LEVITICO 12 - Cebuano Form-Based Bible (2011)

Ang Pagputli sa Babaye nga Bag-ong Nanganak

1Ang Ginoo miingon kang Moises,

2“Sultihi ang katawhan sa Israel: Kon ang babaye magsamkon ug manganak ug batang lalaki, mahugaw siya sulod sa pito ka adlaw, sama sa panahon sa iyang binulan nga pagdugo, mahugaw siya.

3Gen. 17:12; Luc. 2:21. Ug sa ikawalo nga adlaw tulion ang unod sa yamis sa bata.

4Unya ang inahan magpadayon sulod sa 33 ka adlaw sa pagpaputli tungod sa iyang dugo. Dili siya makahikap sa bisan unsang butang nga balaan o makaadto sa balaang dapit hangtod nga matuman ang mga adlaw sa pagputli kaniya.

5Apan kon manganak siya ug babaye, mahugaw siya sulod sa duha ka semana, sama sa iyang binulan nga pagdugo ug sulod sa 66 ka adlaw, ug siya magpadayon sa pagpaputli tungod sa iyang dugo.

6“Kon ang mga adlaw sa pagputli kaniya matuman na, tungod ba sa anak nga lalaki o tungod sa anak nga babaye, kinahanglang magdala siya ug usa ka nating karnero nga usa ka tuig ang kagulangon ingon nga halad nga sunogon, ug usa ka kuyabog sa salampati o usa ka tukmo ingon nga halad tungod sa sala. Dad-on kini ngadto sa pultahan sa tolda nga tagboanan ngadto sa pari.

7Ang pari maghalad niini sa atubangan sa Ginoo ug maghimo sa halad sa pagtabon sa sala alang kaniya ug mahinlo siya gikan sa pagpangagi sa iyang dugo. Kini mao ang balaod alang kaniya nga manganak ug lalaki o babaye.

8Luc. 2:24. Kon dili siya makaabot sa pagdala ug usa ka nating karnero, magdala siya ug duha ka tukmo o duha ka kuyabog sa salampati, ang usa alang sa halad nga sunogon ug ang usa sa halad tungod sa sala. Ug ang pari maghimo sa pagtabon sa sala alang kaniya ug mahinlo siya.”