UGENESISI 49 - IsiNdebele 2012 Translation

UJakopo utjela amadodanakhe ngekusasa lawo

1UJakopo wabiza amadodanakhe wathi: “Bizanani nihlangane ukuze nginitjele bonyana kuzokwenzakalani kini esikhathini esizako.

2“Buthanani nilalele madodana kaJakopo;

lalelani uyihlo u-Israyeli.

3“Rubeni, ulizibulo lami, umamandlami,

umphumela wokuthoma wobudoda bami.

Ngawe ngasasa, ngaqina amandla.

4Kodwana njengamanzi anyamalalako,

nawe angeze waba neenzukulwana,

ngombana wangena emalalweni kayihlo,

wasilaphaza umbhedami.

5“USimiyoni noLevi zizelamani

iinsabula zabo ziinhlabano zenturhu.

6Angingangeni ebandleni labo,

ngingabi mdibi munye nabo,

ngombana ngetukuthelwabo babulala abantu,

ngokuhlosa baqunta imisipha yemilenze yeenkomo.

7Akunikelelwe ukuthukuthela kwabo ngombana kubhamba,

nobukhali babo ngombana buyavutha!

Ngiyabaphadlhalaja kwaJakopo,

ngibahlakaze kwa-Israyeli.

8“Wena Juda, abafowenu bayakubuka,

isandla sakho siphezu kwentamo yezitha zakho,

amadodana kayihlo ayakukhothamela.

9UJuda umntwana webhubezi,

indodanami ifana nebhubezi elisuthiko:

Liyakhothama lizigedagede phasi,

akakho ongalinga ukulivusa!

10Intonga yobukhosi angeze yasuka kuJuda,

nentonga yombusi hlangana neenyawo zakhe,

bekulethwe isibiko kuye,

nezizwe zoke zitjengise ukumlalela.

11Ubophela udumbanakhe esidiribeni,

udumbanyanakhe epandeni ekhethekileko,

ahlanze isambatho sakhe ewayinini,

iphuraphurakhe eengazini zamadiribe.

12Amehlwakhe amnyama kunewayini,

amazinywakhe amhlophe kunebisi.

13“UZebuloni uzakuphila ngegwini lelwandle,

abe njengesebe leenthayamanzi;

imikhawulwakhe inabele ngeTsidoni.

14“U-Isakari uyikakha kadumbana,

ubhesa hlangana nemithwalo.

15Lokha nakabona ubuhle bendawo yokuphumula,

nobuhle benarha,

wehlisa ihlombe lakhe bonyana athwale

abe likhoboka lomsebenzi okatelelako.

16“UDani umela amalungelo wabantu bekhabo

angomunye wesizwe sakwa-Israyeli.

17UDani uyinyoka esendleleni,

ulirabi elisemzileni,

eliluma iinthende zenjomani

umkhweli wakhona abe aketuke.

18“Mina ngiqale isindiswakho Somnini.

19“UGadi usahlelwa siqhema semigulukudu,

kodwana yena ugijimisa isiqhemeso.

20“Ku-Atjheri kunokudla okunothileko,

uphakela iinkhanakhana ezilungele ikosi.

21“UNafitali umumuthi onabileko,

oveza iimpande ezihle.

22“UJosefa usidiribe esithelako,

isidiribe esithelako esiseduze nomthombo,

esineempande ezirarela umthangala.

23Abadumuzi ngomsebe bayamtlhorholoja,

bayamsahlela ngombana banevunda naye.

24Kodwana umsebakhe uhlala uqinile,

umkhonwakhe nezandla zakhe zimsinya,

ngombana usizwa ngongonamandla kaJakopo,

usizwa ngumelusi olidwala laka-Israyeli,

25iye, usizwa nguSabekako onguZimu kayihlo.

UZimu uyakwenyela abe akubusise

ngeembusiso zamazulu aphezulu,

iimbusiso zamanzi azikileko

neembusiso zamabele nesibeletho.

26Iimbusiso zakaZimu uyihlo zikulu

kuneembusiso zeentaba zekadeni,

kunezinto ongazifisa emibundwini yekadeni.

Inga zoke iimbusiswezi zingaba phezu kwehloko kaJosefa,

phezu kwepandla yekosana yabafowabo.

27“UBhenjamini uyipisi evithizako,

ekuseni urhiribidela ukudla kwakhe,

entambama wahlukanisa ipango.”

28Zoke lezi ziinkoro ezilitjhumi nambili zakwa-Israyeli begodu lokhu ngokwatjhiwo nguyisazo kizo lokha nazibusisako. Wanikela enye nenye isibusiso esiyifaneleko.

UJakopo uyahlongakala

29UJakopo wanikela amadodanakhe umyalo wathi: “Sele ngizokuhlongakala. Ningibulunge kibobamkhulu erholweni elisesimini ka-Efroni umRhithi.

30Ngitjho irholo lesimu yeMakaphela engepumalanga yeMamre eKanana, u-Abrahamu alithenga nesimu ku-Efroni umRhithi kobana kube yindawo yamathuna wasafuthi.

31Lapho, yindawo lapha kwabulungwa u-Abrahamu nomkakhe uSara, u-Isaka nomkakhe uRabega nabo babulungwa lapho. Nami ngabulunga uLeya lapho.

32Isimu kanye nerholo elilapho kwathengwa kumaRhithi.”

33Kuthe bona uJakopo aqede ukuyala amadodanakhe, wanabisela iinyawo zakhe embhedeni, wadosa ummoya kokugcina, wahlongakala.