ESTER 8 - Cebuano Form-Based Bible (2011)

Giawhag ang mga Judio sa Pagsukol

1Niadtong adlawa gihatag ni Hari Ahasuero ngadto kang Rayna Ester ang balay ni Haman nga kaaway sa mga Judio. Ug si Mardoqueo miadto sa atubangan sa hari, kay si Ester misugilon kon unsa siya kaniya.

2Unya gikuha sa hari ang singsing nga iyang gikuha kang Haman ug gihatag kini kang Mardoqueo. Busa gipahimutang ni Ester si Mardoqueo sa balay ni Haman.

3Unya si Ester misulti pag-usab ngadto sa hari, siya miluhod sa iyang tiilan ug nangaliyupo kaniya uban sa luha aron sa pagpahunong sa kadaotan ni Haman nga Agaghanon ug sa laraw nga iyang gihunahuna batok sa mga Judio.

4Unya ang hari mitunol sa iyang bulawan nga setro kang Ester.

5Busa si Ester mitindog ug mibarog sa atubangan sa hari. Ug siya miingon, “Kon kini nakapahimuot sa hari ug kon ako nakakaplag ug kahimuot diha sa iyang panan-aw, ug kon ang maong butang daw matarong sa atubangan sa hari, ug ako nakapahimuot sa iyang mga mata, ipasulat ang usa ka mando sa pagbakwi sa mga sulat nga gimugna ni Haman nga Agaghanon nga anak ni Hamedata, nga iyang gisulat aron sa paglaglag sa mga Judio nga anaa sa tanang mga lalawigan sa hari.

6Kay unsaon nako pag-antos sa pagtan-aw sa katalagman nga mahitabo sa akong katawhan? O unsaon man nako pag-antos sa pagtan-aw sa kalaglagan sa akong mga kadugo?”

7Unya si Hari Ahasuero miingon kang Rayna Ester ug kang Mardoqueo nga Judio, “Tan-awa, gihatag nako kang Rayna Ester ang balay ni Haman ug gibitay nila si Haman sa bitayan, kay buot niyang patyon ang mga Judio.

8Ug mahimong magsulat kamo sumala sa makapahimuot kaninyo mahitungod sa mga Judio sa ngalan sa hari, ug silyohi kini sa singsing sa hari kay ang balaod nga nasulat sa ngalan sa hari ug gisilyohan sa singsing sa hari dili mabakwi.”

9Unya ang mga sekretaryo sa hari gipatawag niadtong panahona, sa ikatulong bulan nga mao ang bulan sa Sivan, sa ika-23 nga adlaw. Ug ang usa ka balaod gisulat sumala sa tanang gisugo ni Mardoqueo mahitungod sa mga Judio alang sa mga tinugyanan ug sa mga gobernador ug sa mga pangulo sa mga lalawigan gikan sa India ngadto sa Etiopia, 127 ka lalawigan, alang sa matag lalawigan sumala sa sinulatan niini, ug alang sa matag katawhan sumala sa ilang pinulongan, ug sa mga Judio sumala sa ilang sinulatan ug sa ilang pinulongan.

10Ang sinulat gihimo diha sa ngalan ni Hari Ahasuero, ug gisilyohan sa singsing sa hari, ug gipadala ang mga sulat pinaagi sa mga sinugo nga nagkabayo sa mga tulin nga mga kabayo nga gigamit sa pag-alagad sa hari gikan sa mga kabayo sa hari.

11Pinaagi niini ang hari mitugot sa mga Judio nga diha sa matag ka siyudad sa pagtigom ug pagpanalipod sa ilang kinabuhi, sa paglaglag, sa pagpatay, ug sa pagpuo sa bisan unsang kasundalohan sa bisan unsang katawhan o lalawigan nga mosulong kanila, uban sa ilang mga kabataan ug mga kababayen-an, ug sa pagkuha sa ilang mga kabtangan,

12sa usa ka adlaw sa tanang lalawigan ni Hari Ahasuero, sa ikanapulo ug tulo nga adlaw sa ikanapulo ug duha nga bulan nga mao ang bulan sa Adar.

13Usa ka kopya sa sinulat gimantala ingon nga balaod sa matag lalawigan ug gimantala ngadto sa tanang mga katawhan ug ang mga Judio mag-andam niadtong adlawa sa ilang pagpanimalos sa ilang mga kaaway.

14Busa ang mga sinugo nga nagkabayo sa tulin nila nga mga kabayo nga gigamit sa pag-alagad sa hari, midali pagsakay tungod sa sugo sa hari ug ang balaod gihatag didto sa Susa nga mao ang ulohang siyudad.

15Unya si Mardoqueo migula gikan sa atubangan sa hari diha sa harianong bisti nga asul ug puti, uban sa usa ka dakong korona nga bulawan ug usa ka kupo nga pinong lino ug mahalong panapton nga tapol samtang ang siyudad sa Susa nagsinggit ug naglipay.

16Ang mga Judio may kahayag ug kalipay ug kasadya ug kadungganan.

17Ug sa matag lalawigan ug sa matag siyudad, bisan diin ang sugo sa hari ug ang iyang balaod miabot, dihay kalipay ug kasadya sa mga Judio, usa ka kasaulogan ug usa ka maayong adlaw. Ug daghan sa mga katawhan sa yuta nahimong mga Judio kay ang kahadlok sa mga Judio diha kanila.