U-ISAYA 54 - IsiNdebele 2012 Translation

Iphazimulo yangomuso yeJerusalema

1“Hlokoma wena mfazi oyinyumba,

wena ongazange ubelethe umntwana!

Zwakalisa ukuhlokoma, iye, kwakwazela

wena ongazange ube nemirhelo,

ngombana banengi abantwana botjhiyiweko

kunebaloyo onendoda.”

Watjho njalo uSomnini.

2“Yengeza indawo yetende lakho,

wendlale amatjhila wekhaya lakho!

Ungazibambi!

Yelula iintambo zetende lakho,

uqinise iinkhonkhwani zalo!

3Uzakwenabela ngesewula nangetlhagwini:

Iinzukulwana zakho zizakuqotjha bezizwe,

zinzinze emizini eyatjhiywako.

4“Ungesabi ngombana angeze warhubutjhwa.

Ungapheli amandla ngombana angeze wahlaziseka.

Uzakukhohlwa ukurhubutjhwa kobutjha bakho,

ungasakhumbuli godu ihlazo lobuhlolokazi bakho.

5Mbala, okuthetheko ungumbumbi wakho,

ibizo lakhe nguSomnini uMninimandlawoke;

umhlengakho ungoCwengileko ka-Israyeli,

ubizwa bona nguZimu wephasi loke.

6Ngambala, uSomnini wakubuyisa

lokha unjengomfazi otjhiyiweko

nodabukileko emoyeni.

Umfazi owenda asesemutjha

angeze alahlwa.”

Watjho njalo uZimu.

7“Ngakhe ngakulahla kwesikhatjhana esincani,

kodwana ngesirhawu esikhulu ngiyakwamukela.

8Ngokusilingeka okukhukhulako

ngifulatheze ubuso bami kuwe kwesikhatjhana,

kodwana ngomusa ongapheliko,

nginesirhawu kuwe.”

Watjho njalo uSomnini umhlengakho.

9“Kimi lokhu kufana nemihleni kaNowa:

Njengombana ngafunga

bona amanzi kaNowa

akasazugubuzesa iphasi godu,

ngokunjalo ngiyafunga

bona angeze ngakusilingekekela

namkha ngikuthintithe.

10Nanyana iintaba zinganyamalala

nemibundu isikinyeke,

nokho ukwethembeka kwami

akusoze kwanyamalala kuwe

nesivumelwano sami sokuthula

angeze sasikinywa.”

Watjho njalo uSomnini onesirhawu kuwe.

11“Wena othotjisiweko,

owakhukhulwa ziinrhurhula, wangaduduzwa,

qala, sele ngizokubeka amatjakho

phezu kwedaka eliphazimako,

ngenze iinsekelo zakho ngamatje wesafaya

12iinhlangu ezisemibhotjhongwenakho ngamarubi,

amasangwakho ngamatje webherili

nomthangalakho woke ngamatje aligugu.”

13Woke amadodanakho azakufundiswa nguSomnini,

abantwabakho bazakuba nokuthula okukhulu.

14Uzakunzinziswa ngokulunga:

Uzakuba kude negandelelo,

iye, awuzukwesaba

begodu uzakuba kude nokwethusako,

iye, angeze kwakutjhidela.

15Nakube mbala uyasahlelwa,

kuzabe kungasikho ukwenza kwami.

Nanyana ngubani okusahlelako,

uzakuwa ngebanga lakho.

16“Qala, ngimi owadala umkhandisimbi,

yena ovuthela amalahle bona abhebhedlhe,

akhande isikhali kobana senze umsebenzakhe.

Godu ngimi odale umrhayili

kobana abhubhise.

17Nje-ke akunasikhali esibekelwe wena esizakuphumelela

begodu uzakubonisa loke ilimu elikumangalelako

bona alinaqiniso.

Lokhu kulilifa leenceku zakaSomnini,

nokuhlanjululwa kwazo okuvela kimi.”

Watjho njalo uSomnini.