1Ho an’ny mpiventy hira. Al-tasheth. Miktama nataon’i Davida.
MOA ny tsi-fitenenana va ataonareo ho filazana ny marina?
Mitsara mahitsy va hianareo, ry zanak’olombelona?
2Tsy izany, fa ny fonareo no amoronanareo ny ratsy;
Mandanja ny fandozan’ny tànanareo etỳ an-tany hianareo.
3Mivily hatrany am-bohoka ny ratsy fanahy;
Mania hatrany an-kibo izy ka miteny lainga.
4Misy poizina tahaka ny an’ny menarana aminy;
Eny, tahaka ny vipera marenina izay manentsin-tadìny izy
5Ka tsy mihaino ny feon’ny mpanao ody,
Na dia izay mpahay ody indrindra aza.
6Andriamanitra ô, torotoroy ny nifiny eo am-bavany;
Omboty ny vazan’ny liona tanora, Jehovah ô.
7Aoka ho ritra tahaka ny rano-trambo izy;
Raha atraniny ny zana-tsipìkany, dia aoka ho tapa-doha ireny;
8Aoka ho tahaka ny lelosy izay mihalevona eny am-pandehanana izy;
Aoka ho tahaka ny zaza-vakimanta izay tsy mahita masoandro izy.
9Dieny tsy mbola mafanan’ny afon-tsilo ny vilaninareo,
Aoka ho entin’ny tafio-drivotra ireny, na ny lena na ny maina.
10Hifaly ny marina, raha mahita ny famaliana;
Hanasa ny tongony amin’ny ran’ny ratsy fanahy izy;
11Dia hiteny ny olona ka hanao hoe: Misy valiny tokoa ho an’ny marina;
Misy tokoa Andriamanitra Izay mitsara etỳ ambonin’ny tany.
Who We AreWhat We EelieveWhat We Do
2025 by iamachristian.org,Inc All rights reserved.
