IZAGA 30 - IsiNdebele 2012 Translation

Isitjho saka-Aguri

1Amezwi ka-Aguri, umsa kaJakhe

Umlayezwakhe

Isitjho sendoda le sithi:

“Ngiphele amandla, Zimu!

Iye, ngiphele amandla!

Ngiphelelwe!

2Mbala, ngisiyila ukudlula boke;

anginakho ukuzwisisa komuntu.

3Azange ngifunde ukuhlakanipha,

azange ngibe nelwazi loCwengileko.

4Ngubani owakhe wenyukela ezulwini godu wabuya?

Ngubani owabuthelela ummoya etendeni yezandla zakhe?

Ngubani ogubuzese amanzi ngengubakhe?

Ngubani odzimelelise amagumbi wephasi?

Ngubani ibizo lakhe nebizo lendodanakhe?

Yewungitjele nakube uyazi!”

Ipendulo ku-Aguri

5Elinye nelinye ilizwi lakaZimu licwebile,

usihlangu salabo ababalekela kuye.

6Ungangezeleli emazwinakhe,

nakungasinjalo uzakusola

akukhombise bonyana umleyimanga.

Umthandazo womuntu obalekela kuZimu

7Kunezinto ezimbili engizikhombela kuwe, Somnini;

ungangigodleli zona nangisaphilako:

8Dedisa ikohliso namanga kimi;

ungangiphi ubuchaka namkha ubunjinga,

kodwana ngipha kwaphela okwaneleko.

9Nangingasutha khulu ngizakukhohlwa

ngithi: “Konje phana ngubani uSomnini loyo?”

Nangingaswela ngizakweba,

ngokwenza njalo, ngihlambalaze ibizo lakaZimami.

Ezinye izaga

10Ungakhulumi kumbi ngenceku kumniniyo,

nakungasinjalo izakuthuka, ube semlandwini.

11Kunalabo abathuka aboyise,

bangabusisi abonina.

12Kunalabo abazibona bamsulwa,

kodwana babe bangakahlambuluki ekungcoleni kwabo.

13Kunalabo abazitjhayako,

bathwala iimpumulo.

14Kunalabo abanamazinyo aziinsabula

nemihlathabo imimikhwa,

kobana barhiribidele abachakileko ephasini

nabadududu hlangana nabantu.

15Ikhalani linamadodakazi amabili,

alila athi: “Sipha! Sipha!”

Kunezinto ezintathu ezinganelisekiko,

iye, ezine ezingakghoni ukuthi: “Sesanele!”

16Zona ngilezi:

indawo yabafileko,

isibeletho esiyinyumba,

inarha enganelisekiko ngamanzi

nomlilo ongatjhoko uthi: “Nganele!”

17Amehlo anyefula uyise,

adelela ukulalela unina,

azakugobolwa magubulu emmangweni,

adliwe madlanga.

18Kunezinto ezintathu ezisimanga kimi,

iye, ezine engingazizwisisiko:

19indlela yedlanga esibhakabhakeni,

indlela yenyoka emadwaleni,

indlela yomkhumbi phakathi kwelwandle

nendlela yesokana entombini.

20Nasi indlela yesihlobongi:

Siyagoma bese sizisula umlomo,

sithi: “Akunanto embi engiyenzileko.”

21Ngaphasi kwezinto ezintathu inarha iyahlengezela,

iye, ezine eziyenza ingabambeleli:

22inceku nayiba yikosi,

iindlhadlha nazisuthako,

23umfazi osisaliwakazi emendweni

nencekukazi esele ithathele umniniyo indawo.

24Kunezinto ephasinapha ezincani,

kodwana zihlakaniphe ngokweqileko:

25Abonontsitsinyani balibutho elinganamandla,

kodwana ehlobo bazilungiselela ukudla kwabo;

26iimbila zilibutho elinganamandla,

kodwana zakha iinkhundlana zazo emadwaleni;

27isikhonyani asinakosi,

kodwana sizihlela soke ngeenqhema;

28isibhadwa ungasibamba ngesandla,

kodwana sitholakala nesigodlweni.

29Kunezinto ezintathu ezikhamba ngejamo,

iye, ezine ezinamaqa anejamo:

30ibhubezi eliyikosi yeenyamazana elingahlehliswa lilitho;

31mkukurumbu okhambela phezulu,

ipongo

nekosi ongekhe wajamelana nayo.

32Nakube wenze ubudlhadlha, waziphakamisa,

namkha nawutlame ubumbi,

beka isandla emlonyenakho!

33Njengombana ukuphehla amakghamatha kuveza umlaza

nokutlhorholoja ipumulo kuveza iingazi,

kunjalo nokutlhorholoja ilaka kuveza ukucabana.