Елшілер 15 - Zhana Osiet（NTKAZ）

1Сонда (Антиохияда) тәлім беріп жүргендердің көбі Яһудеядан келген болатын. Солардың арасынан шыққан кейбіреулері сол арадағы бауырластарға: -Егер де сендердің сүндеттелулерің Мұсаның дәстүріне сай болмаса, онда құтқарылмайсыңдар, - деп үйрете бастады.

2Осыған байланысты Пауыл мен Барнаба олармен біраз сөз таластырып, айтысып қалды. Сонда Пауыл мен Барнаба және олардың кейбіреулері осы даулы мәселені елшілер мен ақсақалдардың алдында шешу керектігін түсініп, Иерусалимге бармақшы болды.

3Сонымен, қауым оларды жолға шығарып салды. Олар Финикия мен Самария арқылы өтіп, ондағы бауырластарға өзге ұлттардың да сенімге бет бұрып жатқаны жөнінде айтып, оларды да үлкен қуанышқа бөледі.

4Олар Иерусалимге келгенде, қауымның атынан келгенін елшілер де, ақсақалдар да біліп, оларды қабылдады. Елшілер оларға Құдайдың өздері арқылы істеген барлық істері туралы жеткізді.

5Сонда кейбір фарисей бағытынан шыққан сенушілер қарсылық білдіріп, оларды сүндетке отырғызып, Мұсаның Заңын орындауын талап етуді бұйырды.

6Осыдан кейін елшілер мен ақсақалдардың бәрі жиналып, осыны ортаға салып, жан-жақты талқылады.

7Ұзақ талқылаулардан кейін, Петір орнынан тұрып оларға: -Бауырластар, ер-азаматтар, алғашқы күннен бастап, Құдай мені сендердің араларыңнан таңдап алып, мен арқылы өзге ұлттарға да Ізгі хабар айтқызғанын, олардың сеніммен қабылдағанын өздерің білесіңдер.

8Құдай адам жүрегін біледі, сондықтан Ол бізге бергені сияқты оларға да Киелі Рухын берді, бұл бәріне куәлік болды.

9Міне, осы арқылы Құдай олар мен біздің арамызда ешқандай айырмашылықтың жоқ екенін білдірді, өйткені Ол сенім арқылы олардың жүректерін тазартты!

10Қазір не үшін Құдайды сынап тұрсыңдар? Сонда біздің ата-бабамыз да, мына біз де көтеріп жүре алмайтын қамытты енді сол шәкірттердің мойнына кигізейін дедіңдер ме?

11Алайда біз Иеміз Исаның рақымы арқылы құтқарылатынымызға сенеміз, сол сияқты олар да Исаға сенеді, - деді.

12Сонда көбі үндемей қалды, одан кейін Құдайдың өзге ұлттар арасында олар арқылы жасаған кереметтері жөнінде Барнаба мен Пауылдың әңгімелерін тыңдады.

13Біраз үнсіздіктен кейін, Жақып былай деді: -Бауырлас ер-азаматтар, енді мені тыңдаңдар.

14Шимон (Петір) сөзінің басында Құдайдың өзге ұлттарға да көз салып, Оның атына ие болуға тырысқан халықтарға Ол мейірім көрсетіп жатқаны туралы айтып берді.

15Бұл кезінде пайғамбарлардың айтып кеткен мына сөздеріне сәйкес келіп тұр:

16«Мен бұдан кейін қайтып келемін. Мен сол кезде Дәуіттің құлап қалған шатырын қайта құрып, оның қираған жерін қайта қалпына келтіріп, оны түзетіп, тұрғызамын,

17сонда басқа адамдар Иемізді іздесе, ал өзге ұлт өкілдеріне Менің атым жария етіледі», - деп айтқан

18Жаратқан Иенің сөзі баяғыдан белгілі.

19Сондықтан менің айтарым: өзге ұлттардың арасынан Құдайға бет бұрғандар болса, оларға ауыртпалық салудың қажеті жоқ деп санаймын.

20Керісінше, оларға хат жазып, өздерін арам нәрселерден, пұтқа табынудан, неке адалдығын бұзудан, арам өлген малдың қанынан аулақ болуды айтайық.

