SALMO 140 - Cebuano Form-Based Bible (2011)

Pag-ampo aron PanalipdanNgadto sa pangulong musikero. Salmo ni David.

1Luwasa ako, O Ginoo, gikan sa mga tawo nga daotan;

panalipdi ako gikan sa bangis nga mga tawo

2nga naglaraw ug mga buhat nga daotan diha sa ilang kasingkasing,

ug sa kanunay nag-aghat sa pagpakiggubat.

3

4Bantayi ako, O Ginoo, gikan sa mga kamot sa daotan;

panalipdi ako gikan sa bangis nga tawo

nga naglaraw sa pagpapandol sa akong mga tiil.

5Mga mapahitas-on nga mga tawo nagtago ug lit-ag alang kanako,

ug pinaagi sa mga pisi nagbukhad sila ug pukot,

sa daplin sa agianan nagbutang sila ug mga laang alang kanako. Selah

6Miingon ako sa Ginoo, “Ikaw mao ang akong Dios;

patalinghugi ang tingog sa akong mga pangaliyupo, O Ginoo!”

7O Ginoo, akong Ginoo, akong lig-on nga manluluwas,

ikaw nagtabon sa akong ulo sa adlaw sa gubat.

8Ayaw itugot, O Ginoo, ang mga tinguha sa daotan;

ayaw palamposa ang iyang daotang laraw! Selah

9Kadtong naglibot kanako naghangad sa ilang ulo;

malumos unta sila sa mga pagdaot sa ilang kaugalingong mga ngabil!

10Ipahulog sa ibabaw nila ang mga nagbaga nga uling!

Ipatambog sila ngadto sa mga gahong diin sila dili na makagula!

11Ayaw palamposa dinhi sa yuta ang mga tigbutangbutang;

ipahiagom dayon ang daotan ngadto sa bangis nga tawo!

12Nasayod ako nga ang Ginoo naglaban sa katungod sa mga sinakit,

ug nagpahamtang sa hustisya alang sa mga nangkinahanglan.

13Ang mga matarong magpasalamat gayod sa imong ngalan;

ang mga matarong mopuyo diha sa imong atubangan.