ISAIAS 28 - Cebuano Form-Based Bible (2011)

Pasidaan Alang sa Amihanang Gingharian

1Alaot kadtong purongpurong sa garbo

sa mga palahubog sa Efraim,

ug sa nagkalawos nga bulak sa iyang

mahimayaong kaanyag,

nga anaa sa ulo sa tabunok nga walog

niadtong nangapukan tungod sa bino!

2Tan-awa, ang Ginoo adunay usa nga gamhanan ug kusgan;

sama sa usa ka bagyo nga yelo, usa ka makalaglag nga bagyo,

sama sa usa ka unos nga kusog, nag-awas nga katubigan,

ibusdak niya kini ngadto sa yuta diha sa kabangis.

3Ang purongpurong sa garbo sa mga palahubog sa Efraim

yatakan sa tiil;

4ug ang nagkalawos nga bulak sa iyang mahimayaong kaanyag,

nga anaa sa ibabaw sa ulo sa tabunok nga walog,

mahimong sama sa unang hinog nga igos sa dili pa ang ting-init;

sa diha nga ang tawo makakita niini, iya kining kaonon dayon

sa dihang anaa na kini sa iyang kamot.

5Nianang adlawa ang Ginoo sa mga panon mahimong usa ka purongpurong sa himaya,

ug usa ka purongpurong sa kaanyag, ngadto sa salin sa iyang katawhan;

6ug usa ka espiritu sa hustisya ngadto kaniya nga naglingkod sa hukmanan,

ug kusog ngadto kanila nga nagpasibog sa gubat diha sa ganghaan.

Si Isaias ug ang Hubog nga mga Propeta sa Juda

7Kini usab sila nagsamparay tungod sa bino

ug nagsusapinday tungod sa isog nga ilimnon;

ang pari ug ang propeta nagsamparay tungod sa isog nga ilimnon,

sila nangalibog tungod sa bino,

sila nagsusapinday tungod sa isog nga ilimnon;

sila nangasayop diha sa panan-aw,

sila nangapandol diha sa paghukom.

8Kay ang tanan nga mga lamisa napuno sa sinuka,

wala nay dapit nga walay hugaw.

9“Kinsa man ang iyang tudloan ug kaalam,

kinsa man ang iyang pasabton sa mensahe?

Sila ba nga mga gilutas

ug gikuha gikan sa dughan?

10Kay kini mao ang sugo ibabaw sa sugo, sugo ibabaw sa sugo;

lagda ibabaw sa lagda, lagda ibabaw sa lagda,

diyotay dinhi, diyotay didto.”

11Hinuon pinaagi sa langyaw nga mga ngabil ug pinaagi sa laing dila

ang Ginoo mosulti niining maong katawhan,

12nga kanila miingon siya,

“Kini mao ang pahulay;

hatagi ninyo ug pahulay siya nga gikapoyan;

ug kini mao ang pahulay,”

apan dili sila mamati.

13Busa ang pulong sa Ginoo alang kanila mao

ang sugo ibabaw sa sugo, sugo ibabaw sa sugo;

lagda ibabaw sa lagda, lagda ibabaw sa lagda,

diyotay dinhi, diyutay didto;

aron sila mangadto, ug mangahayang,

ug mangabali, ug malaang ug madakpan.

Usa ka Batong Patukoranan Alang sa Zion

14Busa pamatia ninyo ang pulong sa Ginoo, kamo nga mga mabiaybiayon,

nga nagmando niining katawhan diha sa Jerusalem!

15Tungod kay kamo nag-ingon, “Kami naghimo ug usa ka kasabotan uban sa kamatayon,

ug uban sa Sheol kami may gikauyonan;

sa diha nga moagi na ang naghaguros nga bunal,

kini dili modangat kanamo;

kay ang kabakakan gihimo namong dalangpanan,

ug diha sa kabakakan kami magpasalipod sa among kaugalingon”;

16busa mao kini ang giingon sa Ginoong Dios,

“Tan-awa, gibutang nako didto sa Zion alang sa usa ka patukoranan

ang usa ka bato, usa ka sinulayan nga bato,

usa ka bililhon nga bato nga patukoranan, sa patukoranan nga lig-on,

‘Siya nga motuo dili magdali.’

17Ug ang hustisya himoon nako nga latid,

ug ang pagkamatarong mao ang tunton;

ug ang unos nga yelo molaglag sa dalangpanan sa kabakakan,

ug ang katubigan mosanap sa dapit nga tagoanan.”

18Unya ang inyong kasabotan uban sa kamatayon papason,

ug ang inyong gikauyonan uban sa Sheol dili molungtad,

sa diha nga ang naghaguros nga bunal moagi na,

kamo hampakon niini.

19Sa makadaghan nga kini moagi, kini mokuha kaninyo;

kay sa matag buntag kini moagi,

sa adlaw ug sa gabii;

ug makalilisang gayod ang pagsabot sa mensahe niini.

20Kay ang higdaanan mubo ra kaayo nga katuy-oran sa iyang kaugalingon,

ug ang habol gamay ra kaayo nga ihabol sa iyang kaugalingon.

21Kay ang Ginoo motindog sama sa iyang gihimo didto sa Bukid sa Perasim,

siya masuko sama sa iyang gihimo didto sa walog sa Gibeon;

sa paghimo sa iyang buhat—katingalahan ang iyang buhat!

ug sa pagbuhat sa iyang buluhaton— katingalahan ang iyang buluhaton!

22Busa karon ayaw pagbiaybiay,

kay tingali unya ug ang inyong mga bugkos himoon nga lig-on;

kay ako nakadungog ug usa ka sugo sa kalaglagan

gikan sa Ginoong Dios sa mga panon, ibabaw sa tibuok nga yuta.

Ang Kaalam sa Dios

23Patalinghogi ug pamatia ang akong tingog;

patalinghogi ug pamatia ang akong pakigpulong.

24Siya nga nagdaro aron makapugas nagdaro ba kanunay?

Kanunay ba siyang nagbungkag ug nagkaras sa iyang yuta?

25Sa diha nga mapatag na niya ang ibabaw niini,

dili ba niya isabuwak ang mga anis, ug isabwag ang kumino,

ug ipugas ang trigo sa tinudling,

ug ang sebada sa angay nga dapit,

ug ang ihalas nga trigo ingon nga utlanan?

26Kay siya gitudloan sa matarong;

ang iyang Dios nagtudlo kaniya.

27Kay ang anis dili giokon pinaagi sa galamiton sa paggiok,

ang anis dili paligsan sa ligid sa karomata;

apan ang anis dukdokon pinaagi ug bunal,

ug ang kumino lubkon pinaagi ug alho.

28Ang trigo galingon alang sa pan,

apan ang usa ka tawo dili maggiok niini hangtod sa kahangtoran,

bisan ug ang karomata ug ang kabayo

paagion ibabaw niini, dili siya makapulpog niini.

29Kini usab naggikan sa Ginoo sa mga panon;

siya kahibulongan diha sa pagtambag,

ug halangdon diha sa kaalam.