SALMO 56 - Cebuano Form-Based Bible (2011)

Pag-ampo sa Pagsalig Diha sa DiosNgadto sa pangulong musikero: sumala sa Salampati sa Layo nga Kakahoyan. Miktam ni David sa dihang nadakpan siya sa mga Filistihanon didto sa Gat.

1Kaluy-i ako, O Dios, kay ang mga tawo nagyatak kanako;

sa tibuok adlaw, ang akong mga kaaaway nagdaogdaog kanako;

2ang akong mga kaaway nagyatak kanako sa tibuok adlaw,

kay daghan sila nga mapahitas-ong

nakig-away kanako.

3Sa panahon nga mahadlok ako,

magsalig ako kanimo.

4Sa Dios nga ang pulong akong gidayeg,

diha sa Dios ako nagsalig nga walay kahadlok.

Unsay mabuhat sa unod ngari kanako?

5Sa tibuok adlaw gidaot nila ang akong mga pulong;

ang tanan nilang mga hunahuna batok kanako alang sa kadaotan.

6Naghugpong sila sa ilang kaugalingon, nagtago sila,

nagbantay sila sa akong mga lakang.

Samtang nag-atang sila alang sa akong kinabuhi,

7panimasli sila tungod sa ilang sala;

diha sa imong kasuko, pukana ang mga katawhan, O Dios!

8Nag-isip ikaw sa akong mga paglatagaw;

ibutang ang akong mga luha sa imong botilya!

Wala ba kini diha sa imong basahon?

9Unya pasibogon ang akong mga kaaway

sa adlaw nga ako mosangpit.

Kini akong maila, nga ang Dios dapig kanako.

10Diha sa Dios, nga ang pulong akong gidayeg,

diha sa Ginoo, nga ang pulong akong gidayeg,

11diha sa Dios nagsalig ako nga walay kahadlok.

Unsay mabuhat sa tawo kanako?

12Tumanon gayod nako ang akong mga panaad kanimo, O Dios;

ihalad nako kanimo ang mga halad sa pasalamat.

13Kay giluwas nimo ang akong kalag gikan sa kamatayon,

ang akong mga tiil gikan sa pagkahulog,

aron ako maglakaw sa atubangan sa Dios

diha sa kahayag sa kinabuhi.