SALMO 103 - Cebuano Form-Based Bible (2011)

Ang Gugma sa DiosSalmo ni David.

1Dayega ang Ginoo, O akong kalag;

ug ang tanan nga ania sa sulod nako,

dayega ang balaan niyang ngalan!

2Dayega ang Ginoo, O akong kalag,

ug ayaw kalimti ang tanan

niyang kaayohan,

3siya nga nagpasaylo sa tanan nimong kasal-anan,

nga nag-ayo sa tanan nimong mga balatian,

4nga naglukat sa imong kinabuhi gikan sa Gahong,

nga nagpurongpurong kanimo sa gugmang walay paglubad ug sa kaluoy,

5nga nagtagbaw kanimo sa maayong mga butang sa imong kinabuhi,

aron ang imong pagkabatan-on mabag-o sama sa agila.

6Ang Ginoo nagbuhat diha sa pagkamatarong

ug sa hustisya alang sa tanang gidaogdaog.

7Gipahibalo niya ang iyang mga dalan ngadto kang Moises,

ang iyang mga binuhatan ngadto sa katawhan sa Israel.

8 San. 5:11. Ang Ginoo maluluy-on ug puno sa grasya,

hinay sa pagkasuko ug madagayaon sa gugmang walay paglubad.

9Dili siya magbadlong kanunay o magtipig sa iyang kasuko

hangtod sa kahangtoran.

10Dili siya magbuhat sumala sa atong mga kasal-anan,

o magbalos kanato sumala sa atong mga kalapasan.

11Kay ingon nga ang kalangitan anaa sa taas ibabaw sa yuta,

mao usab kadako ang iyang gugmang walay paglubad ngadto kanila nga may kahadlok kaniya;

12sama sa gilay-on sa silangan gikan sa kasadpan,

mao usab ang gilay-on sa iyang pagpahimulag kanato gikan sa atong mga kalapasan.

13Sama sa usa ka amahan nga naluoy sa iyang mga anak,

mao usab ang Ginoo nga maluoy niadtong may kahadlok kaniya.

14Kay siya nahibalo sa atong kahimtang;

nahinumdom siya nga kita mga abog lamang.

15Mahitungod sa tawo, ang iyang mga adlaw sama sa balili,

siya naglambo sama sa bulak sa kapatagan;

16kay ang hangin moagi ibabaw niini ug kini mahanaw

ug ang dapit nga gitugkan niini dili na makaila.

17Apan ang gugmang walay paglubad sa Ginoo naggikan sa walay sinugdan hangtod sa walay kataposan

ngadto kanila nga may kahadlok kaniya,

ug ang iyang pagkamatarong ngadto sa mga anak sa mga anak;

18ngadto kanila nga nagtuman sa iyang kasabotan

ug nahinumdom sa pagbuhat sa iyang kasugoan.

19Gipahimutang sa Ginoo ang iyang trono didto sa kalangitan,

ug ang iyang gingharian naggahom ibabaw sa tanan.

20Dayega ang Ginoo, kamo nga iyang mga anghel,

kamo nga mga gamhanan nga nagtuman sa iyang pulong,

nga nagpatalinghog sa tingog sa iyang pulong!

21Dayega ang Ginoo, kamong tanan niyang mga panon,

kamong mga alagad niya, nga nagbuhat sa iyang kabubut-on!

22Dayega ang Ginoo, kamong tanan niyang binuhat,

diha sa tanang dapit sa iyang gingharian.

Dayega ang Ginoo, O akong kalag!