SALMO 76 - Cebuano Form-Based Bible (2011)

Ang Dios MadaogonNgadto sa pangulong musikero: uban sa mga tulunggon nga may kuwerdas. Salmo ni Asaf. Usa ka Awit.

1Sa Juda giila ang Dios,

sa Israel bantogan ang iyang ngalan.

2Ang iyang balay anaa sa Salem,

ang iyang puluy-anan anaa sa Zion.

3Didto gipangbunggo niya ang mga nagpangidlap nga udyong,

ang taming, ang espada ug ang mga hinagiban sa gubat. Selah

4Mahimayaon ikaw, halangdon pa

kay sa kabukiran nga walay kataposan.

5Ang mga isog ug kasingkasing gipanguhaan sa ilang mga inilog;

sila nahinanok sa pagkatulog;

walay bisan usa sa mga manggugubat

nga nakagamit sa ilang mga kamot.

6Sa imong pagbadlong, O Dios ni Jacob,

ang nagkabayo ug ang kabayo nagbuy-od nga daw patay.

7Apan ikaw, ikaw makalilisang gayod!

Kinsay makabarog sa imong atubangan

sa diha nga ikaw masuko?

8Gikan sa kalangitan gisulti nimo ang hukom;

ang yuta nahadlok ug mihilom,

9sa diha nga ang Dios mitindog aron maghukom

sa pagluwas sa tanang dinaogdaog diha sa yuta. Selah

10Sa pagkatinuod gayod, ang kaligutgot sa tawo magdayeg kanimo;

ang nahibilin sa kaligutgut imong gipugngan.

11Pagsaad kamo sa Ginoo nga inyong Dios ug tumana kini;

padad-a ug mga gasa ang tanan nga naglibot kaniya,

ngadto kaniya nga takos kahadlokan,

12nga nagputol sa espiritu sa mga pangulo,

siya nga gikalisangan sa mga hari sa yuta.