U-ISAYA 51 - IsiNdebele 2012 Translation

Ukulunga kwakaZimu

1Ngilalelani nina enilandela ukulunga,

iye, nina enifuna uSomnini:

Rhuluphelani idwala enakghephulwa kilo

nekwari enakhutjhwa kilo;

2iye, rhuluphelani uyihlo u-Abrahama,

nonyoko uSara owanibelethako:

Bekamunye lokha nangimbizako

kobana ngimbusise bengimandise.

3Ngambala, uSomnini uzakuba nesirhawu ngeZiyoni

nangawo woke amarubhayo:

Uzakwenza amarhalawumbayo afane ne-Edeni,

amabhudwayo abe njengesivande sakaSomnini.

Ithabo nenjabulo kuzakubuzwa kiyo,

kube nokuthokoza nokubhina.

4USomnini uthi:

“Ngilalelani bantu bami,

yeningizwe nina sizwe sami:

Kimi kuzokuphuma ifundiso

ngibeke isigwebo sami

sibe mkhanyo ezizweni.

5Kuseduze ukufika kwehlalohle yami,

isindiswami isendleleni

nengalwami izakugweba izizwe.

Iinhlengele ziqalelela kimi,

zilindele ingalwami ngethemba.

6Phakamiselani amehlwenu emazulwini,

nirhuluphele iphasi phasi:

Amazulu anganyelela njengentuthu,

iphasi libhabhuke njengesambatho

ngokufanako nabahlali balo bangafa,

kodwana isindiswami izakujama isiphelani,

ihlalohle yami angeze yabhujiswa.

7“Ngilalelani nina enaziko

bonyana yini okulungileko,

nina bantu eninefundiswami

eenhliziyweni zenu:

Ningesabi isithuko sababhubhako

ningapheli amandla ngokuninyaza kwabo,

8ngombana umvunya uzobathuthudlha njengesambatho,

itshwele ibaqothule njengoboya.

Kodwana ihlalohle yami izakujama isiphelani

nesindiswami ibe khona

iinzukulwana ngeenzukulwana.”

Umthandazo wabantu bakaSomnini

9Vuka, vuka!

Zembathise amandla, wena ngalo kaSomnini!

Vuka njengemalangeni wakade,

iye, njengeenzukulwaneni zekadeni.

Kanti akusuwe wena ngalo kaSomnini

owarhabelela uRahabu,

wahlaba unomrhasokazi loyo na?

10Kwakungasuwe owomisa ilwandle,

iye, amanzi amanengi azikileko,

owenza indlela ekuzikeni kwelwandle

kobana abahlawulelweko bakwazi ukweyama na?

11Kwanga abahlengiweko bakaSomnini bangabuya

bafike eZiyoni ngokuhlokoma,

bathwele ithabo elingapheliko:

Bazuze ithabo nenjabulo,

isizi nokububula kubaleke.

12USomnini uphendula uthi:

“Mina lo, ngimi oniduduzako.

Alo, wena Ziyoni

umesabani umuntu obhubhako,

iye, umuntu nje ophela njengotjani na?

13Sewukhohlwe uSomnini owakubumbako,

owaqhisa amazulu wabeka neensekelo zephasi na?

Kubayini uhlala wesaba imihla ngemihla

ngebanga lobukhali bomgandeleli

lokha nanqopha ukurhayila na?

Buphi ubukhali bomgandeleli na?

14Iimbotjhwa zizakuthukululwa msinyana,

angeze zafela ngesikhungweni,

godu angeze zalamba.

15Mina Somnini nginguZimakho

ophehla ilwandle

kobana amagagasalo abhodle,

obizwa ngoSomnini uMninimandlawoke.

16Ngikufunza amezwami

ngikugubuzese ngesithunzi sesandla sami,

iye, mina owanzinzisa amazulu,

ngabeka neensekelo zephasi

begodu nothi eZiyoni, ‘Nibabantu bami.’ ”

Ukuhlunguphazwa kweJerusalema kuphelile

17Phaphama, phaphama, wena Jerusalema!

Sikima, wena osele ikapho yobukhali bakaSomnini

esandleni sakhe,

wena ominyelela nehlama yesiqoko

esitherezelisa abantu.

18Akakho noyedwa orhola iJerusalema

phakathi kwabo boke abantwana ebabelethileko.

Akakho noyedwa oyidosa ngesandla

phakathi kwabo boke abantwana ebakhulisileko.

19Wehlelwa matlhuwo abuyelelweko.

Ngubani ozakuzwela ubuhlungu na?

Wabhujiswa, wagirizwa,

abahlali bakho babulawa yindlala,

barhayilwa yisabula.

Ngubani ozakududuza na?

20Abantabakho batsirimezeka,

barabhalala emajikeni wazo zoke iindledlana,

kwanga yinyamazana ebanjwe enedeni,

bagubuzeswa bukhali bakaSomnini

nokukhalima kwakaZimakho.

21Ngalokho yizwani lokhu,

nina enithotjiswe benadakwa,

kodwana kungasi ngewayini.

22Nakhu okutjhiwo nguSomnini

uSomandla onguZimakho

olwela abantu bakhe, uthi:

“Qala, ngithethe ikapho enitherezelisako

esandleni sakho, Jerusalema.

Angeze bewusasela isiqoko sobukhali bami.

23Nje-ke ngibeke esandleni sabakuhlunguphazako

abathi kuwe, ‘Bhambalala

ukuze siqaqade phezu kwakho.’

Wenza umhlanakho inga yihlabathi,

iye, waba yindledlana yabadlulako.”