21Өйткені өткен ұрпақ арқылы берілген Мұсаның Заңы әр сенбіде, қалалардағы синагогалардың бәрінде уағыздалып та, оқылып та жүр ғой.

22Елшілер мен қауым ақсақалдары және барлық ру басылары өзара ақылдаса келіп, бауырластардың алды болып жүрген Яһуда деп аталған Барсаба мен Сыйлас деген бауырластарды таңдап алды да, оларды Пауыл және Барнабамен бірге Антиохияға жібермек болып шешті де,

23олардың қолына өздері жазған хатты ұстатты, онда: «Осындағы елшілер мен ақсақалдар алқасы Антақия мен Сирия және Кілікия аймақтарындағы өзге ұлт өкілдерінің арасынан шыққан бауырластарға сәлем жолдайды!

24Біз мына жағдайды естідік: Біздің арамыздан шыққан кейбір бауырластар сендерге барып, көңілдеріңді қобалжытатын сөздер айтып, сендерді біраз дүрліктірген екен, бірақ біз оларға ондай нұсқау берген жоқпыз.

25Сондықтан біз бәріміз келісіп, өз арамыздан біраз бауырластарды таңдап алып, оларды өздерің жақсы көретін Пауыл мен Барнабаға қосып сендерге жібердік,

26өйткені олар -Иеміз Иса Мәсіхтің атын шын жүрегімен қастерлейтін және Оған берілген адамдар.

27Міне, сонымен қатар, біз Яһуда мен Сыйласты да сендерге жіберіп, олар біздің жазғанымыздың бәрін сендерге сөзбен жеткізсін дедік.

28Өйткені бұл Киелі Рухтың жетелеуімен болды, сондықтан мына бір маңызды нәрселерден басқасын сендерге жүк етіп артқымыз келмейді:

29жалған тәңірлерге арналған құрбандықтар мен арам өлген малдың қанынан және неке адалдығын бұзудан өздеріңді аулақ ұстаңдар. Егер де осы нұсқауларды сақтайтын болсаңдар, бұл өздеріңе жасаған жақсылық болып қалмақ. Аман болыңыздар».

30Жолдау хатты алып, елшілікке жіберілгендер Антиохияға келді. Көпшілік жиналған кезде оларға арнап жазылған хатты берді.

31Хатты оқыған соң, сонда көрсетілген жұбаныш сөздерге олар қатты риза болды.

32Яһуда мен Сыйластың пайғамбарлық дарыны болғандықтан, олар сол арадағы бауырластардың біразына жұбататын сөздер айтып, оларды нығайтты.

33Олардың сол жердегі уақыттары біткен соң, бауырластар оларға амандық пен тыныштық тілеп, оларды қайтарды.

34Сыйлас болса, сол жерде қалуға шешім қабылдады. (Яһуда Ерусәлімге қайтып кетті).

35Антиохияға келген соң, Пауыл мен Барнаба тәлім беріп, басқаларымен бірге Ізгі хабар таратып, Иеміздің сөзімен бөлісті.

36Біраз күн өткен соң, Пауыл Барнабаға: -Енді кері қайтайық, бір кездері өзіміз Иеміздің сөзін жеткізген қалаларға барайық, сондағы бауырластардың жағдайларын көріп-білейік, - деп ұсыныс жасады.

37Барнаба өзімен бірге Марқа деп аталған Жоханды ертіп алғысы келді,

38бірақ алғашында осы іске барғысы келмей, Памфүлияда өздерінен бөлініп кеткен сол адамды Пауыл ерткісі келмеді.

39Осы жағдайға байланысты олардың арасында келіспеушілік туындағандықтан, бір-бірінен бөлініп, екеуі екі жаққа кетті. Барнаба Марқаны алып, кемемен Кипрге жүзіп кетті.

40Пауыл Сыйласты таңдап алып, бауырластардың Құдайдың рақымына өздерін тапсырғанын қабыл алып, жолға шықты.

41Пауыл Сирия мен Киликия арқылы өтіп, сондағы қауымдарды нығайтты.