U-ISAYA 63 - IsiNdebele 2012 Translation

Ilanga lakaZimu lokubuyiselela

1Ngubani lo ovela e-Edomu,

iye, eBhotsira onezambatho ezitlerebede na?

Ngubani lo ohlobe ngeziphazimako,

ohlabela phambili ngamandla amakhulu na?

“Ngimi engikhuluma ngokulunga,

nenginamandla wokusindisa.”

2Kubayini izambatho zakho zibomvu

njengezomuntu ogadange

ngebutlhodlhelweni besidiribe na?

3“Ngigadange ngebutlhodlhelweni ngingedwa,

phakathi kwezizwe akakho noyedwa ogade anami.

Ngazigadanga ngetukuthelwami,

ngazitshidlha ngokufutheka kwami,

umhluzi wazo wachaphazela izambatho zami,

yeke zoke izambatho zami zinindekile.

4Ilanga lokubuyiselela belisehliziywenami

nomnyaka wokuhlenga kwami sewufikile.

5Ngaqala, kodwana bekungekho umenyeli,

ngamangala, kodwana akakho owangisekelako.

Yeke ingalwami yaba yisindiswami

netukuthelwami yangisekela.

6Ngapitliza abantu ngetukuthelwami,

ngokufutheka kwami ngabaqoba,

ngathululela iingazi zabo phasi.”

Ukuzibika nomthandazo wokuvikela

7Ngizakwazisa izenzo zokwethembeka kwakaSomnini,

iye, izenzo adunyiswa ngazo,

ukuya ngakho koke uSomnini asenzele khona.

Kwamambala wenze izinto ezinengi ezihle ekumbeni ka-Israyeli,

ukuya ngokuvama kokwethembeka kwakhe.

8Wathi: “Ngambala bababantu bami,

babantwana abangeze baba mahlongandlebe.”

Ngalokho waba msindisabo.

9Kiwo woke amatshwenyekwabo naye watshwenyeka,

ngalokho, ingilozi yobukhona bakhe yabasindisa.

Yena ngokwakhe wabahlenga ngethando nangezwelo,

wabenyula bewabathwala yoke imihla yaphambilini.

10Kodwana bona bahlubuka

bebakhubekisa uMoyakhe oCwengileko.

Yena-ke waphenduka isitha sabo,

yena ngokwakhe walwa nabo.

11Nje-ke, abantu bakhe bakhumbula

imihla yaphambilini, imihla kaMosi, bathi:

“Uphi yena owabahlenga elwandle

kanye nabelusi bomhlambakhe na?

Uphi yena owabeka uMoyakhe oCwengileko

phakathi kwabo,

12wathumela ingalwakhe edumileko

kobana ibe ngesigomeni sakaMosi,

owahlukanisa amanzi phambi kwabo

kobana azenzele ibizo lanini nanini

13nowabadabulisa ekuzikeni na?

“Njengenjomani enarheni evulekileko

azange bakhutjwe

14nanjengesilwana esehlela emrhobeni,

lapha uMoya kaSomnini usiphumuza khona,

ngokunjalo warhola abantu bakho Somnini,

kobana uzenzele ibizo elidumileko.

15Yehlisa amehlwakho usezulwini,

ubone usendawenakho ecwengileko nenedumo.

Iphi itjisakalwakho namandlakho na?

Isirhawu sakho nomusakho kugodliwe kithi.

16Ngambala ungubabethu!

U-Abrahama akasazi,

no-Israyeli bekangeze asilemuke,

Somnini, wena ungubabethu;

kwakade ibizo lakho unguMhlengethu.

17Somnini, usidurhiselani eendleleni zakho,

uqinise iinhliziyo zethu kobana zingakwesabi na?

Buya ngenca yeenceku zakho,

iinkoro zelifa lakho.

18Abantu bakho abakhethekileko

bazuze ilifa lakho kwesikhatjhana,

kodwana izitha zethu

zigadangele phasi indawakho ecwengileko.

19Sifana nabantu ongazange khewubabuse,

iye, abangazange babizwe ngebizo lakho.”