UJOROMIYA 18 - IsiNdebele 2012 Translation

Ekumbeni yombumbi

1Nanti ilizwi elafika kuJoromiya livela kuSomnini:

2“Sikima, wehlele ekumbeni yombumbi, ngizafese ngikunikele umlayezwami.”

3Nje-ke ngehlela ekumbeni yombumbi, ngamfumana asebenza ebubumbelweni.

4Kodwana lokho agade akubumba ngomdaka konakalela ezandleni zakhe, nje-ke wabuya wabumba okhunye njengombana bekukuhle kuye ukukwenza lokho.

5Yeke ilizwi lakaSomnini lafika kimi lathi:

6“Wena kumba ka-Israyeli, angeze ngenza kini njengombana kwenza umbumbi lo na?” Godu uSomnini wathi: “Njengomdaka esandleni sombumbi, ninjalo-ke nani esandleni sami, nina kumba ka-Israyeli.

7Ngesinye isikhathi ngingamemezela ngesizwe namkha umbuso kobana usitjhulwe, uwiswe bewutjhabalaliswe.

8Kodwana nakube isizwe engimemezele ngaso siyaphenduka ebukhohlakalini baso, khona-ke ngizazisola ngobumbi ebengibuhlosile.

9Ngesinye isikhathi ngingamemezela ngesizwe namkha umbuso kobana wakhiwe bewuhlonywe.

10Kodwana nakube isizweso senza ubumbi phambi kwami bese singalaleli ilizwi lami, khona-ke ngizazisola ngobuhle ebengithe ngizasenzela bona.

11“Nje-ke, wena Joromiya, tjela abantu bakwaJuda nabahlali beJerusalema bonyana uSomnini uthi, ‘Qalani, sele ngizonidalela ihlekelele, iye, ngineqhinga ngani. Ngalokho phendukani eendleleni zenu ezimbi, omunye nomunye wenu, nilungise iindlela zenu kanye nezenzo zenu.’

12Kodwana abantwabo bazakuphudlha bathi, ‘Akusizi litho! Sizakukhamba ngamahlelwethu, omunye nomunye wethu uzakulandela lokho wena okubiza bona bulikhuni behliziywakhe ekhohlakeleko.’ ”

13Ngalokho-ke nakhu okutjhiwo nguSomnini:

“Buzani hlangana nezizwe:

Ngubani owakhe wezwa okufana nalokhu na?

Kunento erara khulu

eyenziwe litlawu u-Israyeli.

14Ingabe iliqhwa leLibhanoni

liyasuka erharheni loSabekako

namkha amanzi amakhaza nagelezako

womthala weenkwekwezi zezulu atjhe na?

15Kodwana nakubabantu bami bona, bangikhohliwe,

batjhisela izinto ezinganabubhadekelo itjhwalo,

okuzizinto ezibenza bawe eendleleni zabo,

iye, eendleleni zekadeni.

Zibenza bakhambe ngeendlela eziqamulako,

emizileni engakakhiwa.

16Ngalokho inarhabo iba libhudu,

into yokurarekelwa ngesikhathi soke.

Boke abadlula lapho bazakukhuza ngayo,

bathintithe iinhloko ngokutlhuwa.

17Njengommoya wepumalanga,

ngizabahlakaza phambi kwezitha zabo,

ngizabakhombisa umhlanami,

bangaboni ubuso bami

ngelanga lehlekelele.”

UJoromiya wenzelwa isigungu

18Somnini, abantu bathi: “Asenzeni amaqhinga ngoJoromiya lo ngombana ukufundisa kwabaphristi umthetho angeze kwalahleka nezeluleko zabahlakaniphileko angeze zaphela ngitjho neemphorofido zabaphorofidi. Yeke, asimthelekeleni ngamezwi, singalaleli litho alitjhoko.”

19Yewungilalele Somnini,

yizwa bona bathini abaphikisani bami!

20Okuhle kumele kubuyiselwe ngobumbi na?

Kodwana bangembele umgodi wesifu.

Khumbula bonyana ngajama phambi kwakho

ngabakhulumela kuhle,

kobana ususe itukuthelwakho kibo.

21Yeke, nikelela abantwababo ngendlala,

ubafuthele emandleni wesabula.

Abafazi babo ababe ziinyumba,

babe bahlolokazi

ngombana amadodabo abulewe

namasokana wakhona arhayilwe

ngesabula epini.

22Akuzwakale umkhosi eenkumbeni zabo

lokha nawubanikelela msinyana ngemigulukudu

ngombana bangembele umgodi

kobana bangibambe,

bangibekela nezifu eenyaweni zami.

23Kodwana wena Somnini,

wazi woke amaqhingabo wokungibulala.

Ungacoleli icala labo

namkha usule izono zabo phambi kwakho.

Abaketulwe phambi kwakho,

usebenze ngabo ngesikhathi setukuthelwakho.