UJOBHO 4 - IsiNdebele 2012 Translation

U-Elifasi uphendula uJobho kokuthoma

1U-Elifasi umTemani waphendula wathi:

2“Nange umuntu angakhuluma nawe

ungakhubeka na?

Nokho-ke, akunamuntu ongathula nakunje.

3Qala, ufundise abanengi,

waqinisa abazandla zibuthakathaka.

4Amezwakho abe sisekelo kokhutjwako,

waqinisa abamadolo nzima.

5Kodwana nasele zibuya ngawe,

uphela amandla,

nawuthintekako, uyakakamala.

6Kanti ukwesaba kwakho uZimu, akukuqinisi na?

Ubuqotho bepilwakho, abusilithemba lakho na?

7Akhese ucabangisise kuhle:

Wakhe wabonaphi omsulwa atjhabalaliswa na?

Kukuphi lapha olungileko akhe abhujiswa khona?

8Mina-ke ngokubona kwami:

Labo abalima ikohlakalo, batjale isizi,

bavuna abakutjalileko.

9UZimu naphefumulako, bayabhubha,

navuthela ngobukhali bakhe, bayaphela.

10Ukubhodla kwebhubezi,

ilizwi lengwenyama ethukutheleko

namazinyo webhubezana akuwasizi.

11Ikosi yeenyamazana izulazula inganakudla

namawundlu webhubezikazi aphadlhalele.

12“Ilizwi leza kimi ngefihlakalo,

indlebami yezwa umhlebezwana,

13emizindlweni yemibono yamabhudango,

lokha abantu nababanjwe buthongo.

14Ngehlelwa kukwesaba nokuthuthumela,

amathambami woke aqhaqhazela.

15Kwavela isithunzi ebusweni bami,

kwaphakama iinhluthu ehlokwami.

16Isithunzeso sajama rwe,

azange ngazi bona yintobani.

Kwathi isigeso sisajame phambi kwami njalo,

ngezwa ilizwi elihlebezako lithi,

17‘Obhubhako angaba neqiniso ngaphezu koZimu na?

Umuntu angaba msulwa ngaphezu komDali wakhe na?

18Qala, uZimu akanikeli iindalwa zezulu ukuzilawula

begodu neengilozi zakhe uyazisola nazenza iimphoso.

19Alo, bebayini-ke abahlala eenkumbeni zamasoyi,

ezidzimelele esisekelweni sethuli,

abapitlizeka lula njengomuhlwa na?

20Babhujiswa ngalanga linye

batjhabalala unomphela banganakwa.

21Angithi nakuqhusulwa intambo yamatendabo,

bayafa ngokungazi kwabo!’ ”