UHOSIYA 9 - IsiNdebele 2012 Translation

Umphorofidi utjhumayela emnyanyeni wokuluma

1Ungathabi wena Israyeli!

Ungajekezeli njengezizwe ezinye

ngombana azange uthembeke kuZimakho:

Wakhamba unghatulela aboBhali,

uthabela abakupha khona eselelweni

esinye nesinye.

2Izelelo neentlhodlhelo zizakuba dududu,

kungabi newayini elitjha.

3Abantwaba abazukuhlala enarheni kaSomnini;

U-Efrayimu uzakubuyela eGibhide

nanyana adle ukudla okuzilwako e-Asiriya.

4Abantwaba abazokuletha amaqatheko kuSomnini

nemihlabelo yabo abazoyiletha kuye.

Koke ukudla kwabo kuzakuba ngokuzilwako

njengokudla okudliwa esililweni.

Lokho kuzakuba kukudla okusuthisa bona;

akuzukulethwa endlini kaSomnini.

5Nizobe nikuphi ngelanga leminyanya ezako,

ngelanga lemigidi kaSomnini na?

6Abazakuphunyurha ekurhayilweni,

iGibhide izababutha,

bangcwatjwe eMemfisi.

Umnothwabo wesiliva uzakuvalwa likhula,

ngeendlini kumile umtjhatjhana.

7Amalanga wokuhlunguphazwa afikile;

amalanga wokulungisa afikile!

U-Israyeli uzazizwela.

Umphorofidi uziphendulela ngokumangalelwa kwakhe babantu

Nithi: “Umphorofidi udlhayele,

umuntu kaZimu uyarhapha!”

Vele unjalo, wenziwa zizonokazi zenu

ezinengezi,

nobutha benu obesabekako!

8Ukuya ngentando kaZimu wesivumelwano

umphorofidi ulilihlo phezu kwaka-Efrayimu,

kodwana ubekelwe izifu ngandlela zoke

nendlini kaSomnini kunobutha;

9benzele umphorofidi umlindi ozikileko.

Njengemalangeni weGibeya

uSomnini uzobalalamela ngokukhohlakala kwabo

bese ubahlunguphaza ngebanga lezono zabo.

U-Efrayimu uzakutlhoga abalandeli

10USomnini uthi:

“Ngathabela ukufunyana u-Israyeli

njengomuntu ofunyana amadiribe erhalawumbeni.

Mhla ngithoma ukubona aboyihlomkhulu

ngaba njengomuntu othabela ukufunyana

uporwana wokuthoma wefeyi emthini.

Kodwana bona baya kuBhali wePeyori

bafese bazinameka entweni edanisako leyo;

banyenyeka njengentwabo abayithandako leyo.

11Idumo laka-Efrayimu linyelele,

lemuke njengenyoni;

kungabikhona ukubeletha, ukuzithwala nokubamba.

12Iye, nabantwana ababakhulisako

ngizobamuka bona kungasali ngitjho noyedwa.

Bazazizwa mhlana ngibafulathelako.

13“U-Efrayimu ngimbone anjengomuthi wesundu

otjalwe endaweni ehle.

Kodwana u-Efrayimu uzokukhuphela

abantwabakhe umbulali.”

14Somnini, baphe lokho

ofuna ukubapha khona:

Ubaphe isibeletho esirhululako,

ubaphe amabele anganamkghado.

15USomnini uthi:

“Boke ubukhohlakali babo

bathoma eGiligali.

Lapho-ke ngabalandula ngebanga lezenzo zabo.

Ngizobaqotjha endlinami, angisazobathanda.

Boke ababusi babo bamaphikakani.

16“U-Efrayimu umanyiwe,

ipandakhe ibunile;

akazukuhloma isithelo.

Nanyana abeletha,

ngizosibulala isizukulwana sakhe esithandekako.”

17UZimu wesivumelwano uzobafulathela

ngombana akhange bamlalele.

Bazoba bozulani hlangana nezizwe.