IZAGA 13 - IsiNdebele 2012 Translation

1Umntwana ohlakaniphileko

uyamukela uyise namsolako,

kodwana isideleli asilaleli nasikhalinywako.

2Eenthelweni zomlomakhe umuntu uzuza okuhle,

kodwana amaqili omela inturhu.

3Olonda umlomakhe ulonda ipilwakhe;

okhulumela butjhilweni uyonakala.

4Umphimbo wevila uyakhaluza,

kodwana awuzuzi;

wabakhutheleko uyaneliswa.

5Olungileko uyalizonda ilizwi lekohliso,

kodwana okhohlakeleko uletha iinhloni nehlazo.

6Ukulunga kuyamlondoloza omsulwa,

kodwana isiphambeko sihlakaza isoni.

7Kunomuntu ozenza injinga anganalitho;

omunye azenze isichaka anjingile.

8Umnono womuntu ungaba yihlawulo yepilwakhe,

kodwana isichaka asethuseleki.

9Umkhanyo wabalungileko udarhile,

kodwana isibani seenkhohlakali siyacima.

10Ngokuzikhukhumeza, onganahloko ubanga ukucabana;

kodwana ukuhlakanipha kuhlala nabamukela izeluleko.

11Umnono ozuzwa ngokuphanga uyaphela,

kodwana obuthelelwa kancani kancani uyanda.

12Ithemba eliriyadiswako ligulisa ihliziyo;

isifiso esiphumeleliswako simumuthi wokuphila.

13Onyefula umyalo kuzakuba kumbi ngaye,

kodwana owuhloniphako yena, uyavuzwa.

14Ifundiso yohlakaniphileko imthombo wokuphila,

ibuyisa umuntu ezifwini zokufa.

15Ukuzwisisa okuhle kuveza umusa,

kodwana indlela yamaqili iyihlekelele.

16Woke ovuthiweko wenza izinto ngelwazi,

kodwana isidlhadlha sizembula ubudlhadlha.

17Isithunywa esikhohlakeleko siwela engozini,

kodwana esithembekileko siletha ukuphila.

18Odela ukusolwa wehlelwa buchaka nehlazo,

kodwana oyelela ukukhalinywa uyahlonitjhwa.

19Isifiso esiphumelelisiweko simnandi emphefumulweni,

kodwana ukudeda kokumbi

kusikghabhudlho kwabaziindlhadlha.

20Okhambisana nabahlakaniphileko naye uyahlakanipha,

kodwana odlhemadlhema neendlhadlha uyahlupheka.

21Ilitjhwa lilandelela izoni,

kodwana abalungileko bavuzwa ngokuhle.

22Olungileko utjhiyela iinzukulwana zakhe ilifa,

kodwana umnono wesoni ubekelwa olungileko.

23Isimu etlayiweko yeenhloko zemindeni

ingakhiqiza ukugoma okunengi,

kodwana ukudlokho kungathathwa ngokungakafaneli.

24Obabalela iswazi uzonda umntwanakhe,

kodwana omthandako ukhuthalela ukumkhalima.

25Olungileko ugoma abe aneliseke,

kodwana izisu zeenkhohlakali ziyaswela.