Еврейлерге 13 - Zhana Osiet（NTKAZ）

1Сондықтан бір-біріңе деген бауырластық сезімдерің суымасын.

2Қонақжай болуды ұмытпаңдар, тіпті, кейбіреулер періштелерге дейін қонақжайлылық көрсеткенін білмей де қалған.

3Сонымен қатар, тұтқында отырғандармен бірге болып, олардың тәндік азаптарын бірге көтерісіңдер, өйткені сендер де олар секілді тәндік денеде өмір сүріп жатырсыңдар.

4Некелеріңді барлық жағынан қастерлеңдер, неке төсегін былғамаңдар, өйткені азғындар мен неке адалдығын бұзатындарды Құдайдың соты күтіп тұр.

5Ақшақұмар болмаңдар, қолдарыңда барға қанағат етіңдер, өйткені Құдайдың Өзі сендерге: «Мен әрдайым сенімен бірге боламын және Мен ешқашан сені тастамаймын», -деп айтқанын естеріңнен шығармаңдар.

6Міне, біз сондықтан: «Қандай жағдай болса да, Ием маған көмекке келеді, мен еш нәрседен қорықпаймын, адам маған не істей алады?» - деп нық айта аламыз.

7Өздеріңе Құдайдың сөзін айтып, сендерді жетелеген жетекшілеріңді естеріңнен шығармаңдар, олардың өткен өміріне қарап, сенімге соншама адал болғанын үлгі тұтыңдар.

8Өйткені Иса Мәсіх кеше қандай болса, бүгін де дәл сондай, Ол мәңгілікке солай болып қала береді.

9Неше түрлі бөтен ағымға беріліп, жат ілімнің соңынан еріп кетпеңдер. Жүректі нығайтатын ас туралы ережеге көңіл аудармаңдар, ол ешқандай да пайда әкелмейді, оның орнына Құдайдың рақымына жүректеріңнен орын беріп, сонымен нығайтыңдар.

10Біз үшін берілген құрбандық Киелі шатырда қызмет ететін қызметкерлер жейтін құрбандық емес.

11Негізінде, күнәлардан тазарту үшін шалынған құрбандықтың қанын Киелі деп аталған жерге тек бірінші бас қызметкер ғана алып кіре алатын, ал құрбандықтың денесін қостың сыртына апарып, өртеп жіберетін.

12Сол секілді Иса да халықты Өзінің қаны арқылы тазартып алу үшін, қалаға кіретін қақпаның сыртында азап шекті.

13Сондықтан біз де қостың сыртына шығып, Оның қасына барып, Оның көрген қорлығын бірге көтерейік.

14Өйткені біз бұл қалада қалмаймыз, керісінше, біз болашақтың қаласын күтудеміз.

15Сол себепті келіңдер, бәріміз бірігіп, Құдайға беретін мадақтау құрбандығымызды Иса арқылы келіп, Құдайға арнайық. Бұл Құдайдың сүйіспеншілігін мойындап, Оның атын мадақтау үшін, біздің аузымыздан шыққан жеміс болмақ.

16Сонымен қатар, қайырымдылық жасау мен өзара қарым-қатынаста тұруды да ұмытпаңдар, өйткені мұндай құрбандықтар Құдайға ұнамды болады.

17Жетекшілеріңе мойынұсынып, оларға бағыныңдар. Сонда олар өздеріне жүктелген міндетті ренжімей, қуанышпен атқаратын болады. Олар әрбір жан үшін Құдайдың алдында жауап береді, сендердің қамдарыңды ойлап, қырағы жүреді, олардың ауыр жүк көтергендей болып жүргені сендерге ешқандай пайда әкелмейді.

18Біз үшін де мінәжат етіңдер. Біздің арымыз таза екеніне сенімдіміз, өзіміздің жүріс-тұрысымызды тек жақсы жағынан көрсетуге тырысудамыз.

19Әсіресе, менің сендерге тезірек келуіме жол ашылуы үшін мінәжат етулеріңді өтінемін.

20Сонымен, осы әлемнің Құдайы әрі Өзінің қанымен мәңгілік келісімді бекітіп, Ұлы Бағушы атанған біздің Иеміз Исаны өлімнен қайта тірілтіп алған Құдай

21сендердің атқаратын әрбір игі істеріңе Өзінің еркіне сай орындайтын қабілет берсін. Иса Мәсіх арқылы Оның алдында біз де Оған ұнамды бола берейік. Оның аты ғасырдан ғасырға жасай берсін! Аумин!

22Бауырластар, осы уағыздың сөзін берік ұстануларыңды сендерден өтінемін, өйткені мен сендерге оны өте қысқа жазып жібердім.

23Біздің Тімоте бауырымыздың бостандыққа шыққанын білетін шығарсыңдар, егер де ол тез арада осы жаққа келетін болса, онда маған да сендерді көруге мүмкіндік туады.

24Барлық жетекшілеріңе және киелілердің бәріне бізден сәлем айтыңдар. Италиядағы бауырластар сендерге сәлем айтуда.

25Құдайдың рақымы сендердің барлықтарыңмен бірге бола берсін деп тілейміз.