AMARHUBO 94 - IsiNdebele 2012 Translation

UZimu umbuyiseleli wabalungileko

1Zimu obuyiselelako, Somnini,

iye, wena Zimu obuyiselelako,

khanya ngokudarhileko!

2Sikima wena mgwebi wephasi,

uphe abazitjhayako okubafaneleko!

3Somnini, kuzabe kube nini

iinkhohlakali ziziphakamisa,

iye, kuzabe kube nini zidlondlobala na?

4Zikhuluma ngamaganyana wokuzitjhaya

iye, zoke iingilamkhuba ziyazikhakhazisa.

5Ziqova abantu bakho, Somnini,

zigandelela ilifa lakho.

6Zibulala umhlolokazi nesikhonzi,

iye, zitjhabalalisa iintandani,

7zibuye zithi: “USomnini akaboni;

uZimu kaJakopo akanaki.”

8Yelelani nina bantu abalibeleko!

Nina ndlhayela ndina, nizakuhlakanipha nini?

9Owanameka indlebe, akezwa na?

Owahlomela ilihlo, akaboni na?

10Okhalimela bezizwe, akabethi na?

Mbala ofundisa umuntu ilwazi,

11unguSomnini owazi imicabango yomuntu

kobana ililize lakolize.

12Ubusisiwe omkhalimelako Somnini;

iye, loyo omfundisa ngomthethwakho

13ukuze umnikele ukuphumula emalangeni amambi,

ukufikela lapha isikhohlakali senjelwa khona umgodi.

14Ngambala, uSomnini angeze abatjhiye abantu bakhe,

angeze alilahla ilifa lakhe.

15Iye, ubulungiswa buzakubuyela kwabalungileko

nabaqotho ngehliziyo bazabulandela.

16Ngathi:

“Ngubani ozangijamela kabenza okumbi?

Ngubani ozangenyela eengilamkhubeni na?”

17Ngathana uSomnini akhange angisize,

ngabe sengibalwa nabaleleko.

18Nangidlumbana bonyana inyawo lami liyatjhelela,

ukwethembeka kwakho, Somnini, kwangisekela.

19Lokha imikhumbulwami nayihlubayezeka khulu,

induduzwakho ivuselela umphefumulwami.

20Wena angeze waba nehlanganyelo

nabagwebi abakhohlakeleko,

labo ababumba okumbi ngokujamelana nomthetho.

21Baluka ilisu ngepilo yolungileko,

balahle onganacala ngesigwebo sokufa.

22Kodwana uSomnini ube lirholo lami,

iye, uZimami olidwala lobuphephelo bami.

23USomnini uzababuyiselela ngesono sabo,

abathanyele ngobukhohlakali babo;

iye, uSomnini uZimethu uzabathanyela.