Salamo 97 - Malagasy Protestant Bible

Ny fisehoan’ny fanjakan’Andriamanitra amin’ny hery, izay maharava ny sampy, fa mahasoa ny smpanompon’Andriamanitra kosa.

1JEHOVAH no Mpanjaka, aoka ho faly ny tany;

Aoka ho ravoravo ny nosy maro.

2Rahona sy aizim-pito no manodidina Azy

Fahamarinana sy fitsarana no fanorenan’ny seza fiandrianany.

3Misy afo mialoha Azy

Ka mandevona ny fahavalony manodidina.

4Mahazava izao tontolo izao ny helany;

Mahita izany ny tany ka mihorohoro.

5Ny tendrombohitra miempo tahaka ny savoka eo anatrehan’i Jehovah,

Dia eo anatrehan’ny Tompon’ny tany rehetra.

6Ny lanitra maneho ny fahamarinany,

Ary ny firenena rehetra mahita ny voninahiny.

7Aoka ho menatra izay rehetra manompo sarin-javatra voasokitra

Sy miarahaba tena ny amin’ny andriamani-tsi-izy;

Miankohofa eo anoloan’i Jehovah, hianareo andriamanitra rehetra.

8Ziona mandre ka faly;

Ary ravoravo ny zanakavavin’i Joda

Noho ny fitsaranao, Jehovah ô.

9Fa Hianao, Jehovah ô, no avo indrindra ambonin’ny tany rehetra;

Efa avo ambonin’ny andriamanitra rehetra Hianao.–

10Hianareo izay tia an’i Jehovah, mankahalà ny ratsy;

Miaro ny fanahin’ny olony masina Izy

Ary mamonjy azy amin’ny tànan’ny ratsy fanahy.

11Ny fahazavana no voafafy ho an’ny marina,

Ary ny fifaliana ho an’ny mahitsy fo.

12Mifalia amin’i Jehovah, ry olo-marina,

Ary miderà ny anarany masina.