U-ISAYA 46 - IsiNdebele 2012 Translation

Abosingazimu beBhabheli abanamandla

1UBhele ukhothamile,

uNebo utjekamile.

Imifanekiso yabo, nina maBhabheli

ebegade ninande niyithwala,

kwanjesi sekuyipahla ethwelwe ziinkomo,

iye, sebamuthwalo wefuyo ediniweko.

2Batjekamile bebakhothamile bobabili,

abakwazi nokusindisa ipahla abanayo,

ngitjho nabo ngokwabo baya ekuthunjweni.

3USomnini uthi:

“Yewungilalele, wena ndlu kaJakopo,

iye, noke nina eniseleko endlini ka-Israyeli:

Nanithwelwe kusukela esibelethweni,

nimumethwe kusukela esiswini

4begodu bekube sekuluphaleni nginguye owenza lokho

iye, benithukghele ngizakunisekela.

Lokho mina engikubumbileko, ngiyakuthwala,

iye, ngimi onisekelako nonisindisako!

5Nizangifanisa nobani

nanyana ningilinganise nobani?

Ngubani eningangimadanisa naye

kobana silingane?

6Labo abathulula igolide emigodlenabo,

balinganisa isiliva esilinganisweni,

baqatjha umkhandigolide

kobana abumbe usingazimu,

bamkhothamele, bamlotjhe.

7Bayamguga, bamthwale emahlombe;

bamnzinzise endawenakhe bese uyajama-ke.

Uzalokho atshimalele

lapha bambeke khona.

Nanyana kunomuntu omlilelako, akaphenduli,

akasindisi umuntu loyo esizini lakhe.

8“Khumbulani lokhu, niqine amandla

benicabangisise, nina mahlubuka.

9Iye, khumbulani izinto zaphambilini,

zekadeni:

NginguZimu begodu akakho omunye.

NginguZimu begodu akakho ofana nami

10omemezela isiphetho ekuthomeni,

iye, ekadeni lokho okungakenzeki.

Ngithi, ‘Ihloswami izakujama

begodu ngizakwenza koke engikufunako.’

11Ngibiza idlanga ngepumalanga,

iye, umuntu enarheni ekude

ozakufeza ihloswami.

Mbala, engikukhulumileko ngizakufeza;

iye, engikutlamileko ngizakwenza.

12Ngilalelani nina maphikakani ndina,

nina enikude nokulunga.

13Ngitjhideza ihlalohle yami eduze, ayisikude

begodu isindiswami ayizukuriyada.

Ngizakunikela iZiyoni isindiso,

iphazimulwami izakwambulwa ku-Israyeli.”