SALMO 52 - Cebuano Form-Based Bible (2011)

Ang Hukom ug Grasya sa DiosNgadto sa pangulong musikero. Usa ka Maskil ni David, sa dihang si Doeg nga Edomhanon miadto ug misulti kang Saul, “Si David miadto sa balay ni Ahimelek.”

1Ngano nga nagpagarbo ikaw, O gamhanang tawo,

sa kadaotan nga gihimo batok sa mga diosnon?

Sa tibuok nga adlaw

2ikaw naglaraw ug daotan.

Ang imong dila sama sa hait nga labaha,

ikaw nga nagbuhat nga malimbongon.

3Gihigugma nimo ang daotan labaw sa maayo,

ug ang pagbakak labaw sa pagsulti sa kamatuoran. Selah

4Gihigugma nimo ang tanang mga pulong nga makadaot,

O dila nga malimbongon.

5Apan ang Dios maglaglag usab kanimo sa dayon;

puniton ikaw niya ug sakmiton gikan sa imong tolda;

ibton niya ikaw gikan sa yuta sa mga buhi. Selah

6Ang matarong makakita ug mahadlok,

ug mokatawa kaniya, nga mag-ingon,

7“Tan-awa ang tawo nga wala maghimo sa Dios

ingon nga iyang dalangpanan,

kondili misalig sa kadaghan sa iyang mga bahandi,

ug nangita ug kadangpan diha iyang bahandi!”

8Apan ako sama sa lunhaw nga kahoyng olibo

diha sa balay sa Dios.

Nagsalig ako sa gugmang walay paglubad sa Dios

hangtod sa kahangtoran.

9Magpasalamat ako kanimo hangtod sa kahangtoran,

tungod kay gibuhat nimo kini.

Ako magsangyaw sa imong ngalan kay kini maayo sa

atubangan sa imong mga balaan.