UJOBHO 32 - IsiNdebele 2012 Translation

U-Elihu uthatha indawo

1Yeke amadoda amathathu lawo alisa ukuphendulana noJobho ngombana gade azibona amsulwa.

2Kodwana u-Elihu umsa kaBharakeli, umBhuzi womndeni kaRama, wathukuthelela uJobho khulu. Wamthukuthelela ngebanga lokuzithethelela kwakhe phambi koZimu.

3Godu wathukuthelela abangani abathathu ngombana bahlulwa kufumana ipendulo kuJobho kodwana khonapho baragela phambili nokumsola ngobukhohlakali.

4Ngebanga lokobana amadoda lawo bekamakhulu kuye, u-Elihu walinda ngaphambi kobana akhulume noJobho.

5Nje-ke, kuthe lokha nabona bonyana amadoda amathathu lawo akasenapendulo, kwathi akafe ngetukuthelo.

6Yeke u-Elihu umsa kaBharakeli umBhuzi wathi:

“Mina ngisese mutjha ngeminyaka,

nina sele nibadala.

Kungalokho ngibe nevalo, ngesaba

ukunitjela engikwaziko.

7Ngadlumbana ngathi,

‘Akukhulume isikhathi,

iminyaka ifundise ukuhlakanipha.’

8Kuhlekuhle mumoya osemuntwini,

iye, mphefumulo woSabekako

onikela abantu ukwazi.

9Ubudala abumenzi umuntu ahlakaniphe

nokuluphala akumenzi azi okufaneleko.

10Kungalokho ngithe, ‘Ngilalelani!

Nami ngizanitjela engikwaziko.’

11Qala, fengalinda amezwenu,

ngalalela imibonwenu.

Nanilokhu nifunana namagama,

12bengiseze nginilalele kuhle.

Kodwana akakho okghone uJobho,

iye, phakathi kwenu akakho okghone

ukuphendula amezwakhe.

13Ningeze nathi, ‘Sifumene ukuhlakanipha kwamambala,

nje-ke akube nguZimu oqalana noJobho,

kungabi mumuntu.’

14UJobho nahlela indabakhe ubangakayiqalisi kimi,

ngalokho angizumphendula ngamezwenu.”

U-Elihu ukhuluma noJobho

15“Abangani bakho bakhenile, baphelelwe

begodu abasenamezwi abangawatjho.

16Iye, bathule bathe du,

bajamile, abasenapendulo!

Alo, ngilinde na?

17Awa, kwanje-ke lithuba lami lokuphendula,

iye, ngitjho engikwaziko.

18Ngiyaphuphuma ngamezwi,

ngisunduzwa mumoya ongaphakathi kwami.

19Ngambala, ngaphakathi kwamapha

kunjengewayini elivalwe lisabila,

iye, njengeenkhumba ezidatjulwa liwayini elitjha.

20Ngimele ngikhulume ngihlambuluke,

ngivule umlomami ngiphendule.

21Angizukukhetha ibala,

namkha ngiyenge umuntu,

22ngombana angikwazi ukutshima.

Nagade ngikwazi,

umBumbami ubezangisusa msinyana.