AMARHUBO 65 - IsiNdebele 2012 Translation

UZimu uyabonelela

1Kumkhaleli; irhubo lakaDavida; ingoma.

2Zimu, nguwe ofanele ukudunyiswa eZiyoni!

Kuwe kufuze kuzaliswe iimfungo,

3iye, kuwe ozwa imithandazo.

Abantu boke beza kuwe

4neendaba zamacalabo.

Lokha iimphambeko zethu nazisidizibezako,

nguwe osithethelelako.

5Ubusisiwe omenyulako wena,

omtjhideza kobana ahlale eenrhodlweni zakho.

Sanelisekile ngobuhle bendlwakho,

iye, ngokucwengeka kwethempeli lakho.

6Usiphendule ngokulunga nangezinto ezethusako,

wena Zimu wesindiswethu!

Ulithemba lemikhawulo yoke yephasi

nelamajukujuku welwandle.

7Ngamandlakho wanzinzisa iintaba,

wena uvunule amandla,

8uthulisa ukurhuba kwamalwandle,

ukuhlokoma kwamagagasawo

netjhada lezizwe.

9Labo abahlala epelazwe

bayathuthumela ngeembonakaliso zakho;

wena ubangela ukumangala,

ukusuka epumalanga ukuya etjingalanga.

10Uthekela iphasi bewulithelelele,

ulivundisa khulu;

mbala, isiziba sakaZimu sizele amanzi,

abantu ubabonelela ngamabele,

iye, ngendlela leyo uyababonelela:

11Uzalisa imisele yamasimu ngamanzi,

ulalisa amasoyawo;

uyithambisa ngomvimbi,

ubusise iintjalo zakhona.

12Uhlobisa umnyaka ngobuhle bakho,

lapha ukhambe khona kuncithika umnono.

13Amadlelo werhalawumba ayaphuphuma,

imibundu izivunulise ukuthakasa.

14Imirhula izembathise imihlambi;

imirhoba izisibekele ngamabele,

iyavuma, ihlabe umkhosi wokwesasa.