Hosea 1 - Malagasy Protestant Bible

1NY tenin’i Jehovah, izay tonga tamin’i Hosea, zanak’i Bery, tamin’ny andro nanjakan’i Ozia sy Jotama sy Ahaza ary Hezekia, mpanjakan’ny Joda, sy tamin’ny andron’i Jeroboama, zanak’i Joasy, mpanjakan’ny Isiraely.

Ny amin’ny vehivavy janga anankiray sy ny zanany, izay natao tandindon’ny Isiraely.

2TAMIN’ny niandohan’ny nitenenan’i Jehovah tamin’i Hosea dia hoy Jehovah taminy: Andeha hianao maka vady izay efa tena janga sy zanaky ny fijangajangana; fa fatra-pijangajanga miala amin’i Jehovah ny tany.

3Dia lasa izy naka an’i Gomera, zanakavavin’i Diblaima; ary dia nanan-anaka ravehivavy ka nitera-dahy taminy.

4Ary hoy Jehovah taminy: Ataovy Jezirela no anarany; fa vetivety dia hovaliako ny taranak’i Jeho noho ny ra nalatsaka tao Jezirela, ary hatsahatro ny fanjakan’ny taranak’Isiraely.

5Ary amin’izany andro izany dia hotapahiko ao amin’ny tany lemaka Jezirela ny tsipìkan’Isiraely.

6Ary nanan-anaka indray ravehivavy ka nitera-bavy. Dia hoy Jehovah taminy: Ataovy Lô-rohama no anarany; fa tsy hamindra fo amin’ny taranak’Isiraely intsony Aho, eny, tsy havelako mihitsy ny helony.

7Fa ny taranak’i Joda no hamindrako fo, ary Izaho Jehovah Andriamaniny no hamonjy azy, nefa tsy amin’ny tsipìka, na amin’ny sabatra, na amin’ny ady, na amin’ny soavaly, na amin’ny mpitaingin-tsoavaly.

8Ary rehefa notazana Lô-rohama, dia nanan-anaka indray reniny ka nitera-dahy.

9Dia hoy Jehovah: Ataovy Lô-amy no anarany; fa hianareo tsy oloko, ary Izaho tsy ho Andriamanitrareo.