UHEZEKIYELI 28 - IsiNdebele 2012 Translation

Isiphorofido ngekosi yeTirosi

1Ilizwi lakaSomnini lafika kimi lathi:

2“Ndodana yomuntu, yewukhulume embusini weTirosi bonyana nakhu okutjhiwo nguSomnini uSomandla,

“ ‘Nanyana umumuntu nje

ungasiso isidalwa sezulu,

ulinganise umkhumbulwakho nowesidalwa sezulu.

Umkhumbulwakho uyazikhakhazisa,

uzitjela uthi:

Ngisidalwa sezulu,

ngihlezi esihlalweni sobukhosi babozinyana,

ehliziyweni yamalwandle.

3Wena udlumbana bona uhlakaniphe

ukudlula uDanyela!

Koke okufihlakeleko akusinzima kuwe!

4Ngokuhlakanipha nelemuko lakho

uzizuzele ubunjinga bakho,

wazibuthelelela igolide nesiliva

endlinakho yamagugu!

5Ngokuhlakanipha kwakho okudluleleko,

iye, ngekghono lakho lokurhweba

wengezelele umnothwakho!

Mbala, umkhumbulwakho uyazikhakhazisa

ngebanga lomnothwakho.’

6“Ngalokho nakhu okutjhiwo nguSomnini uSomandla:

“ ‘Njengombana ulinganise umkhumbulwakho

nowesidalwa sezulu

7ngalokho ngizokulethela imiqhamuka,

kobana ijamelane nawe;

iye, izizwe ezinelunya ngokudluleleko.

Zona zizokurhwatjha isabula iphambane nobuhle

obukuzuzele ukuhlakanipha,

zisilaphaze iphazimulwakho.

8Zizokwehlisela endaweni yabafileko,

ufe ukufa kolinyaziweko

ehliziyweni yamalwandle.

9Uzalokhu uphikelela bona usidalwa sezulu,

lokha nawuqalene nababulali na?

Kuzakukhanya bona umumuntu

awusiso isidalwa sezulu,

lokha nawusezandleni zabakulimazako!

10Ezandleni zemiqhamuka

uzakufa ukufa kwabarhedeni.

Mbala, ngikhulumile mina.’

Kutjho uSomnini uSomandla.”

11Ilizwi lakaSomnini lafika kimi lathi:

12“Ndodana yomuntu, khalela ingoma yesililo ngekosi yeTirosi, ngamezwi atjhwiwe nguSomnini uSomandla nasithi,

“ ‘Wena bewusibonelo sokupheleliswa,

uzele ukuhlakanipha uphelele ngobuhle.

13Bewuse-Edeni, isivande sakaZimu,

uhlobe ngelinye nelinye ilitje eliligugu:

irubi, ithopazi nedayimani,

ibherili, i-oniksi nejasipere,

isafaya, isimaragidu ne-emeraldi.

Ukuhloba kwakho bekungekwegolide,

okuzizinto ezalungiswa mhlana udalwako.

14Bewulikerubhi elivikelako

elineempiko ezivulekileko.

Ngakubeka entabeni ekhethekileko yabozinyana.

Bewuhlangana namatje womlilo,

ukhambakhamba lapho.

15Eendleleni zakho bewungasolisi,

kusukela ilanga owadalwa ngalo,

bekwaba kulapha ubumbi

bufunyaneka khona kuwe.

16Ngebanga lerhwebo lakho elandileko,

wagcwaliswa ngenturhu bewona.

Nje-ke, ngakusilaphaza,

ngakususa entabeni yabozinyana,

iye, hlangana namatje womlilo;

ngakubhubhisa wena kerubhi elivikelako.

17Umkhumbulwakho wazikhakhazisa

ngobuhle bakho.

Wonakalisa ubuhlakani bakho

ngenca yephazimulwakho.

Ngalokho ngakuphosela phasi,

ngakuneka phambi kwamakhosi

kobana akhe akubone.

18Ngobunengi bamacalakho,

ngokungathembeki ekurhwebeni kwakho

usilaphaze iindawo zakho ezikhethekileko.

Nje-ke ngaqubula umlilo ngaphakathi kwakho,

wakuqothule.

Ngakuphendula umlotha ehlabathini

phambi kwabo boke ebegade bakuqalile.

19Boke abakwaziko ezizweni

bakakamala ngawe;

sewuphenduke isethuso

begodu angekhe usabakhona.’ ”

Isiphorofido ngeTsidoni

20Ilizwi lakaSomnini lafika kimi lathi:

21“Ndodana yomuntu, qalisa ubuso bakho ngeTsidoni bese uphorofida ngokujamelana nalo,

22uthi, ‘Nakhu okutjhiwo nguSomnini uSomandla:

“ ‘Qala, ngijamelene nawe Tsidoni;

ngizozidumisa phakathi kwakho.’

Iye, bazakwazi bonyana nginguSomnini,

lokha nangehlisela iingwebo phakathi kwalo

nalokha nangibonakalisa ukucwenga kwami kilo.

23Ngizokuthumela isifo kilo,

iingazi zigeleze eendledlaneni zalo.

Abalinyaziweko bazakuwa ngaphakathi kwalo

ngebanga lesabula ejamelene nalo nca zoke.

Nje-ke bazakwazi bonyana nginguSomnini.

24“Indlu ka-Israyeli angeze isafunyana umunga ozayihlaba neliva lokuyilimaza kwabayizombelezileko, iye, labo abayidelelako. Bazakwazi bonyana nginguSomnini uSomandla.”

25Nakhu okutjhiwo nguSomnini uSomandla: “Lokha nangibuthelela bendlu ka-Israyeli hlangana nabantu abasabalele kibo nalokha nangibonakalisa ukucwenga kwami kibo phambi kwezizwe, bazakuhlala enarhenabo engayinikela incekwami uJakopo.

26Bazakuhlala kiyo bavikelekile, bakhe izindlu bebatjale neemvande zesidiribe. Iye, bazakuhlala bavikelekile lokha nangehlisela iingwebo phakathi kwabo boke ababadelelako nca zoke. Nje-ke bazakwazi bonyana nginguSomnini uZimu ka-Israyeli.”