Salamo 140 - Malagasy Protestant Bible

Fangataham-piarovana noho ny ataon’ny olona ratsy fanahy sy fetsy vava.

1Ho an’ny mpiventy hira. Salamo nataon’i Davida.

JEHOVAH ô, vonjeo amin’ny olon-dratsy aho,

Ary arovy amin’ny olon-dozabe,

2Izay mihevitra ratsy ao am-pony

Ka manangana ady isan-andro.

3Mandranitra ny lelany tahaka ny bibilava izy,

Ny poizin’ny menarana no ao ambanin’ny molony.

[Sela.]

4Jehovah ô, vonjeo amin’ny tànan’ny ratsy fanahy aho,

Ary arovy amin’ny olon-dozabe,

Izay efa nihevitra handronjina ahy ho potraka.

5Ny mpiavonavona efa nanafina fandrika sy kofehy hamandrihany ahy;

Efa namela-pandrika harato teo amoron-dàlana izy;

Nametraka tadivavarana hahazoany ahy izy.

[Sela.]

6Hoy izaho tamin’i Jehovah: Andriamanitro Hianao;

Henoy ny feon’ny fifonako, Jehovah ô!

7Jehovah, Tompo ô, ry Herin’ny famonjena ahy,

Manarona ny lohako amin’ny andro fiadiana Hianao.

8Jehovah ô, aza manome ny irin’ny ratsy fanahy;

Ary aza avela ho tanteraka ny hevi-dratsiny, fandrao hisandratra izy.

[Sela.]

9Ny lohan’izay manemitra ahy

Dia aoka hosaronan’ny ratsy tononin’ny molony.

10Aoka hisy vain’afo halatsaka aminy;

Aoka hariana any anaty afo izy, na any amin’ny rano lalina, ka tsy hiarina intsony.

11Tsy hampitoerina amin’ny tany ny olo-mahay vava;

Henjehin-doza ny olon-dozabe ka ho lavo.

12Fantatro fa Jehovah no handahatra ny tenin’ny mahantra

Sady hanome rariny ho an’ny malahelo.

13Eny tokoa, ny marina hisaotra ny anaranao;

Hitoetra eo anatrehanao ny mahitsy.