LEVITICO 18 - Cebuano Form-Based Bible (2011)

Mga Gidili nga Paagi sa Pakighilawas

1Ang Ginoo miingon kang Moises,

2“Sultihi ang katawhan sa Israel nga ako ang Ginoo nga inyong Dios.

3Ayaw kamo pagbuhat sama sa gibuhat nila didto sa yuta sa Ehipto diin kamo mipuyo ug ayaw kamo pagbuhat sama sa gibuhat nila didto sa yuta sa Canaan nga didto ako magdala kaninyo. Ayaw usab kamo pagsunod sa ilang mga lagda.

4Buhata ninyo ang akong mga tulumanon ug tumana ang akong mga lagda ug subaya ninyo kini. Ako mao ang Ginoo nga inyong Dios.

5

6“Walay si bisan kinsa kaninyo nga moduol kang bisan kinsa nga suod nga kadugo aron sa pagbukas sa iyang pagkahubo. Ako mao ang Ginoo.

7Ayaw buksi ang pagkahubo sa imong amahan nga mao ang pagkahubo sa imong inahan. Imo siyang inahan, ayaw buksi ang iyang pagkahubo.

8Lev. 20:11; Deut. 22:30; 27:20. Ayaw buksi ang pagkahubo sa asawa sa imong amahan kay siya iya man sa imong amahan.

9Lev. 20:17; Deut. 27:22. Ayaw buksi ang pagkahubo sa imong igsoon nga babaye, ang anak nga babaye sa imong amahan o ang anak nga babaye sa imong inahan, nga natawo sa balay o natawo sa gawas kay sila imo man nga mga igsoon.

10Ayaw buksi ang pagkahubo sa anak nga babaye sa imong anak nga lalaki, o sa anak nga babaye sa imong anak nga babaye, kay ang ilang pagkahubo imo man nga kahubo.

11Ayaw buksi ang pagkahubo sa anak nga babaye sa asawa sa imong amahan nga anak sa imong amahan, siya imong igsoon nga babaye.

12Lev. 20:19-20. Ayaw buksi ang pagkahubo sa igsoon nga babaye sa imong amahan, siya suod nga kadugo sa imong amahan.

13Ayaw buksi ang pagkahubo sa igsoon nga babaye sa imong inahan, siya suod nga kadugo sa imong inahan.

14Ayaw buksi ang pagkahubo sa igsoon nga lalaki sa imong amahan, sa ato pa, ayaw pagduol sa iyang asawa, siya imong iyaan.

15Lev. 20:12. Ayaw buksi ang pagkahubo sa imong umagad nga babaye, siya asawa sa imong anak nga lalaki, ayaw buksi ang iyang pagkahubo.

16Lev. 20:21. Ayaw buksi ang pagkahubo sa asawa sa imong igsoon nga lalaki, siya ang pagkahubo sa imong igsoon nga lalaki.

17Lev. 20:14; Deut. 27:23. Ayaw buksi ang pagkahubo sa usa ka babaye ug sa iyang anak nga babaye, o bisan sa anak nga babaye sa iyang anak nga lalaki o sa anak nga babaye sa iyang anak nga babaye, sila mga suod nga kadugo, kini daotan gayod.

18Ayaw pangasawa sa babaye ingon nga kaagaw sa iyang igsoon nga babaye aron sa pagbukas sa iyang pagkahubo samtang buhi pa ang iyang igsoon.

19 Lev. 20:18. “Ayaw pagduol sa usa ka babaye aron sa pagbukas sa iyang pagkahubo samtang anaa pa siya sa iyang binulan nga pagkahugaw.

20Lev. 20:10. Ayaw pagdulog sa pagpakighilawas sa asawa sa imong isigkatawo ug sa paghugaw sa imong kaugalingon uban kaniya.

21Lev. 20:1-5. Ayaw ihatag ang bisan usa sa imong mga anak aron ihalad sila pinaagi sa kalayo ngadto kang Molec ug sa ingon gipasipalahan nimo ang ngalan sa imong Dios. Ako mao ang Ginoo.

22Lev. 20:13. Ayaw pakighilawas sa isigkalalaki sama nga uban sa usa ka babaye, kini dulumtanan.

23Ex. 22:19; Lev. 20:15-16; Deut. 27:21. Ayaw pakighilawas sa bisan unsa nga mananap ug maghugaw sa imong kaugalingon pinaagi niini, ug walay si bisan kinsa nga babaye maghatag sa iyang kaugalingon ngadto sa mananap aron sa pagpakighilawas niini. Kini hilabihan ka daotan.

24“Ayaw ninyo hugawi ang inyong kaugalingon pinaagi sa bisan unsa niini, kay niining tanan ang mga nasod nga akong gihinginlan gikan sa inyong atubangan naghugaw sa ilang kaugalingon.

25Ang yuta nahugawan busa ako nagsilot sa kalapasan niini, ug ang yuta misuka sa mga nagpuyo niini.

26Apan tumana gayod ninyo ang akong mga lagda ug ang akong mga tulumanon ug ayaw kamo pagbuhat ug bisan unsa niining tanan nga mga dulumtanan, lumad man o dumuduong nga nagpuyo uban kaninyo,

27kay tungod niining maong mga dulumtanan nga gibuhat sa mga tawo sa yuta nga una kaninyo, ang yuta nahugawan,

28kay tingali unya ug ang yuta magsuka kaninyo sa dihang mahugawan ninyo kini sama nga gisuka niini ang nasod nga nahiuna kaninyo.

29Kay si bisan kinsa nga magbuhat sa bisan unsa niining tanan nga mga dulumtanan, ang mga tawo nga magbuhat niini ipahimulag gikan sa taliwala sa ilang katawhan.

30Busa timan-i gayod ang akong pahimangno nga dili kamo magbuhat sa bisan unsa niining batasana nga dulumtanan nga gibuhat sa mga nahiuna kaninyo, ug ayaw ninyo hugawi ang inyong kaugalingon niining mga butanga. Ako mao ang Ginoo nga inyong Dios.”