AMARHUBO 37 - IsiNdebele 2012 Translation

USomnini usindisa olungileko

1Irhubo lakaDavida.

Ungathakasi ngabenzi bobumbi,

ungazikhathazi ngabangakalungi

2ngombana bazakutjhwaba msinyana njengotjani,

iye, babune njengeemila ezilihlaza.

3Nawethemba uSomnini,

wenze okulungileko,

khona-ke uzakuhlala enarheni,

wename unzinzile.

4Thaba kuSomnini,

uzakunikela iimfiso zehliziywakho.

5Nikela indlelakho kuSomnini, umethembe,

yena uzakwenzela okulandelako:

6Uzakwenza ukulunga kwakho kukhanye njengokusa

nobumsulwa bakho njengelanga emini.

7Thula phambi kwakaSomnini, uqalelele kuye;

ungathakasi ngophumelelako endlelenakhe,

iye, ngomuntu owenza okuphambeneko.

8Lisa ukuhluthuleka, utjhide elakeni,

ungathakasi ngabenzi bobumbi!

Lokho sekubanga ukona kwaphela.

9Abenzi bobumbi bazakususwa,

kodwana abarhuluphela uSomnini

bazakuzuza inarha.

10Kuzakuba muzuzwana

isikhohlakali singasabi khona

nalokha uhlola indawaso,

awusoze usasifunyana.

11Kodwana abathobekileko

bazakuzuza inarha,

bathabele ukuthula okukhulu.

12Isikhohlakali sisongela olungileko,

simgugudela amazinyo,

13kodwana uSomandla uyasihleka,

uyazi bonyana ilanga laso liyeza.

14Iinkhohlakali zirhwatjha isabula,

zigobe imisubazo,

kobana ziwise abachakileko nabadududu

bezirhayile abaneendlela eziqotho.

15Isabulazo izakuhlaba iinhliziyo zazo

nemisubi yazo iphohloke.

16Okuncani anakho olungileko,

kungcono kunomnono weenkhohlakali ezinengi.

17Mbala, imikhono yeenkhohlakali izakwephulwa,

kodwana uSomnini uyabasekela abalungileko.

18USomnini uyawazi amalanga walabo abamsulwa

nelifa labo lizakuhlala bekube nini nanini.

19Ngesikhathi sobunzima angeze badaniswa,

emalangeni wendlala bazakusutha,

20kodwana iinkhohlakali zizakubhubha;

izitha zakaSomnini zizakunyamalala njengobuhle bamadlelo

anyamalala entuthwini.

21Isikhohlakali siyaboleka, singasabuyiseli,

kodwana olungileko unesirhawu, uyaphana.

22Labo ababusiswe nguSomnini, bazakuzuza inarha,

kodwana abanikelelwe nguye, bazakujutjwa.

23Lokha uSomnini nathokoziswa yindlela yomuntu,

uqinisa amagadangwakhe.

24Nanyana akhutjhwa, akasoze awele phasi

ngombana uSomnini uhlala ambambe ngesandla sakhe.

25Gade ngimutjha, manje sengimdala,

nokho angizange ngibone olungileko atjhiyiwe

nesapho lakhe ligogela ukudla.

26Yena ungophanako nobolekisanako

nesapho lakhe lisibusiso kuye.

27Deda kokumbi, wenze okuhle

ukuze nini nanini uhlale enarhenakho.

28Ngambala uSomnini uthanda ukulunga,

akabatjhiyi abathembekileko bakhe.

Iye, abalungileko bazakulondolozwa isiphelani,

kodwana isapho leenkhohlakali lizakujutjwa.

29Abalungileko bazakuzuza inarha,

bahlale kiyo nini nanini.

30Umlomo wolungileko uveza ukuhlakanipha;

kuthi ilimu lakhe likhulume ukulunga.

31Umthetho kaZimakhe usehliziywenakhe

neenyawo zakhe azitjheleli.

32Isikhohlakali selusa olungileko

ngombana simsongele ukumbulala.

33USomnini akasoze aliselela olungileko

esandleni sesikhohlakali:

Angeze avume alahlwe

lokha nadoselwa ebandla.

34Rhuluphela uSomnini, ukhambe endlelenakhe,

yena uzakuphakamisa, uzuze inarha;

ubone ukususwa kweenkhohlakali.

35Ngisibonile isikhohlakali sinobudlova,

siziphakamisa njengomuthi wendabuko onamakari,

36kodwana nawudlulako godu,

qala, umuthi lowo awusekho;

nasifuna isikhohlakaleso,

akhange sisatholakala.

37Qalisisa omsulwa, ubeke ilihlo koqotho:

Kunelikusasa emuntwini onokuthula.

38Kodwana abaphambukileko

bazakubhujiswa ndawonye

nelikusasa leenkhohlakali lizakususwa.

39Ukusindiswa kwabalungileko kuvela kuSomnini,

isiphephelo sabo esikhathini sobunzima.

40USomnini uyabasiza abe abaphephise;

iye, ubaphephisa eenkhohlakalini;

ubasindisa ngombana baphephela kuye.