Zaburi 146 - Bible in Kiswahili, Revised Union Version 2013

Sifa kwa kupata msaada wa Mungu

1Haleluya.

Ee nafsi yangu, umsifu BWANA.

2Nitamsifu BWANA muda ninaoishi,

Nitamwimbia Mungu wangu ningali ni hai.

3 Isa 2:22 Msiwatumainie wakuu,

Wala binadamu ambaye hakuna wokovu kwake.

4 Mhu 12:7; 1 Kor 2:6 Pumzi yake inapomtoka, anarudi katika udongo wake,

Siku hiyo hiyo mipango yake hutoweka.

5 Yer 17:7 Heri ambaye Mungu wa Yakobo ni msaada wake,

Na tumaini lake ni kwa BWANA, Mungu wake,

6 Mik 7:20; Mdo 4:24; 14:15; Ufu 14:7 Aliyezifanya mbingu na nchi,

Bahari na vitu vyote vilivyomo.

Huishika kweli milele,

7Huwafanyia hukumu walioonewa,

Huwapa wenye njaa chakula;

BWANA hufungua waliofungwa;

8BWANA huwafumbua macho waliopofuka;

BWANA huwainua walioinama;

BWANA huwapenda wenye haki;

9BWANA huwahifadhi wageni;

Huwategemeza yatima na mjane;

Bali njia ya wasio haki huiharibu.

10BWANA atamiliki milele,

Mungu wako, Ee Sayuni, kwa vizazi vyote.

Haleluya.