lungsod nga pinaril, siya makahimo sa paglukat niini sulod sa tibuok nga tuig human kini ikabaligya, kay sa tibuok nga tuig may katungod siya sa paglukat niini.

30Kon kini dili malukat sulod sa usa ka tuig, ang balay nga anaa sa sulod sa lungsod nga pinaril mahimo na nga iyaha na gayod sa nakapalit niini hangtod sa iyang mga kaliwatan; kini dili mauli sa tuig sa kalipay.

31Apan ang mga balay didto sa mga balangay nga wala liboti ug paril, isipon nga sama sa mga uma gawas sa lungsod, kini mahimo nga lukaton, ug mauli sa tuig sa kalipay.

32Apan ang mga lungsod sa mga Levihanon, ang mga balay nga anaa sa mga lungsod nga ilang naangkon mahimong lukaton sa mga Levihanon sa bisan unsang panahon.

33Kon ang usa ka Levihanon dili molukat niini, ang gibaligya nga balay nga anaa sa lungsod nga iyang kaugalingon iuli sa panahon sa tuig sa kalipay, kay ang mga balay diha sa mga lungsod sa mga Levihanon kaugalingon man nila sa taliwala sa katawhan sa Israel.

34Apan ang mga yuta nga pasibsibanan libot sa ilang mga kalungsoran dili mahimong ibaligya kay kini mga butang nga ilang gipanag-iya sa dayon.

Mga Pagpahulam

35 Deut. 15:7-8. “Kon ang imong igsoon mahimong kabos ug dili na makabuhi sa iyang kaugalingon, tabangi siya. Magpuyo siya uban kanimo sama sa usa ka langyaw ug dumuduong.

36Ayaw pagdawat ug tubo gikan kaniya o bisan ganansiya, apan kahadloki ang imong Dios; aron ang imong igsoon magpuyo uban kanimo.

37Ex. 22:25; Deut. 23:19-20. Ayaw pagpahulam kaniya sa imong salapi nga may tubo o maghatag kaniya sa imong pagkaon aron makaganansiya.

38Ako mao ang Ginoo nga imong Dios nga nagkuha kaninyo gikan sa yuta sa Ehipto aron sa paghatag kaninyo sa yuta sa Canaan ug aron mahimo nga inyong Dios.

Pagpagawas sa mga Ulipon

39 Ex. 21:2-6; Deut. 15:12-18. Kon ang imong igsoon nga duol kanimo mahimong kabos ug ibaligya niya ang iyang kaugalingon kanimo, ayaw siya paalagara ingon nga ulipon,

40kondili ingon nga sinuholan nga sulugoon, ingon sa usa ka dumuduong. Magpuyo siya uban kanimo ug mag-alagad kanimo hangtod sa tuig sa kalipay.

41Unya siya mopahawa gikan kanimo, siya ug ang iyang mga anak uban kaniya ug mopauli siya sa iyang kaugalingong panimalay, ug sa kaugalingong yuta sa iyang amahan mopauli siya.

42Kay sila akong mga alagad nga akong gikuha gikan sa yuta sa Ehipto, sila dili ibaligya ingon nga mga ulipon.

43Ayaw pagmando kaniya uban ang kapintas, apan kahadloki ang imong Dios.

44Mahitungod sa imong mga ulipon nga lalaki ug babaye nga imong mabatonan, mahimo kamong mopalit ug ulipon nga babaye o lalaki gikan sa mga nasod nga naglibot kaninyo.

45Makapalit kamo gikan sa mga langyaw nga nagpuyo taliwala ninyo ug sa ilang mga kabanayan nga anaa uban kaninyo, nga nangatawo sa inyong yuta ug sila mahimo nga inyong kaugalingon.

46Mahimo ninyo silang ipasunod alang sa inyong mga anak ingon nga kabilin nga ilang mapanag-iya sa dayon, mahimo silang ulipon ninyo. Apan sa inyong mga igsoon, ang katawhan sa Israel, ayaw kamo pagmando uban ang kapintas.

47“Kon usa ka langyaw o dumuduong nga uban kanimo mahimong dato ug ang imong igsoon nga tapad kaniya mahimong kabos ug magbaligya sa iyang kaugalingon ngadto sa langyaw o sa dumuduong nga uban kanimo o sa sakop sa panimalay sa dumuduong,

48human siya mabaligya mahimo siya nga lukaton. Ang usa sa iyang mga igsoon makalukat kaniya

49o ang iyang uyoan o ang anak sa iyang uyoan makalukat kaniya, o ang duol nga sakop sa iyang kadugo makalukat kaniya, o kon siya mahimong adunahan, makalukat siya sa iyang kaugalingon.

50Siya makighusay uban sa nakapalit kaniya sukad sa tuig sa pagbaligya niya sa iyang kaugalingon hangtod sa tuig sa kalipay ug ang bili sa iyang paglukat mag-agad sa gidaghanon sa mga tuig, ang panahon nga uban siya sa iyang agalon iphon ingon sa sulugoon nga sinuholan.

51Kon daghan pa ang mga tuig, sumala niini ulian niya ang bili sa pagpalit kaniya nga maoy bili sa paglukat kaniya.

52Kon ang mahibilin pipila na lamang ka tuig hangtod sa tuig sa kalipay, makighusay siya uban kaniya ug iuli niya ang iyang salapi ingon nga lukat sumala sa iyang mga tuig sa pag-alagad.

53Ingon sa usa ka sulugoon nga sinuholan sa tinuig isipon siya uban kaniya. Siya dili magmando kaniya uban ang kapintas diha sa imong panan-aw.

54Apan kon siya dili lukaton nianang mga paagiha, sa tuig sa kalipay siya makagawas, siya ug ang iyang mga anak uban kaniya.

55Kay alang kanako ang katawhan sa Israel mga alagad, akong mga alagad nga akong gikuha gikan sa yuta sa Ehipto. Ako mao ang Ginoo nga inyong Dios.