IZAGA 8 - IsiNdebele 2012 Translation

Ukumema kokuhlakanipha

1Ukuhlakanipha akubizi na?

Ukuzwisisa akurhuweleli na?

2Kujame embundwini

hlanu kwendlela,

lapha kuhlangana khona imizila,

3kurhuwelela eqadi kwamatatawu ngedorobheni

ebungenweni bamasango kuhlokoma kuthi:

4“Ngiyanibiza nina madoda,

ngirhuwelela boke abantu!

5Nina eninganalwazi, zuzani ilemuko!

Nina enidlhayeleko, zuzani ukuzwisisa!

6Lalelani ngombana nginezinto ezinetlha,

iimbhena zami zikhuluma okufaneleko.

7Umlomami umemezela okuliqiniso,

ubukhohlakali busikghabhudlho eembheneni zami.

8Woke amezwi womlomami alungile,

alikho nalinye lawo eligwegwesileko

namkha elonakeleko.

9Woke anqophile kozwisisako

begodu alungile kabafumana ilwazi.

10Khethani ukusola kwami kunesiliva,

nirhuluphele ilwazi kunegolidembala,

11ngombana ukuhlakanipha kuhle kunamaparele,

mbala akunalitho olifisako elingafana nakho.

12“Mina, unokuhlakanipha ngiphila nelemuko;

ngihlanganyela nelwazi lengqondo ehle.

13Ukwesaba uSomnini kukuzonda ubumbi,

Ngizonda ukuzitjhaya nokuziphakamisa

kanye nekulumo ephambeneko.

14Kimi kunokweluleka nepumelelo;

mina nginokuzwisisa, nginamandla.

15Ngami amakhosi ayabusa

nababusi benza imithetho elungileko.

16Iinkhulu nabosaziwako babusa ngami,

iye, boke abaphatha ngokulungileko.

17Ngithanda labo abangithandako,

abangifunako bayangifunyana.

18Kimi kunobunjinga nedumo,

umnotho othandwako nepumelelo.

19Isithelo sami singcono kunegolide,

ngitjho negolidembala

nomkhiqizwami ungcono kunesiliva ekhethekileko.

20Ngikhamba emizileni yokulunga,

phakathi kweendlela zobulungiswa,

21ukuze ngiphe abangithandako umnotho

kube lilifa labo,

ngizalise iinlulu zabo.”

22“USomnini ungidale ekuthomeni kwendalwakhe,

ngaphambi kwemisebenzakhe yendulo.

23Ngabunjwa mandulondulo,

ekuthomeni, ngaphambi komlando womhlaba.

24Ngabelethwa amanzi amanengi angakabiphi,

kungakabiphi nemithombo ephuphuma amanzi;

25ngaphambi kobana iintaba zinzinziswe,

iye, ngaphambi kobana kube nemibundu,

26ngaphambi kobana adale ihlabathi nemimango,

ngitjho namathomo weentuli zephasi.

27Ngasele ngikhona lokha uZimu najamisa amazulu,

lokha nathala umthala phezu kobuso bamalwandle;

28nasungula isibhakabhaka phezulu,

abeka imikhawulo yeeyalu zamanzi amanengi;

29nanikela amalwandle amaphethelwawo

ukuze amanzi angeqi umyalwakhe.

Lokha nathala iinsekelo zephasi

30bengiseqadi kwakhe ngingusosino,

ngimthabela imihla ngemihla,

ngihlala ngijabulile phambi kwakhe,

31ngijabulile ngelizwe lephasi lakhe,

ngithabele abantu.

32“Nje-ke, madodana, yeningilalele;

ngithi babusisiwe abalonda iindlela zami.

33Lalelani ukusola kwami.

Nakube nihlakaniphile, angeze nakudela.

34Ubusisiwe umuntu ongilalelako,

oqapha eminyangwenami imihla ngemihla

alinde emathurini wamasangwami.

35Ofumana mina ufumene ipilo

begodu uzuza umusa kuSomnini.

36Kodwana ohlulwa kungifumana

uzilimaza yena ngokwakhe,

boke abangizondako bathanda ukufa!”