Salamo 39 - Malagasy Protestant Bible

Ny fahatsinontsinon’izao fiainana izao.

1Ho an’ny mpiventy hira. Ho an’i Jedotona. Salamo nataon’i Davida.

HOY izaho: Hitandrina ny làlako aho ka tsy hanota amin’ny lelako;

Hasiako fehim-bava ny vavako,

Raha mbola eo anatrehako ny ratsy fanahy.

2Nangina mihitsy aho,

Namihim-bava aho ka tsy nilaza na dia ny tsara aza,

Dia nihetsika mafy ny fanaintainan’ny aretiko.

3Nafana ny foko tato anatiko;

Raha nieritreritra aho, dia nisy afo nirehitra,

Ka niteny tamin’ny lelako aho.

4Jehovah ô, ampahafantaro ny farako aho

Sy izay ohatry ny androko;

Aoka ho fantatro fa olon-kandalo aho.

5Indro, efa nataonao vodivoam-pelatanana ny androko;

Ary ny fiainako toy ny tsinontsinona eo anatrehanao;

Zava-poana ihany tokoa ny olona rehetra, na dia ny matanjaka aza.

[Sela.]

6Aloka tokoa no fandehandehan’ny olona;

Zava-poana tokoa no itabatabany;

Mihary harena izy, nefa tsy fantany izay ho tompon’izany.

7Ary ankehitriny, inona no andrasako, Tompo ô?

Hianao no antenaiko.

8Manafaha ahy amin’ny fahadisoako rehetra;

Aza manao ahy ho fanakòran’ny adala.

9Mangina aho ka tsy miloa-bava;

Fa Hianao no nanao izao.

10Aoka hitsahatra ny fikapohanao ahy;

Reraka aho azon’ny famelin’ny tànanao.

11Anatra noho ny fahadisoany no ananaranao ny olona,

Ka manimba ny hatsaran-tarehiny tahaka ny kalalao Hianao;

Zava-poana tokoa ny olona rehetra.

[Sela.]

12Mandrenesa ny fivavako, Jehovah ô;

Ary mihainoa ny fitarainako;

Aza mangina amin’ny ranomasoko;

Fa vahiny aminao aho

Sy mpivahiny tahaka ny razako rehetra.

13Aza atrehinao aho aloha, dia ho miramirana indray,

Dieny aho tsy mbola lasa ka tsy ho eto intsony.