UHEZEKIYELI 32 - IsiNdebele 2012 Translation

Ingoma yesililo ngoFaro

1Ngomnyaka wetjhumi nambili lokha inyanga yetjhumi nambili inelanga linye, ilizwi lakaSomnini lafika kimi lathi:

2“Ndodana yomuntu, khalela ingoma yesililo ngoFaro ikosi yeGibhide, uthi kuye,

“ ‘Ube njengebhubezana hlangana nezizwe,

iye, unjengengwenya emanzini amanengi.

Uthumbuke ngaphakathi kwemilambakho,

udunge amanzi ngeenyawo zakho,

wasilaphaza imilanjana yamanzi amanengi.

3“ ‘Nje-ke, nakhu okutjhiwo nguSomnini uSomandla:

“ ‘Ngizokweneka inedami ngaphezu kwakho,

ngokusekelwa mkhambathi wezizwe ezinengi;

wona uzakurhurhulela ngaphandle

ngesirhurhulanede sami.

4Ngizokuphosela phasi,

ngikujikijele emmangweni,

bengenze neenyoni zomkayi

zihlale phezu kwakho,

ngisuthise zoke iimbandana zephasi ngawe.

5Ngizokweneka inyamakho eentabeni,

ngizalise imirhoba ngeemphethu zakho.

6Ngizokwenya inarha ngamanzi wesidumbu

avinyilika eengazini zakho bekube seentabeni;

imilanjana izakuzala okuncinca kuwe.

7“ ‘Lokha nangikucimako

ngizokugubuzesa amazulu,

ngenze iinkwekwezi zawo zibe mnyama;

ngisibekele ilanga ngamafu

nenyanga ingasadarhi.

8Yoke imikhanyo yezulwini

ngizoyenza mnyama ngehla kwakho,

ngibeke ubumnyama phezu kwenarhakho.’

“Kutjho uSomnini uSomandla.

9“ ‘Ngizokukhubekisa iinhliziyo zabanengi

lokha nangiletha ukubhujiswa kwakho

hlangana nezizwe, eenarheni ongazaziko.

10“ ‘Iye, ngizokwenza bonyana abantu abanengi bamangale ngawe. Iinhluthu zamakhosabo zizokubophana ngevalo ngenca yakho lokha nangisikaza isabulami phambi kwawo. Ngelanga lokuwa kwakho omunye nomunye uzakuthuthumelela ipilwakhe ngeenkhathi zoke.’

11Mbala, nakhu okutjhiwo nguSomnini uSomandla:

“ ‘Isabula yekosi yeBhabheli

iyeza phezu kwakho.

12Ngizokuwisa isiqubuthu sakho

ngeensabula zeengorho,

zoke okuzizizwe ezinelunya ngokudluleleko.

Zizakuphelisa ukuziphakamisa kweGibhide

nesiqubuthu sakhona soke sirhayilwe.

13Ngizokubhubhisa yoke ifuywayo

emagegana namanzi amanengi.

Angeze asadungwa linyawo lomuntu

namkha ziinqatha zefuyo.

14Nje-ke ngizakwenza amanzi weGibhide atsenge

begodu ngenze nemilanjana yakhona

igeleze njengamafutha.’

“Kutjho uSomnini uSomandla.

15“ ‘Lokha nangenza iGibhide ibe libhudu,

inarha nayemukwe koke okukiyo

nalokha ngiphobola boke abahlali bayo,

bazakwazi bonyana nginguSomnini.’ ”

16“Leso-ke sililo; amadodakazi wezizwe kufuze asikhalele; akasikhalele ngeGibhide nangesiqubuthu sayo soke. Iye, akasikhalele.” Kutjho uSomnini uSomandla.

17Ngomnyaka wetjhumi nambili lokha inyanga yokuthoma inamalanga alitjhumi nahlanu, ilizwi lakaSomnini lafika kimi lathi:

18“Ndodana yomuntu, rhahlawula ngesiqubuthu seGibhide. Wena namadodakazi wezizwe ezinamandla sehliseleni elizweni labangaphasi, kilabo abehlele emgodini wokufa.

