UMATEWU 4 - IsiNdebele 2012 Translation

Ukulingwa kwakaJesu(Mk 1:12-13; Lk 4:1-13)

1Yeke uMoya wadosela uJesu erhalawumbeni bona ayokulingwa nguSathana.

2Ngemva kobana azile ukudla amalanga amatjhumi amane nobusuku bakhona, walamba.

3Yeke umlingi weza kuye wathi: “Nangabe uyiNdodana kaZimu, tjela amatje la bona aphenduke isikwa.”

4Kodwana uJesu waphendula wathi: “Kutloliwe kwathiwa,

“ ‘Umuntu akaphili ngesikwa kwaphela

kodwana ngelinye nelinye ilizwi

eliphuma emlonyeni kaZimu.’ ”

5Yeke uSathana wathatha uJesu wamusa edorobheni elicwengileko, wamjamisa esiqongolweni sethempeli;

6wathi kuye: “Nangabe uyiNdodana kaZimu, ziphosele phasi ngombana kutloliwe kwathiwa,

“ ‘UZimu uzakuyala iingilozi zakhe ngawe;

zizakukhakhuna ngezandla zazo,

ukuze iinyawo zakho zingabetheki ematjeni.’ ”

7UJesu waphendula wathi: “Godu kutloliwe kwathiwa, ‘Ungamlingi uSomnini uZimakho.’ ”

8Godu uSathana wathatha uJesu wamusa esiqongolweni sentaba, wamkhombisa yoke imibuso yephasi nobuphaziphazi bayo,

9wathi kuye: “Koke lokhu ngizakunikela khona, nange ungaguqa ungilotjhe.”

10Yeke uJesu waphendula wathi: “Suka, Sathana ngombana kutloliwe kwathiwa,

“ ‘Lotjha uSomnini uZimakho

ukhothamele yena kwaphela.’ ”

11Nje-ke uSathana wamsukela; iingilozi zeza zamsiza.

UJesu uthoma ukutjhumayela(Mk 1:14-15; Lk 4:14-15)

12Kwathi bonyana uJesu ezwe bona uJwanisi ufakwe ngesikhungweni, wabuyela eGalile.

13Wasuka eNazaretha, wayokuhlala eKapernawumi, emzini ohlanu kwelwandle leGalile, enarheni yakwaZabuloni neyakwaNafitali.

14Lokhu kwenzeka khona kuzakuzaliseka okwakhulunywa mphorofidi u-Isaya nasithi:

15“Narha yakwaZabuloni,

nawe narha yakwaNaftali,

endleleni eya elwandle,

ngaphetjheya kweJordani,

Galile labatjhili!

16Abantu abahlezi ebumnyameni

babone umkhanyo omkhulu,

nakilabo abahlezi enarheni yethunzi lokufa

ukukhanya kufikile.”

17Ukusuka ngesikhatheso, uJesu wathoma ukutjhumayela wathi: “Phendukani ngombana umbuso wezulu ubandamele!”

Ukubizwa kwabafundi bokuthoma(Mk 1:16-20; Lk 5:1-11)

18Kwathi uJesu asakhamba eqadi kwelwandle leGalile, wabona izelamani ezimbili, uSimoni ebekuthiwa nguPitrosi nomfowabo u-Andrisi. Begade baphosela inede ngelwandle ngombana gade bababambi beenhlambi.

19Yeke uJesu wathi kibo: “Yizani, ngilandelani! Ngizanenza ababambi babantu.”

20Khonokho basukela amanedabo bamlandela.

21Wakhamba godu wabona izelamani ezinye ezimbili, uJakopo umsa kaZebediya nomfowabo uJwanisi. Bebangemkhunjini noyise uZebediya, balungisa amanedabo. UJesu wababiza,

22khonokho basukela umkhumbi noyise, bamlandela.

UJesu upholisa abagulako(Lk 6:17-19)

23UJesu wadabula iGalile, afundisa ngemasinagogini, atjhumayela ivangeli lombuso, apholisa ebebaphethwe malwelwe ahlukeneko kanye nezifo.

24Iindaba ngaye zanda kiyo yoke iSiriya, abantu baletha kuye boke ebebagula; baphethwe malwelwe amanengi ahlukeneko nobuhlungu: abantu abanamadimoni, isithunthwana nabakhubazekileko. Boke uJesu wabapholisa.

25Iinqubuthu ezikulu zamlandela zisuka eGalile eDekapolisi, eJerusalema, eJudiya nenarheni engaphetjheya kweJordani.