2 TIMOTEO 4 - Cebuano Form-Based Bible (2011)

1Sa atubangan sa Dios ug ni Cristo Jesus nga mao ang maghukom sa mga buhi ug sa mga patay, ug pinaagi sa iyang pagpadayag ug sa iyang gingharian, ako magtugon kanimo niini:

2iwali ang pulong, pagmadasigon maayo man ang kahigayonan o dili; himoa ang pagpamadlong, ang pagpasidaan ug ang pagpangdasig diha sa tanang pagkamainantoson ug sa pagpanudlo.

3Kay moabot ang panahon nga ang mga tawo dili na molahutay sa maayong pagtulun-an, kondili sumala sa ilang kaugalingong mga pangibog, magpatigom sila ug mga magtutudlo nga maghapohap sa ilang nagkatol nga mga dalunggan,

4ug ang ilang mga dalunggan ilang ilingiw gikan sa kamatuoran ug iliso ngadto sa tinumotumo nga mga sugilanon.

5Apan ikaw, pagbantay sa tanang panahon, antosa ang mga kasakitan, buhata ang katungdanan sa usa ka magsasangyaw sa Maayong Balita, tumana ang imong buluhaton.

6Kay ako andam na nga ihalad ug ang panahon sa akong pagbiya miabot na.

7Nakigbisog na ako sa maayong pakigbisog, natapos ko na ang lumba, gituman nako ang pagtuo.

8Sukad karon adunay gitagana alang kanako nga purongpurong sa pagkamatarong nga niadto unyang adlawa iganti kanako sa Ginoo, ang matarong nga maghuhukom, ug dili lamang kanako ra kondili usab sa tanang mga nahigugma sa iyang pagpadayag.

Mga Tugon ni Pablo kang Timoteo

9Paningkamoti ang pag-ari dayon kanako.

10Col. 4:14; Filem. 24; 2 Cor. 8:23; Gal. 2:3; Tit. 1:4. Kay ako gibiyaan ni Demas tungod sa iyang gugma niining kalibotan karon, ug miadto sa Tesalonica. Si Cresente miadto sa Galacia, si Tito ngadto sa Dalmacia.

11Col. 4:14; Filem. 24; Buh. 12:12, 25; 13:13; 15:37-39; Col. 4:10; Filem. 24. Si Lucas na lamang ang ania uban kanako. Kuhaa si Marcos ug dad-a siya diri uban kanimo kay siya makatabang kanako alang sa buluhaton.

12Buh. 18:2; Efe. 6:21-22; Col. 4:7-8. Si Tiquico akong gipaadto sa Efeso.

13Sa imong pag-ari, dad-a ang kupo nga akong gibilin kang Carpo didto sa Troas, ug ang mga basahon ilabi na ang mga sinulat sa panit.Buh. 20:6.

141 Tim. 1:20; Sal. 62:12; Rom. 2:6. Si Alejandro, ang tigsalsal ug bronsi, nakahimo kanako ug dakong kadaot. Ang Ginoo maghatag unya kaniya sumala sa iyang mga binuhatan.

15Kinahanglan usab nga ikaw magbantay kaniya kay dako ang iyang pagsupak sa atong mga pulong.

16Sa akong unang pagpanalipod didto sa hukmanan, walay usa nga milaban kanako, ang tanan mibiya kanako. Dili unta kini paninglon batok kanila!

17Apan ang Ginoo mibarog tupad kanako ug gilig-on ako aron pinaagi kanako ang pagsangyaw hingpit nga matuman ug ang tanang mga Gentil makadungog niini. Ug ako giluwas gikan sa baba sa liyon.

18Ang Ginoo magpalingkawas kanako gikan sa tanang buhat nga daotan ug magluwas kanako alang sa iyang langitnong gingharian. Kaniya ang himaya hangtod sa kahangtoran. Amen.

Mga Pangumosta

19 Buh. 18:2; 2 Tim. 1:16-17. Ipangumosta ako kang Priscilla ug kang Aquila, ug sa panimalay ni Onesiforo.

20Buh. 19:22; Rom. 16:23; Buh. 20:4; 21:29. Si Erasto nagpabilin didto sa Corinto, apan si Trofimo akong gibilin nga masakiton didto sa Mileto.

21Ngari dayon sa dili pa ang tingtugnaw. Si Eubulo nangumosta kanimo ingon man sila si Pudente ug si Lino ug si Claudia ug ang tanang kaigsoonan.

22Ang Ginoo mag-uban sa imong espiritu. Ang grasya mag-uban kaninyo.