19“Yewuthi kiyo iGibhide,

‘Wena udlula bani ngobuhle na?

Yehlela phasi, ulaliswa nabarhedeni.’

20“Abantu beGibhide bazakuwela phakathi kwababulewe ngesabula; iye, iGibhide yanikelwa esabuleni. Dosani iGibhide nesiqubuthu sayo soke!

21Ngaphakathi kwendawo yabafileko amakhosana anesibindi azakukhuluma ngoFaro nabasizi bakhe athi: Nabo behlile, ngalokho abarhedeni ababulewe ngesabula balele.

22“I-Asiriya ilapho nomkhambathayo woke, imikghadi yeendumbu zawo izombeleze ikosi yakhona, iye, boke ababuleweko bebawa ngesabula.

23Imikghadi yeendumbu zama-Asiriya emgodini wokufa ibekelwe emuva; umkhambathi we-Asiriya uzombeleze umkghadi wesidumbu sekosi. Boke labo bebabulewe bebawa ngesabula, okutjho labo okwathi nabasaphilako baletha ivalo elizweni labaphilako.

24“I-Elamu nayo ilapho nesiqubuthu sayo soke esizombeleze umkghadi wesidumbu sekosi, okutjho boke ababuleweko bebawa behlela phasi babarhedeni elizweni labangaphasi. Iye, labo okwathi nabasaphilako, baletha ivalo elizweni labaphilako; nje-ke bathwele ihlazo kanye nalabo ebehlele emgodini wokufa.

25I-Elamu bayilungisele umkghadi weendumbu kanye nesiqubuthu sayo soke hlangana nababuleweko. Mazombe nekosi kunemikghadi yeendumbu zama-Elamu. Boke njalo babulawa ngesabula babarhedeni. Njengombana nabasaphilako baletha ivalo elizweni labaphilako, bathwele ihlazo labo kanye nalabo ebehlele emgodini wokufa. Iye, ikosi nayo ibekwe hlangana nababuleweko.

26“IMetjheki-Tubhali ikhona lapho nesiqubuthu sayo soke. Mazombe nekosi kunemikghadi yeendumbu zamaMetjheki-Tubhali. Boke njalo babulawa ngesabula babarhedeni ngombana nabasaphilako baletha ivalo elizweni labaphilako.

27Labo phakathi kwabarhedeni abawileko, abakalali neengorho ezehlela endaweni yabafileko neenkhali zazo zepi: Abantu basamelisa iingorho iinsabula zazo, kuthi iinhlangu zibe phezu kweendumbu zazo. Kuba njalo nanyana zabanga ivalo elizweni labaphilako.

28“Nje-ke, wena Faro uzokwephulwa bese ulaliswa hlangana nabarhedeni, iye, labo ababulewe ngesabula.

29“I-Edomu nayo izakuba lapho, okutjho amakhosayo namakhosanayo woke okuzakuthi nangaphezu kobungorho bawo alaliswe nababulewe ngesabula. Iye, wona azakulala nabarhedeni nalabo abehlele emgodini wokufa.

30“Iinduna zetlhagwini nazo zizakuba lapho. Iye, zoke kanye nawo woke amaTsidoni okungilabo abazakwehlela phasi nababuleweko ngehlazo nangaphezu kwevalo abaliletha ngebanga lamandlabo. Nje-ke bazakulala babarhedeni kanye nalabo ababulewe ngesabula, bathwale ihlazo labo kanye nalabo abehlele emgodini wokufa.

31“Labo-ke uFaro uzababona abe atjhiriyeke mayelana nesiqubuthu sakhe soke. Iye, yena namajonakhe woke bazakubulawa ngesabula.” Kutjho uSomnini uSomandla.

32“Nanyana uFaro ngimvumele kobana alethe ivalo elizweni labaphilako, yena nesiqubuthu sakhe bazakulaliswa hlangana nabarhedeni kanye nalabo ababulewe ngesabula.” Kutjho uSomnini uSomandla.