U-ISAYA 34 - IsiNdebele 2012 Translation

Ukugwetjwa kwe-Edomu nezinye izizwe

1Tjhidelani nina zizwe, nizwe,

lalelani nina bantu!

Iphasi loke alizwe, nakho koke okukilo,

inarha, nakho koke okumila kiyo.

2USomnini uthukuthelele izizwe zoke,

ufuthekele loke ibutho lazo

uzithuwelelisile, wazinikela ekuhlatjweni.

3Ababuleweko bazo bazakulahlwa,

nesivunda seendumbu zabo sizakusabalala,

iintaba zithonte iingazi zabo.

4Woke umkhambathi womkayi uzakuncithika

nesibhakabhaka sisongwe njengomsongo.

Iye, woke umkhambathi wakhona uzakukokorana,

njengekari elitjhwaba esidiribeni,

namkha isithelo esikhuna emkhiwaneni.

5USomnini wathi:

“Isabulami nayibonakala esibhakabhakeni,

qala, izakwehlela phezu kwaka-Edomu,

iye, phezu kwabantu

engibabekele isigwebo sokubhujiswa.”

6USomnini unesabula ekghamathele umhlwehlwe;

iye, iphopha iingazi zeemvana,

zeembuzi nezamaqama

ngombana uSomnini wenze umhlabelo eBotsira,

kwaba kuhlaba okukhulu enarheni yakwa-Edomu.

7Iinyathi zizakuwa nazo

neenkunzi zizakuwa kanye nezinamandla.

Inarha yama-Edomu izakugeleza iingazi

nequlwanayo ivundiswe ngomhlwehlwe.

8USomnini unelanga lokusibona umlandu,

iye, umnyaka wokubuyiselela endabeni yeZiyoni.

9Imilanjana yakwa-Edomu izakuba sikontiri,

iqulwani yakhona ibe sibabuli;

iye, nenarha ibe sikontiri esivuthako.

10Asizukucima ubusuku nemini,

intuthwaso izakhuphuka mndundu.

Iinzukulwana ngeenzukulwana

inarha leyo izakuba libhudu;

akunamuntu ozakudabula kiyo nini nanini.

11Izakuba lilifa lemihlobohlobo yeenrhulurhulu

namagubulu ahlale kiyo.

USomnini uzakwelula phezu kwe-Edomu,

intambo yesilinganiso sehlangahlangano,

namatje wesibekiso sokubhujiswa.

12Nakubabusi be-Edomu,

akunalitho labo elizakusala lapho

abangalibiza bona mbuso;

iinkhulu zakhona zizakupheliswa.

13Ameva azakumila eensikeni zayo,

ikhula nemitjhatjhana kuzakumumela iimphephelo.

Izakuba lidzaba labophagana

nobudlelo beenciliba.

14Iimpaka zizakuhlangana neempisi

neembandana ezisambuzi zizakubetha umkhulungwana.

Imimoya emimbi yobusuku izigedle lapho,

ifunyane indawo yokuzipholela.

15Lapho umhlobo wenyoka

uzakuba nesikhundla, uzalele;

amadzinyanawo aqoqosele emthunzinawo.

Ngambala lapho kuzakubuthana abokholo,

kube ngiloyo naloyo anomnganyanakhe.

16(Funani benifunde encwadini kaSomnini: Iimbandanezo zitlolwe lapho begodu zikhamba ngambili. Mbala, kwayala umlomo kaSomnini nommoyakhe wazihlanganisa.

17USomnini nguye oziphosele ifumbe,

isandla sakhe sazabela ngentambo yesilinganiso,

nje-ke zizakuhlala ziyizuzile nini nanini,

iinzukulwana ngeenzukulwana zizakuhlala kiyo.)