NUMEROS 4 - Cebuano Form-Based Bible (2011)

Mga Katungdanan sa mga Kohatihanon

1Ang Ginoo miingon kang Moises ug kang Aaron,

2“Ipha ang mga anak nga lalaki ni Kohat gikan sa mga kaliwat ni Levi, sumala sa ilang mga panimalay, sumala sa mga banay sa ilang katigulangan,

3sukad sa nagpanuigon ug 30 ka tuig ug pataas hangtod sa nagpanuigon ug 50 ka tuig, ang tanan nga makahimo sa pag-alagad, sa pagbuhat sa mga buluhaton diha sa tolda nga tagboanan.

4Kini mao ang katungdanan sa mga kaliwat ni Kohat diha sa tolda nga tagboanan: ang mga butang nga labing balaan.

5Sa diha nga mogikan na ang mga nagkampo, si Aaron ug ang iyang mga anak nga lalaki mosulod ug manangtang sa tabil sa salimbong ug kini itabon nila sa sudlanan sa pagpamatuod.

6Ug itabon nila sa ibabaw niini ang tabon nga panit sa kanding, ug sapawan kini ug panapton nga asul ug itaod nila ang mga yayongan niini.

7Unya ang ibabaw sa lamisa sa pan sa atubangan sa Dios bukharan nila ug panapton nga asul, ug ibutang nila sa ibabaw niini ang mga plato, ug ang mga sudlanan sa insenso ug ang mga panaksan ug ang mga kupa alang sa halad nga ilimnon ug ang pan nga kanunayng anaa sa ibabaw niini.

8Unya tabonan nila ang ibabaw niini ug panapton nga pula, ug tabonan pa gayod nila kini sa tabon nga panit sa kanding ug itaod nila niini ang mga yayongan.

9Ug magkuha sila ug panapton nga asul ug puston ang lamparahan alang sa suga, ang mga lampara niini, ang mga igpapalong niini, ang mga sudlanan sa agiw, ang tanang mga sudlanan sa lana ug ang tanang gigamit nila sa ilang pag-alagad.

10Ug ibutang nila kini uban ang tanang mga kahimanan niini sulod sa usa ka putos nga panit sa kanding ug ipahimutang kini sa ibabaw sa mga sanggaan.

11Ug sa ibabaw sa halaran nga bulawan, ibukhad nila ang panapton nga asul ug sapawan nila kini sa tabon nga panit sa kanding ug itaod nila ang mga yayongan niini.

12Unya kuhaon nila ang tanang mga galamiton sa pag-alagad nga gigamit nila sa balaang dapit, ug puston kini sa usa ka panapton nga asul ug puston nila sa usa ka tabon nga panit sa kanding ug ipahimutang kini sa ibabaw sa mga sanggaan.

13Unya kuhaan nila ug abo ang halaran ug ibuklad nila sa ibabaw niini ang usa ka panapton nga tapol.

14Unya ibutang nila sa ibabaw niini ang tanang mga kahimanan sa halaran nga gigamit sa pag-alagad diha niini, ang mga sanggaan sa baga, ang mga tinidor ug ang mga pala ug ang mga planggana, ang tanang mga galamiton sa halaran ug tabonan nila kini sa usa ka tabon nga panit sa kanding ug itaod ang mga yayongan niini.

15Ug sa dihang mahuman na ni Aaron ug sa iyang mga anak ang pagtabon sa balaang dapit ug sa tanang mga kasangkapan sa balaang dapit, sa diha nga mobiya na ang mga nagkampo, human niini, ang mga lalaki nga kaliwat ni Kohat moadto aron sa pagpas-an niini apan kinahanglang dili sila mohikap sa balaang mga butang aron sila dili mamatay. Mao kini ang mga butang sa Tolda nga Tagboanan nga dad-onon sa mga kaliwat ni Kohat.

16“Ug ang katungdanan ni Eleasar nga anak ni Aaron nga pari mao ang pag-atiman sa lana alang sa suga, sa humot nga insenso, sa mapadayonon nga halad nga pagkaon ug ang pag-atiman sa lana nga igdidihog ug ang pagdumala sa tibuok nga Tolda ug sa tanan nga anaa niini, ang balaang dapit ug ang mga galamiton niini.”

17Ug ang Ginoo miingon kang Moises ug kang Aaron,

18“Ayaw ninyo ipalaglag ang banay sa mga panimalay sa mga Kohatihanon gikan sa taliwala sa mga Levihanon.

19Apan kini buhaton ninyo aron sila mabuhi ug dili mamatay, sa diha nga sila moduol sa mga butang nga labing balaan. Si Aaron ug ang iyang mga anak mangadto ug magtudlo kanila sa matag usa sa iyang katungdanan ug sa iyang dad-onon.

20Apan dili sila mosulod sa pagtan-aw sa mga balaang butang, bisan sa daklit lamang aron sila dili mamatay.”

Ang Katungdanan sa mga Gersonhanon

21Unya ang Ginoo miingon kang Moises,

22“Ipha usab ang gidaghanon sa mga lalaki nga kaliwat ni Gerson sumala sa mga banay sa ilang katigulangan, sumala sa ilang mga panimalay,

23sukad sa nagpanuigon ug 30 ka tuig hangtod sa nagpanuigon ug 50 ka tuig iphon nimo sila, ang tanan nga makahimo sa pagbuhat sa pag-alagad, sa paghimo sa buluhaton sulod sa tolda nga tagboanan.

24Kini mao ang katungdanan sa mga panimalay sa mga Gersonhanon, sa pag-alagad ug sa pagdala sa mga dad-onon.

