LEVITICO 15 - Cebuano Form-Based Bible (2011)

Ang mga Lagda Mahitungod sa Tawo nga May Sakit nga Nag-agos

1Ang Ginoo miingon kang Moises ug kang Aaron,

2“Sultihi ninyo ang katawhan sa Israel: Si bisan kinsa nga lalaki nga adunay nag-agos sa iyang lawas, ang nag-agos kaniya hugaw.

3Kini mao ang balaod sa iyang pagkahugaw tungod sa nag-agos kaniya, nagpadayon man kini pag-agos sa iyang lawas o miundang ba hinuon, kini hugaw diha kaniya.

4Ang tanang higdaanan nga gihigdaan niadtong may nag-agos hugaw, ug ang tanang butang nga lingkoran niya mahugaw.

5Ug si bisan kinsa nga makahikap sa iyang higdaanan, kinahanglang manglaba sa iyang mga bisti ug maligo sa tubig ug hugaw siya hangtod sa pagkakilomkilom.

6Ang makalingkod sa gilingkoran niadtong may nag-agos, kinahanglang manglaba sa iyang mga bisti ug maligo ug hugaw siya hangtod sa pagkakilomkilom.

7Ang makahikap sa lawas niadtong may nag-agos kinahanglang manglaba sa iyang mga bisti ug maligo sa tubig, ug hugaw siya hangtod sa pagkakilomkilom.

8Ug kon kadtong may nag-agos makapangluwa sa tawong hinlo, ang nalud-an kinahanglang manglaba sa iyang mga bisti ug maligo sa tubig ug hugaw siya hangtod sa pagkakilomkilom.

9Ang tanan nga montura sa kabayo nga malingkoran niadtong may nag-agos mahugaw.

10Ug bisan kinsa nga makahikap sa bisan unsang butang nga didto sa ilalom niya, hugaw siya hangtod sa pagkakilomkilom, ug ang makadala niining mga butanga kinahanglang manglaba sa iyang mga bisti ug maligo siya sa tubig, ug hugaw siya hangtod sa pagkakilomkilom.

11Ang tanan nga mahikapan niadtong may nag-agos nga wala manghunaw sa iyang kamot sa tubig, kinahanglang manglaba sa iyang mga bisti ug maligo siya sa tubig, ug hugaw siya hangtod sa pagkakilomkilom.

12Ang sudlanan nga yuta nga mahikapan niadtong may nag-agos buk-on ug ang tanan nga sudlanan nga kahoy hugasan ug tubig.

13“Kon kadtong may nag-agos nahinlo na gikan sa iyang pag-agos, mag-ihap siya ug pito ka adlaw alang sa paghinlo kaniya ug labhan niya ang iyang mga bisti ug hugasan niya ang iyang lawas sa tubig nga nag-agas ug mahinlo siya.

14Sa ikawalo nga adlaw magkuha siya ug duha ka tukmo o duha ka kuyabog sa salampati ug moadto siya sa atubangan sa Ginoo sa pultahan sa tolda nga tagboanan ug kini ihatag niya sa pari.

15Ang pari maghalad niini, ang usa ingon nga halad tungod sa sala ug ang usa ingon nga halad nga sunogon. Ug ang pari maghimo sa pagtabon sa sala alang kaniya sa atubangan sa Ginoo tungod sa iyang pag-agos.

Mga Balaod Mahitungod sa Lalaki nga Gigawasan ug Binhi

16“Kon ang usa ka lalaki nagawasan sa iyang binhi, kinahanglang hugasan niya ug tubig ang tibuok niyang lawas ug hugaw siya hangtod sa pagkakilomkilom.

17Ang tanan nga bisti o ang tanang galamiton nga panit nga matuloan ug binhi kinahanglang hugasan niya ug tubig, ug hugaw kini hangtod sa pagkakilomkilom.

18Ang babaye usab nga gipakighilawasan sa lalaki ug naagasan sa binhi, silang duha kinahanglang mangaligo sa tubig ug hugaw sila hangtod sa pagkakilomkilom.

Mga Balaod Mahitungod sa Binulan nga Pagdugo sa mga Babaye

19“Kon ang babaye abotan sa iyang binulan nga pagdugo, hugaw siya sulod sa pito ka adlaw, ug si bisan kinsa nga makahikap kaniya hugaw hangtod sa pagkakilomkilom.

20Ang tanan nga iyang higdaan sa panahon sa iyang pagkahugaw mahugaw, ang tanan usab nga lingkoran niya mahugaw.

21Ug si bisan kinsa nga makahikap sa higdaanan sa babaye kinahanglang manglaba sa iyang mga bisti ug maligo sa tubig ug hugaw siya hangtod sa pagkakilomkilom.

22Si bisan kinsa nga makahikap sa bisan unsa nga iyang gilingkoran kinahanglang manglaba sa iyang mga bisti ug maligo siya sa tubig ug hugaw siya hangtod sa pagkakilomkilom.

23Kon ang iyang higdaanan o bisan unsa nga iyang lingkoran mahikapan, ang makahikap niini hugaw hangtod sa pagkakilomkilom.

24Kon adunay lalaki nga makighilawas kaniya, ug ang iyang pagkahugaw maanaa sa lalaki, ang maong lalaki hugaw sulod sa pito ka adlaw ug ang tanang higdaanan nga higdaan sa maong lalaki mahugaw.

25“Kon ang babaye magdugo sulod sa daghang mga adlaw nga dili sa panahon sa iyang pagkahugaw o kon magpadayon siya pagdugo saylo sa panahon niini, sa tanang mga adlaw sa iyang pagdugo magpadayon ang iyang pagkahugaw; mahugaw siya sama sa iyang binulan nga pagdugo.

26Ang tanang higdaanan nga gihigdaan niya sa tibuok nga panahon sa iyang pagdugo, mahisama sa higdaanan niya sa panahon sa iyang pagkahugaw, ug ang tanan nga lingkoran niya mahugaw sama sa panahon sa iyang binulan nga pagdugo.

27Si bisan kinsa nga makahikap nianang mga butanga mahugaw, ug kinahanglang manglaba sa iyang mga bisti ug maligo siya sa tubig ug hugaw siya hangtod sa pagkakilomkilom.

28Apan sa dihang moundang na ang iyang pagdugo, mag-ihap siya ug pito ka adlaw ug human niana mahinlo siya.

29Sa ikawalo nga adlaw magkuha siya ug duha ka tukmo o duha ka kuyabog sa salampati ug dad-on niya kini ngadto sa pari didto sa pultahan sa tolda nga tagboanan.

30Ang pari maghalad sa usa ka langgam ingon nga halad tungod sa sala ug ang usa ingon nga halad nga sunogon, ug ang pari maghimo sa pagtabon sa sala alang kaniya sa atubangan sa Ginoo tungod sa pagkahugaw sa iyang pagdugo.

31“Sa ingon niana lainon nimo ang katawhan sa Israel gikan sa ilang pagkahugaw aron sila dili mangamatay sa ilang pagkahugaw sa diha nga ilang hugawan ang akong puluy-anan nga anaa sa taliwala nila.”

32Kini mao ang balaod alang niadtong may nag-agos ug alang niadtong gigawasan sa binhi nga tungod niana nahugaw siya,

33ug alang usab sa babaye nga anaa sa iyang kahugaw tungod sa iyang pagdugo, ug mahitungod sa adunay nag-agos, lalaki man o babaye, ug sa lalaki nga makighilawas sa babaye nga anaa sa kahugaw.