AMARHUBO 73 - IsiNdebele 2012 Translation

Ukulahleka nokubuya endleleni yakaZimu

1Irhubo laka-Asafa.

Ngambala uZimu umlungele u-Israyeli,

iye, labo abanehliziyo ehlanzekileko.

2Kodwana nakungimi yena,

iinyawo zami zapheze zatjhelela,

kwasala kancani bona ziphambuke

3ngombana ngakhanukela abazikhukhumezako,

nangibona itjhudu labakhohlakeleko.

4Bona abananhlungu bekube sekufeni,

izisu zabo zihlala zitatamele.

5Abatjhabatjheki njengabantukazana,

abahlunguphazwa njengabanye.

6Yeke ukuzigqaja kungunongoro entanyenabo,

bambethe ubudlova njengengubo.

7Amehlwabo abimbekile ngokunona,

imicabango yehliziywabo iyaphuphuma.

8Bayaphoqa bakhulume ngokukhohlakala,

ngokuziphakamisa bagandelela abanye.

9Imilomabo inyefula izulu

namalimabo ahlambalaza iphasi.

10Iwoma liyabalandela,

lirhuqa amezwabo inga mamanzi,

11lokha nabathi: “UZimu wazi njani na?

OngoPhezulu unelwazi na?”

12Qalani, zinjalo-ke iinkhohlakali:

Zihlala zikhomba ngophakathi,

zikhule ngomnono.

13Kube lilize kobana ngihlambulule ihliziywami,

ngahlamba izandla zami ngimsulwa

14ngombana ngakhathazwa ilanga loke,

njalo ekuseni ngahlunguphazwa.

15Nakube bengithe, “Ngizakuhlala ngikhuluma njalo”,

bengizokuba mkhohlisi esigungwini sabantwabakho.

16Kodwana ngathi nangilinga ukuzwisisa lokhu,

kwabonakala kuyinto ebudisi kimi,

17bekwaba kulapha ngingena khona

ngethempelini lakho Zimu,

lokha nangilemuka isiphetho sabo:

18Mbala ubeka iinkhohlakali eendaweni ezibutjhelelezi,

uzenze bona ziwele ebhudwini.

19Maye, zibhujiswa ngesikhatjhana!

Zitjhabalaliswa nya ngevalo!

20Zinjengebhudango elimbi

ekuphaphameni komuntu:

Somandla, lokha nawuvukako

uzithalalisa njengombono webhudangwelo.

21Lokha ihliziywami imunyu

nemizwami idungekile,

22mina ngaba siyila nongalemukiko;

iye, ngaba njengesibandana kuwe.

23Nokho mina bengiseze nginawe;

ubambe isandla sami sokudla.

24Ungirhola ngeseluleko sakho,

ungamukele ebukhoneni bakho.

25Ngubani enginaye ezulwini ngaphandle kwakho na?

Ngaphandle kwakho ephasini akunanto engiyikhanukelako.

26Umzimbami nehliziywami zingaphelelwa,

kodwana uZimu ulidwala lehliziywami

nesabelo sami ngokungapheliko.

27Mbala, abadeda kuwe bazakubhubha;

uphelisa boke abangakathembeki kuwe.

28Kodwana nakungimi,

kuhle ukuba seduze noZimu;

ngenze uSomnini uSomandla isiphephelo sami

ukuze ngikhulume ngakho koke akwenzileko.