UJOBHO 31 - IsiNdebele 2012 Translation

1Ngenze isivumelwano namehlwami,

kobana ngingaqali itlawu ngokulikhanukela.

2Siyini isabelo somuntu kuZimu ongaphezulu,

ilifa alifumana koSabekako ekuphakameni na?

3Lokho kuyihlekelele yokhohlakeleko,

nelitjhwa kabenza okuphambeneko.

4Ingabe uZimu akaboni iindlela zami,

abe abale woke amagadangwami na?

5Ngiyafunga bona

akhange ngikhambe magwegwe,

namkha inyawo lami lirhabele ikohliso!

6Nakube uZimu ungibeke esilinganisweni seqiniso,

uzakubona ubuqotho bami.

7Ngiyafunga bona

amagadangwami akhange aphambuke endleleni,

ihliziywami akhange ilandele amehlwami

nezandla zami akhange zichaphazelwe yisila.

8Nakungasinjalo,

engikutjalileko akugonywe ngabanye,

iye, basiphule ngitjho nesivuno sami.

9Ngiyafunga bona

ihliziywami akhange iyengwe mfazi,

akhange nginanabele umkamakhelwanami.

10Nakungasinjalo,

umkami akasilele omunye,

angenwe nanyana ngiyiphi indoda.

11Ngambala ukuyengwa mfazokho,

bekuzakuba lihlazo lakohlazo,

kube sisono sokwahlulelwa;

12iye, kube mlilo ongatjhisa ubulale,

kungibize isivuno sami soke!

13Ngiyafunga bona

akhange ngilahle indaba yekhoboka

neyekhobokakazi lami,

lokha nanghonghoyila kimi.

14Bengizokwenza njani

lokha uZimu nasikima ngokujamelana nami na?

Bengizokuphendula ngithini nagade angiphenya?

15Owangibumba esibelethweni,

nguye owabumba nekhoboka.

Nguye yedwa owasidala esiswini.

16Ngiyafunga bona

azange ngigodle iinrhuluphelo zabadududu,

namkha ngifiphaze amehlo womhlolokazi.

17Godu azange ngigome isikwa sami ngedwa,

kodwana nentandani yaba nesabelo kiso,

18ngombana ukusukela ebutjheni bami

uZimu wangiphatha njengobaba,

iye, wangihlahla ukusukela esibelethweni sakamma.

19Ngiyafunga bona

akhange ngithi nangibona uzulani aswela izambatho

namkha otlhagileko akhamba hlubule, ngimlise.

20Imizimbabo beyithokoza ngami,

nasele ifuthumele ngoboya bezimvu zami.

21Ngiyafunga bona

akhange ngikhombe omsulwa ngeguduva,

lokha nangizibona nginabasekeli ebandla.

22Nakungasinjalo,

isiphanga sami asiwohloke ehlombe lami,

umkhonwami ukhwamuke esiphangeni.

23Ngambala, benginevalo ngehlekelele evela kuZimu;

bengingeze ngakwazi ukujamelana nephazimulwakhe!

24Ngiyafunga bona

akhange ngibeke ithemba lami egolideni,

namkha ngathi egolidenimbala,

‘Wena usibambelelo sami’.

25Akhange ngename ngomnonwami ongangobaba,

namkha ngamandla wenzuzo yawo.

26Ngiyafunga bona

akhange ngiqale ilanga ekukhanyeni kwalo,

namkha inyezi nayikhamba ekuphazimuleni kwayo.

27Godu ihliziywami akhange iyengeke buntumba,

namkha ngincwange isandla sami.

28Ngambala lokho bekuzakuba sisono ekumele sahlulelwe,

bengizabe ngingakathembeki kuZimu ophezulu.

29Ngiyafunga bona

akhange ngithabele ihlekelele eyehlela ongizondako,

namkha ngibukise ngobumbi obumehleleko.

30Akhange ngivumele umlomami bona wone,

ngokumhlolozela ngamanikelela wokufa.

31Ngiyaqinisa bona

amalunga womzami gade ahlala asithi,

‘Ngubani ongazange azisuthise etafuleni lakaJobho na?’

32Ngambala akunasikhonzi esakhe salala ebaleni,

iminyangwami beyihlala ivulekele isikhambi.

33Ngiyafunga bona,

nanyana ngimumuntu wenyama,

akhange ngisibekele isono sami.

Azange ngifihle umlandwami esifubeni,

34ngebanga lokwesaba isiqubuthu.

Akhange ngesabe kobana imindeni izangirhubutjha

bese ngathula, ngangaphumela tjhatjhalazi.

35“Ngiphetha ikulumami ngokutlikitla!

Inga uZimu angangizwa,

oSabekako angiphendule!

Kwanga ongimangalelako angatlola phasi indabakhe!

36Ngiyafunga bona

lokho ngizakutjatha emahlombe,

ngikuthwale njengesihlohlo.

37Ngizamnikela imininingwana yelinye nelinye igadango lami,

njengalokha bengizakunikela umgwebi

ngokunjalo ngizamnikela yona.

38Ngiyafunga bona

amasimami azange akhe angimangalele,

imisedlanayo akhange ilile phambi kwakaZimu.

39Iye, akhange ngigome iinthelo zawo simahla,

azange ngibangele

bona iinsebenzi zawo zidose nzima.

40Nakungasinjalo,

akumile ameva esikhundleni sekoroyi,

kumile ikhula esikhundleni sebhali.”

Aphelela lapha-ke amezwi kaJobho.