U-ISAYA 61 - IsiNdebele 2012 Translation

Umnyaka womusa

1UMoya kaSomnini uSomandla uphezu kwami,

ngombana ungizesile

ukuze ngitjhumayele iindaba ezihle kabadududu.

Ungithume kobana ngibophe abaneenhliziyo ezaphukileko,

ukumemezela ikululeko kabathunjiweko

nokukhupha iimbotjhwa,

2ngimemezele umnyaka womusa kaSomnini

nelanga lokuzibuyiselela kwakaZimethu,

ngiduduze boke abalilako,

3iye, ngibonelele abalilako eZiyoni

ngokubapha isihlohlo esikhundleni somlotha,

amafutha wokujabula esikhundleni sokulila

nengubo yokudumisa

esikhundleni sommoya odanileko.

Bazakubizwa bona bama-owuku wokulunga

nesitjalo sakaSomnini

ukuze babonakalise idumo lakhe.

4Bazakuvuselela amarubhi wakade,

bakhe kabutjha iindawo ezabhuruka ngaphambilini;

balungise amadorobho agirizwako,

iye, iindawo ezabhuruka

eenzukulwaneni ngeenzukulwana.

5Amaphandle azakuba ziinsebenzi zenu,

eluse imihlambenu;

imiqhamuka izakuba ziinsebenzi

emasimini neendiribeni zenu.

6Nina-ke nizakubizwa bona nibaphristi bakaSomnini,

nibizwe bona niziinceku zakaZimethu.

Nizazikholisa ngomnotho wezizwe,

nizikhakhazise ngomnonwazo.

7UZimu uthi:

“Esikhundleni sehlazo

abantu bami bazakufumana isabelo esibuyelelweko,

esikhundleni sokurhubutjhwa

bazakujekezela elifeni labo.

Mbala, bazakuzuza isabelo

esibuyelelweko enarhenabo,

babe netokozo engapheliko.

8Njengombana mina Somnini ngithanda ukulunga,

ngizonda ukudlelezela ngobukhohlakali;

ekwethembekeni kwami ngizabanikela okungokwabo.

Ngizakwenza nabo isivumelwano sanini nanini:

9Iinzukulwana zabo zizakwaziwa phakathi kwezizwe

nabantwababo phakathi kwabantu.

Boke abababonako bazakuvuma

bonyana basizukulwana esibusiswe nguSomnini.”

10Ngithokoza khulu kwamambala ngoSomnini,

umphefumulwami ujekezela kuZimami

ngombana ungembathise iingubo zesindiso,

wangigubuzesa ngesambatho sokulunga,

njengomyeni lokha nathwala ingwani ehloko

nanjengomlobokazi nazihlobise

ngobuphaziphazi bakhe.

11Njengombana iqulwani iveza amahlumela

nesivande senza bona imbewu imile,

ngokunjalo uSomnini uSomandla uzakwenza bona

ukulunga nedumo kuqhakaze phambi kwezizwe zoke.