U-ISAYA 5 - IsiNdebele 2012 Translation

UZimu uzakuhlunguphaza abantu bakhe

1Angivume ingoma esikhundleni somnganami,

iye, ingoma yomnganami ngesidiribe sakhe.

Umnganami gade anesidiribe

embundwini onothileko.

2Wawemba, wasusa woke amatje kiwo,

wawutjala isidiribe esikhethekileko.

Wakha isithala somlindi phakathi kwawo

bewagobhodlha ubutlhodlhelo edwaleni.

Walindela bona sihlome amadiribe

kodwana sahloma amunyu wommango.

3Nje-ke uSomnini uthi:

“Nina zakhamuzi zeJerusalema

nani bantu bakwaJuda,

gwebani hlangana nami nesidiribe sami.

4Yini-ke, okhunye ebengingakwenza

ngesidiribe sami

ukudlula lokho esele ngikwenzileko na?

Kubayini ngithi

lokha nangilindele bona sihlome amadiribe,

sona sihlome amunyu na?

5Nje-ke, ngizonitjela

bona ngizokwenzani ngesidiribe samesi:

Ngizokususa isibiyelo saso bona sidliwe;

ngigirize nomthangalaso bona sirathwe.

6Ngizosenza bona sibe libhudu,

singasahlungwa namkha sihlawulelwe,

kukhule iminga nameva;

ngizokuyala namafu

bona angasanisi izulu phezu kwaso.”

7Isidiribe sakaSomnini uMninimandlawoke

siyindlu ka-Israyeli,

nabantu bakwaJuda basitjalo sakhe esikhethekileko.

Walindela ubulungiswa,

kodwana qala, kwaba kukwephulwa komthetho

walindela ukulunga,

kodwana qala, kwaba sililo sesizi.

8Nizazizwa nina enithumba izindlu ngezindlu,

niphange isimu phezu kwamasimu

bekungasabi nendawo eseleko,

kusale nina nodwa phakathi nenarha.

9Ngimzwile uSomnini uMninimandlawoke afunga athi:

“Ngiqinisile izindlu ezinengi zizokuphenduka amarubhi,

kuthi ezikulu nezihle zisale zinganabantu.

10Mbala, emasimini alitjhumi wesidiribe

kuzakuphuma imigqomu emibili yewayini kwaphela

nembewini engangentundu eyodwa kadumbana

kuphume upumpana wamabele kwaphela.”

11Bazazizwa labo abavuka ngamasa,

bagelagele ngemva kotjwala;

bahlale bekube sebusuku,

bafuthunyezwe liwayini.

12Eminyanyenabo kukhona imihlobohlobo yamaharibha,

abosotjherere, iinghwani kanye newayini;

kodwana izenzo zakaSomnini abaziyeleli

nemisebenzi yezandla zakhe abayitjheji.

13Ngalokho abantu bami bazakuthunjwa

ngebanga lokutlhoga ilwazi lakaSomnini.

Abahloniphekako babo bazokufa yindlala

neenqubuthu zabo zizakuphaphatheka kukoma.

14Iye, indawo yabafileko

seyikhamise umlomayo

beyawukhebelelisa ngokunganeliko.

Abahloniphekako neenqubuthu zeJerusalema,

labo abenza itjhada lokuzikhakhazisa,

bazakwehlela kiyo.

15Ngaleyondlela abantu bazakuthotjiswa,

omunye nomunye wabo arhubutjhwe,

iye, amehlo wabazikhakhazisako athotjiswe.

16Kodwana uSomnini uMninimandlawoke

uzakuphakanyiswa ngomthethwakhe,

uZimu ocwengileko azibonakalise

ngokulunga kwakhe.

17Iimvana zizakudla emadlelwenazo,

izimvu ezinonisiweko zizidlele umathanda

hlangana namarubhi.

18Bazazizwa labo abazidosela isibetho

ngemitja yekohliso

nesono njengomuntu odosa ikoloyana ngentambo;

19iye, labo abathi: “UZimu akarhabe,

enze umsebenzakhe masinyana

bona siwubone;

ilisu loCwengileko wakwa-Israyeli alivele,

ukuze nathi silazi.”

20Bazazizwa labo abathi ukonakala kulunga,

ukulunga kukonakala,

abenza ukukhanya inga bumnyama,

ubumnyama inga kukhanya,

ukubaba inga bumnandi,

ubumnandi inga kubaba.

21Bazazizwa labo abahlakaniphileko emehlwenabo

nabazibona banokwazi ekuboneni kwabo.

22Bazazizwa labo abaziingwenya

zokusela iwayini

neenkutani zokudidiyela utjwala,

23labo abatjhaphulula onomlandu ngokufunjathiswa

bagodle ilungelo labalungileko.

24Ngebangelo-ke,

njengamalangabi womlilo naqothula amawunguwungu

nanjengotjani obomileko nabubabulwa malangabi,

ngokunjalo imirabhabo izakukhuna

namakhwa wabo aphephuke njengethuli;

ngombana badele umthetho kaSomnini uMinimandlawoke

banyaza amezwi woCwengileko wakwa-Israyeli.

25Nje-ke, ubukhali bakaSomnini buyavutha

ebantwini bakhe;

uzakuphakamisa isandla sakhe abarhadle phasi,

bekuhlengezele iintaba.

Iindumbu zabo zizakufana neenzibi eendledlaneni.

Nangaphezu kwakho koke lokhu

ubukhali bakhe abuzukusuka,

isandla sakhe sizakuhlala siphakamile:

26Uzakuphakamisela izizwe ezikude iphawu,

abethe ipembe, abize isizwe esisepelazwe,

size masinyana nangokurhaba.

27Akakho namunye kiso

odinwako namkha okhutjwako,

akakho oyendako namkha alale;

akunabhande elitjhaphulukako edinini

nepatlagwana elinomtjana odabukako.

28Imisubela yaso ibukhali nemisebaso yoke iqutjhiwe,

iinqatha zeenjomani zaso zikghwara njengelitje lomlilo,

amavili weenkaranyana zaso afana nesivunguvungu.

29Umdumaso unjengokubhodla kwebhubezi,

sirora njengamabhubezana,

sirhonga bese sibamba inyamazana,

siyithwale kusweleke nomenyeli.

30Mhlokho sizakurora ngaphezu kwayo

njengokubhodla kwelwandle.

Lokha umuntu naqala enarheni

abone ubumnyama namatlhuwo;

ukukhanya kuzakuphiphazwa mamafu.