U-ISAYA 66 - IsiNdebele 2012 Translation

Isigwebo nethemba lengomuso

1Nakhu okutjhiwo nguSomnini:

“Izulu sihlalo sami sobukhosi,

iphasi lisinabelo seenyawo zami.

Alo, yikumba bani-ke enizangakhela yona,

indawami yokuphumula ibe yini?

2Koke lokhu kwenziwe sisandla sami,

nje-ke zoke izintwezi zenzeka.”

Watjho njalo-ke uSomnini.

“Nokho ngiyelela onje:

umuntu ogandelelweko,

onommoya ozothileko

nowesaba ilizwi lami.

3Kodwana ongihlabela ikomo

ubulala nomuntu,

owenza umhlabelo ngemvana

wephula nenja intamo,

oletha umnikelo weenthoro

unikela ngeengazi zewotji,

otjhisa isabelo sesikhumbuzo setjhwalo

udumisa nosingazimu!

Kunjalo-nje bazikhethele iindlela zabo

nomphefumulwabo uthokozela iinyenyiso;

4ngokunjalo nami ngizakukhetha

ukubaphatha kumbi,

ngehlisele ihlekelele phezu kwabo,

ngebanga lokobana nangibizako,

azange kube nophendulako,

nangikhulumako, azange balalele,

kodwana benza ubumbi emehlwenami,

bakhetha lokho engingathokoziko ngakho.”

5Nina enesaba ilizwi lakaSomnini,

lalelani ilizwi lakhe elithi:

“Abafowenu abanizondako,

baninine ngebanga lebizo lami,

banitshima bathi,

‘USomnini akavele ngephazimulwakhe

ukuze sibone ithabo lenu’,

kodwana ngibo abazakurhubutjhwa.”

6Yizwani umkhosi wokuhlokoma

ovela ngedorobheni!

Ilizwi elivela ethempelini!

Ilizwi lakaSomnini,

libuyiselela izitha zakhe!

7“Ngaphambi kobana ibe nemirhele,

iZiyoni yabeletha,

ngaphambi kobana yehlelwe ziinhlungu,

yazala indodana.

8Ngubani owakhe wezwa into enjalo?

Ngubani owakhe wabona into enjalo?

Inarha ingazalwa ngalanga linye na?

Isizwe singabelethwa ngasikhathi sinye na?

Kuthe bona iZiyoni ibe nemirhele,

yazala amadodanayo.

9Ngizakutjhideza bonyana kuzalwe,

kodwana ngingakuzalisi na?”

Watjho njalo uSomnini.

“Mina engenza bonyana kuzale,

ngingavala isibeletho na?”

Watjho njalo uZimakho, Ziyoni.

10Jekezelani neJerusalema, nilithabele

noke nina enilithandako,

lithokoziseni khulu

noke nina enilila nalo,

11kobana nimunye nizikholise

emabelenalo adunduzelako,

nokobana nincance nizanelise

emabelenalo agcweleko.

12Ngambala, nakhu okutjhiwo nguSomnini:

“Qalani, sele ngizokuvula ukuthula

kugelezele eJerusalema njengomlambo

nomnono wezizwe njengomlanjana ophuphumako,

nimunye benisingathwe edinini lalo,

nidunduzelwe emathangenalo.

13Njengomntwana odunduzelwa ngunina,

ngokunjalo ngizanidunduzela,

nizakudunduzelwa eJerusalema.

14Nizakubona nehliziywenu ithokoze

amathambenu ahlume njengotjani.”

Kuzakwaziwa bonyana isandla sakaSomnini

sineenceku zakhe

nokobana itukuthelwakhe ijamelene nezitha zakhe.

15Qalani, uSomnini uzakuza ngomlilo

neenkarana zakhe zepi njengesiwuruwuru,

ukuze abuyise itukuthelwakhe ngokuvutha

nokukhalima kwakhe ngamalangabi womlilo.

16Ngambala, uSomnini uzokukhupha isigwebo ngomlilo

nangesabulakhe phezu kwayo yoke inyama;

labo ababulewe nguSomnini bazakuba banengi.

17USomnini uthi:

“Labo abazicwengisa bebazihlambulule

kobana baye eemvandeni,

balandelana nophakathi kwabo,

bagome inyama yewotji,

iinyenyiso kanye nabongozo,

bazakubhubha ndawonye

18ngombana mina ngiyayazi

imisebenzabo nemizindlwabo.”

Isiphetho

“Isikhathi sesifikile sokubuthelela zoke izizwe ngokwamalimi wazo kobana zize, zibone iphazimulwami:

19Ngizakuthoma ngokubeka iphawu phakathi kwazo. Phakathi kwazo ngizakuthumela abasindileko baye ezizweni, okutjho eTharatjhitjhi, ePhuli neLudi, abantu abarhwatjhe imisubela, baye neTubhali kanye neJavana ukufikela eligwini emaphethelweni lapha bangakezwa khona idumo lami begodu bangakaboni iphazimulwami. Abasindilekwabo bazakumemezela iphazimulwami hlangana nezizwe.

20Kizo zoke izizwe bazakuletha boke abafowenu entabenami ecwengileko eJerusalema njengomnikelo kuSomnini ngeenjomani, iinkarana zepi neenhlalogugwa, iimeyila namakamela. Iye, bazabaletha njengama-Israyeli naletha iminikelo yeenthoro ethempelini lakaSomnini ngezitja ezihlambulukileko.” Watjho njalo-ke uSomnini.

21“Godu ngizakukhetha abanye babafowenu kobana babe baphristi namkha amaLevi.” Watjho njalo-ke uSomnini.

22“Njengezulu elitjha nephasi elitjha engizolidala lizakunzinza phambi kwami, ngokunjalo iinzukulwana zenu nebizo lenu lizakunzinza.” Watjho njalo-ke uSomnini.

23“Ngemva kwalapho, ukusuka emnyanyeni wenyanga etja ukuya kolandelako nokusuka eSabatheni ukuya kelinye, boke abantu bazakuza baguqe phambi kwami.” Watjho njalo-ke uSomnini.

24“Bazakuphuma, baqale iindumbu zabangihlubukileko: Iimpethu zabo azizukufa nomlilwabo asoze wacima. Bazakuba sinyenyiso kibo boke abantu.”