AMARHUBO 95 - IsiNdebele 2012 Translation

Ukumenyelwa ukulotjha uSomnini

1Yenize sihlokomele uSomnini;

iye, sihlokomalele iDwala lesindiswethu!

2Asitjhideleni phambi kwakhe ngokuthokoza,

simhlokomalele ngeengoma!

3Mbala, uSomnini unguZimu omkhulu

nombusi omkhulu ngaphezu kwabozinyana.

4Esandleni sakhe uphethe ukuzika kwephasi,

iinqongo zeentaba nazo zingezakhe.

5Ilwandle lingelakhe ngombana walenza

nezandla zakhe zabumba indawo eyomileko.

6Yizani simlotjhe simkhothamele,

siguqe phambi kwakaSomnini umenzethu!

7Mbala, yena unguZimethu,

thina sibabantu bedlelo lakhe

nomhlambi wesandla sakhe.

Namhlanje kwanga ningalalela iphimbo lakhe

ngombana wathi:

8“Ningaqinisi iinhliziyo zenu njengeMeriba

nanjengelangeni lelo eMasa, erhalawumbeni,

9lapha aboyihlomkhulu bangizizinya khona,

bangilinga nanyana besele babonile umsebenzami.

10Iminyaka ematjhumi amane

isizukulwaneso sangikghabhudlha.

Nje-ke ngathi,

‘Sibabantu abaphambene ngehliziyo,

neendlela zami asiziyeleli.’

11Ngalokho ngafunga elakeni lami ngathi,

‘Angeze bangene ekuphumuleni kwami.’ ”