25Sila ang magdala sa mga tabil sa Tolda ug sa tolda nga tagboanan, sa tabon niini ug ang tabon nga panit sa mga kanding nga anaa sa ibabaw niini ug sa salimbong sa pultahan sa tolda nga tagboanan,

26sa mga tabil sa hawanan ug sa tabil sa pultahan sa hawanan nga naglibot sa Tolda ug sa halaran, sa mga higot nga pisi ug sa tanang mga galamiton sa pag-alagad, ug ang tanan nga buluhaton mahitungod niini.

27Ang tanang buluhaton sa mga kaliwat nga lalaki sa mga Gersonhanon mag-agad sa mando ni Aaron ug sa iyang mga anak, sa tanan nilang dad-onon ug sa tanan nilang buluhaton. Ug itudlo ninyo kanila ang tanan nilang katungdanan sa mga dad-onon.

28Kini mao ang mga buluhaton sa mga panimalay sa mga anak nga lalaki sa mga Gersonhanon sulod sa tolda nga tagboanan, ug ang ilang mga buluhaton ilalom sa pagdumala ni Itamar nga anak ni Aaron nga pari.

Ang Katungdanan sa mga Merari

29“Mahitungod sa mga lalaki nga kaliwat ni Merari, ipha sila sumala sa ilang mga panimalay, sumala sa mga banay sa ilang katigulangan,

30sukad sa nagpanuigon ug 30 ka tuig hangtod sa nagpanuigon ug 50 ka tuig, iphon nimo sila, ang tanan nga makahimo sa pag-alagad aron sa paghimo sa buluhaton sa tolda nga tagboanan.

31Ug kini mao ang ilang katungdanan nga dad-on sumala sa tanan nga buluhaton nila sa tolda nga tagboanan: ang mga tabla nga porma sa Tolda uban sa mga babag niini, ang mga haligi ug ang mga tungtonganan niini,

32ang mga haligi sa hawanan nga naglibot ug ang ilang mga tungtonganan niini, ug ang mga ugsok ug ang mga higot nga pisi niini uban ang tanang mga kahimanan niini, ug ang tanan nga buluhaton niini. Ug itudlo ninyo kanila pinaagi sa mga ngalan ang tanang butang nga ilang katungdanan nga dad-on.

33Kini mao ang buluhaton sa mga panimalay sa mga lalaki nga kaliwat ni Merari, sumala sa tanan nilang buluhaton diha sa tolda nga tagboanan, ilalom sa pagdumala ni Itamar nga anak ni Aaron nga pari.”

Ang Pag-ihap sa mga Levihanon

34Unya si Moises ug si Aaron ug ang mga pangulo sa katilingban miihap sa mga Kohatihanon sumala sa ilang mga panimalay, ug sumala sa mga banay sa ilang katigulangan,

35sukad sa nagpanuigon ug 30 ka tuig hangtod sa nagpanuigon ug 50 ka tuig, ang tanan nga makahimo sa pag-alagad aron sa paghimo sa mga buluhaton diha sa tolda nga tagboanan.

36Ug ang naihap kanila sumala sa ilang mga panimalay 2,750.

37Kini sila mao ang gidaghanon diha sa mga panimalay sa mga Kohatihanon, ang tanan nga nag-alagad diha sa tolda nga tagboanan nga giihap ni Moises ug ni Aaron sumala sa sugo sa Ginoo pinaagi kang Moises.

38Ang gidaghanon sa mga kaliwat nga lalaki ni Gerson sumala sa ilang mga panimalay ug sumala sa mga banay sa ilang katigulangan,

39sukad sa nagpanuigon ug 30 ka tuig hangtod sa nagpanuigon ug 50 ka tuig, ang matag usa nga makahimo sa pag-alagad alang sa buluhaton sa diha sa tolda nga tagboanan,

40ang ilang gidaghanon sumala sa ilang mga panimalay ug sumala sa mga banay sa ilang katigulangan 2,630.

41Kini mao ang gidaghanon diha sa mga panimalay sa mga kaliwat nga lalaki ni Gerson, ang tanan nga nag-alagad diha sa tolda nga tagboanan, sa mga giihap ni Moises ug ni Aaron sumala sa sugo sa Ginoo.

42Ug ang gidaghanon diha sa mga panimalay sa mga kaliwat nga lalaki ni Merari sumala sa ilang mga panimalay, sumala sa mga banay sa ilang katigulangan,

43sukad sa nagpanuigon ug nga 30 ka tuig hangtod sa nagpanuigon ug 50 ka tuig, ang matag usa nga makahimo sa pag-alagad alang sa buluhaton diha sa tolda nga tagboanan,

44ang ilang gidaghanon sumala sa ilang mga panimalay 3,200.

45Kini sila mao ang mga naihap sa mga panimalay sa mga kaliwat nga lalaki ni Merari, nga giihap ni Moises ug ni Aaron sumala sa sugo sa Ginoo pinaagi kang Moises.

46Kadtong tanang mga naihap sa mga Levihanon, sa pag-ihap ni Moises ug ni Aaron ug sa mga pangulo sa Israel, sumala sa ilang mga panimalay ug sumala sa mga banay sa ilang katigulangan,

47sukad sa nagpanuigon ug 30 ka tuig hangtod sa nagpanuigon ug 50 ka tuig, ang matag usa nga makahimo sa pag-alagad aron sa pagbuhat ug sa pagpas-an sa mga dad-onon sa tolda nga tagboanan,

48kadtong mga naihap kanila 8,580.

49Sumala sa sugo sa Ginoo giihap sila pinaagi kang Moises, ang matag usa sumala sa iyang katungdanan ug sumala sa iyang dad-onon. Busa giihap sila niya sumala sa gisugo sa Ginoo kang Moises.