UJUDA 1 - IsiNdebele 2012 Translation

Ukulotjhisa

1UJuda, inceku kaJesu Krestu, umfowabo kaJakopo, kilabo ababiziweko, abathandwe nguZimu uBaba, balondwa nguJesu Krestu.

2Sengathi umusa, ukuthula nethando kunganda kini noke.

Abalahlekisi

3Bathandekako, nanyana bengitjhisekela ukunitlolela ngesindiso esiyihlanganyeleko soke, ngibone kunesidingo bonyana nginitlolele nginibawe bona nilwele ukukholwa okwabekwa kwabacwengileko kwaba kanye.

4Nje-ke sebangene ngokukhukhutha labo okwatlolwa ngabo ekadeni bona bangabokulahlwa. Bababantu abangesabi uZimu nabaphendulela umusa kaZimethu emesweni begodu baphika okunguye kwaphela uMnikazi wethu, iKosi uJesu Krestu.

5Nanyana senikwazi koke lokhu, ngithanda ukunikhumbuza bona uSomnini wasindisa kwaba kanye isizwe sakhe enarheni yeGibhide, kodwana emva kwalokho warhayila labo abangazange bakholwe.

6Ngitjho neengilozi ezingazange zibulonde ubukhosi bazo, kodwana zatjhiya ikhaya lazo, uzilonde eenketanini zesiphelani ebumnyameni obuzikileko zilindele ilanga elikhulu lokugwetjwa.

7Ngokufanako, iSodoma neGomora kanye nemizi ebhodileko yazibandakanya emabayini ngendlela emameswe nedazukileko, yaba sibonelo sokuhlunguphazwa ngokutjhiswa ngomlilo wesiphelani.

8Ngokunjalo, laba babhudangi basilaphaza imizimba yabo, badela ukulawulwa begodu bahlambalaza ubukhosi.

9Ngitjho nengilozi ekulu uMikhayeli lokha nakaphikisana noSathana ngesidumbu sakaMosi, azange amtemeleje ngehlamba kodwana wathi: “USomnini uzakukhalimela.”

10Kodwana abantwaba bahlambalaza nanyana kuyini abangakwaziko; nalokho abakwaziko ngemvelo, njengeenyamazana, ngikho okubabhubhisako.

11Maye kibo, ngombana bakhamba endleleni kaKayini; bagijimela ekudukeni kwakaBhalami ngenca yomvuzo begodu babhubha ekuhlubukeni kwakaKora.

12Laba balihlazo eminyanyeni yenu yethando lapha badla khona nani banganavalo, bazondla bona. Banjengamafu aphetjhulwa mumoya, banjengemithi yesilimela enganazo iinthelo, efe kabili etsonyulwe nemirabhu.

13Bamamaza welwandle abhubhudlha amahlazo wawo; baziinkwekwezi ezilahlekileko ezibekelwe ubumnyama obukhulu obungapheliko.

14U-Inogo, osizukulwana sekhomba kusukela ku-Adamu, waphorofida ngabo wathi: “Qalani, uSomnini uza nebakhe abacwengileko abamatjhumitjhumi weenkulungwana,

15uzokugweba boke, abe ahlunguphaze boke abangakholwako ngazo zoke izenzo zabo zokungakholwa abazenzileko ngendlela yokungakholwa kwabo, iye, nangamezwi anamadinyana abawakhuluma ngokunyefula.”

16Laba kubabantu abakhalalako nabasolako; balandela iinkanuko zabo; bayazigqaja begodu balutha abanye ukuze bafumane inzuzo.

Ukukhalima nokuyala

17Kodwana nina bathandekako, khumbulani amezwi akhulunywa ngaphambilini bapostoli beKosethu uJesu Krestu.

18Bathi kini: “Ngemihla yokuphela kukhona abazanihleka ihlaya, bakhambe ngeenkanuko zabo ezimbi.”

19Ngibo labo abanganaMoya abaletha ukwahlukana.

20Kodwana nina bathandekako, zakheni ekukholweni kwenu okucwengileko, nithandaze ngoMoya oCwengileko.

21Hlalani ethandweni lakaZimu, nilindele isirhawu seKosethu uJesu Krestu, esisiletha ekuphileni okungapheliko.

22Nizwelane nalabo abazazako;

23abanye basindiseni ngokubahlwitha emlilweni; abanye nizwelane nabo ngokwesaba, nizonde ngitjho nesambatho esinindwe ziinkanuko zabo ezimbi.

Ukwamukela umusa

24Kiloyo onamandla wokunilonda bona ningawi, nokunijamisa phambi kwephazimulo yakhe ninganabala, ninokuthokoza okukhulu,

25kuye uZimu oyedwa, uMsindisethu ngoJesu Krestu iKosethu, akube kuye iphazimulo, amandla nobukhosi, kusukela ekuthomeni nagadesi ngokungapheliko! Amen.