SALMO 71 - Cebuano Form-Based Bible (2011)

Pag-ampo sa Usa ka Tigulang

1Kanimo, O Ginoo, modangop ako;

ayaw gayod ako ibutang sa kaulawan!

2Sa imong pagkamatarong luwasa ug tabanga ako;

ikiling kanako ang imong igdulungog ug luwasa ako!

3Mahimo unta ikaw nga batong dalangpanan alang kanako,

usa ikaw ka lig-on nga kuta nga magluwas kanako,

kay ikaw mao ang akong bato ug ang akong kuta.

4Luwasa ako, O akong Dios, gikan sa kamot sa daotan,

gikan sa kamot sa dili matarong ug walay puangod nga tawo.

5Kay ikaw, O Ginoo, mao ang akong paglaom,

ang akong pagsalig, O Ginoo, sukad pa sa akong pagkabatan-on.

6Diha kanimo nagsalig ako gikan sa akong pagkatawo;

ikaw mao ang nagkuha kanako gikan sa taguangkan sa akong inahan.

Ang akong pagdayeg magpadayon nga alang kanimo.

7Ako sama sa usa ka timailhan alang sa daghan;

apan ikaw mao ang akong lig-on nga dalangpanan.

8Ang akong baba napuno sa pagdayeg kanimo,

ug sa paghimaya kanimo sa tibuok nga adlaw.

9Ayaw ako isalikway sa panahon sa pagkatigulang;

ayaw ako biyai sa diha nga ang akong kusog maluya na.

10Kay ang akong mga kaaway nagsulti mahitungod kanako;

kadtong naniid sa akong kinabuhi nag-usa sa paglaraw,

11nga nag-ingon, “Ang Dios mibiya kaniya;

gukda ug dakpa siya kay walay bisan usa nga moluwas kaniya.”

12O Dios, ayaw pagpalayo gikan kanako;

O akong Dios, pagdali sa pagtabang kanako!

13Ang akong mga kaaway mabutang unta sa kaulawan ug malaglag;

matabonan unta sa kaulawan ug sa pagkatalamayon

kadtong nagtinguha sa akong kadaot.

14Apan ako magpadayon sa paglaom,

ug magdugang pa gayod sa pagdayeg kanimo.

15Ang akong baba magsulti sa imong pagkamatarong,

sa imong mga buhat sa pagluwas sa tibuok nga adlaw,

kay ang gidaghanon niini dili na nako maihap.

16Moanha ako uban sa mga gamhanang buhat sa Ginoong Dios,

magdayeg ako sa imong pagkamatarong, sa imoha lamang.

17O Dios, gitudloan nimo ako sukad pa sa akong pagkabatan-on,

ug sa gihapon nagpahayag ako sa imong mga katingalahang buhat.

18Oo, bisan sa diha nga matigulang na ako ug ubanon na,

O Dios, ayaw ako biyai,

hangtod nga ikapahayag nako ang imong kusog

ngadto sa tanang kaliwatan nga moabot.

Ang imong gahom

19ug ang imong pagkamatarong, O Dios,

miabot sa kahitas-an.

Ikaw nga nagbuhat sa mga dagkong butang,

O Dios, kinsa ba ang sama kanimo?

20Ikaw nga nagpakita kanako ug daghang kagul-anan ug katalagman,

mopalig-on kanako pag-usab;

gikan sa kahiladman sa yuta

pabangonon nimo ako pag-usab.

21Ikaw magdugang sa akong dungog

ug maghupay kanako pag-usab.

22Magdayeg usab ako kanimo uban sa alpa,

tungod sa imong pakamatinumanon, O akong Dios;

kanimo mag-awit ako ug mga pagdayeg uban sa lira,

O Balaan sa Israel.

23Ang akong mga ngabil magsinggit sa kalipay

sa diha nga mag-awit ako ug mga pagdayeg kanimo;

ang akong kalag usab nga imong giluwas.

24Ang akong dila magsulti sa imong pagkamatarong sa tibuok nga adlaw,

kay sila nabutang sa kaulawan ug pagkatinamay,

kadtong nagtinguha paghimo ug kadaot kanako.