UJOROMIYA 23 - IsiNdebele 2012 Translation

1“Bazazizwa abelusi abatjhabalalisa bebahlakaze izimvu zamadlelwami!” Kutjho uSomnini.

2Ngalokho nakhu okutjhiwo nguSomnini, uZimu wakwa-Israyeli ngabelusi abelusa abantu bami: “Nina enihlakaze izimvu zami benaziqotjha, nangazitjheja, qalani, sele ngizonihlunguphaza mayelana nobumbi enibenzileko.” Kutjho uSomnini.

3“Mina ngokwami ngizakubuthelela imisalela yomhlambami kizo zoke iinarha lapha ngayiqotjhela khona bengiyibuyisele emadlelwenazo. Lapho-ke izakubeletha beyande.

4Ngizakubeka abelusi phezu komhlambami baweluse, angeze bewusesaba namkha wesatjiswe, godu angeze usalahleka.” Kutjho uSomnini.

Indlalifa kaDavida yangokomthetho

5USomnini uthi: “Qalani, isikhathi siyeza

lapha ngizakuvusela khona

uDavida ingala yangokomthetho,

izakubusa njengekosi

iphathe ngokuhlakanipha

beyenze okulungileko nokufaneleko enarheni.

6Emihlenakhe uJuda uzakusindiswa

bese u-Israyeli aphile ngokuphepha.

Nanti ibizo azakubizwa ngalo:

USomnini ukulunga kithi.”

7USomnini uthi: “Nje-ke, qalani isikhathi siyeza lapha abantu bangeze basathi, ‘Ngifunga uSomnini owakhupha ama-Israyeli eGibhide’,

8kodwana bazakuthi, ‘Ngifunga uSomnini owakhupha bewabuyisa iinzukulwana zama-Israyeli enarheni yangetlhagwini.’ Mina Somnini ngizababuyisa kizo zoke iinarha engabaqotjhela kizo. Nje-ke bazakuhlala endaweni ekungeyabo.”

Abaphorofidi abakhuluma amala

9Mayelana nabaphorofidi uJoromiya wathi:

Ihliziywami yephukile ngaphakathi kwami,

amathambami woke ayaqhaqhazela.

Ngifana nomuntu odakiweko,

iye, umuntu ohlulwa liwayini,

ngebanga lakaSomnini

kanye namezwakhe acwengileko.

10Inarha izele ngeenhlobongi,

ngebanga lesithuko iyalila

namadlelo erhalawumbeni atjhwabile.

Abaphorofidi bajabajabela okumbi,

basebenzisa amandlabo ngokungakalungi.

11“Abaphorofidi nabaphristi basilaphele,

ngifumana ubukhohlakali babo

ngitjho nangethempelini lami.”

Kutjho uSomnini.

12“Ngalokho indlelabo

izakufana neendawo ezitjhelelako ebumnyameni,

bazakusunduzwa bawele kizo.

Ngizabehlisela ihlekelele

ngomnyaka abazakuhlunguphazwa ngawo.”

Kutjho uSomnini.

13“Phakathi kwabaphorofidi beSamariya

ngabona nasi into enyenyisako:

Baphorofida ngoBhali

bese badurhisa abantu bami, u-Israyeli.

14Phakathi kwabaphorofidi beJerusalema

khona ngabona nasi into ekghabhudlhako:

Bayahlobonga bebaphile ngamala.

Baqinisa izandla zabenzi bobumbi,

ukuze kungabikho ophendukako

ebukhohlakalini bakhe.

Boke sebafana neSodoma kimi,

iye, abantu beJerusalema sebafana neGomora.”

15Ngalokho-ke, nakhu okutjhiwo nguSomnini uMninimandlawoke mayelana nabaphorofidi:

“Ngizabadlisa ukugoma okumunyu

basele amanzi anobuthi

ngombana ukusukela ebaphorofidini beJerusalema

ummoya wokusilaphala warhatjheka inarha yoke.”

16Nakhu okutjhiwo nguSomnini ebantwini bakwaJuda:

“Ningalaleli lokho abaphorofidi abakuphorofida kini;

bona bayanikhohlisa.”

Iye, bakhuluma imiyalezo yemikhumbulwabo

ingasi evela emlonyeni kaSomnini.

17Kilabo abanyaza ilizwi lakaSomnini

banande bathi: “Nizakuba nokuthula.”

Bese kabalandela ukukhunyalala

kweenhliziyo zabo

bathi: “Akunanto embi ezanehlela.”

18Kodwana ngubani phakathi kwabo

owakhe wajama ebandla lakaSomnini

kobana ezwe abe alemuke amezwakhe na?

Iye, ngubani owakhe wayelela

bewalemuka ilizwi lakhe na?

19Qalani, naso isiwuruwuru sakaSomnini!

Sikurhwanta kwetukuthelo kaSomnini,

iye, isivunguvungu esikhwitjhizelako!

Sizakuvunguzela phezu kweenhloko zabakhohlakeleko.

20Itukuthelo kaSomnini angeze yahlehla,

iye, angeze yahlehla angakafezi iinhloso zehliziywakhe.

Emalangeni ezako nizakuzwisisa kuhle.

21USomnini uthi:

“Azange ngibathume abaphorofidaba,

khonapho bona bagijima ngomlayezwabo;

azange ngikhulume nabo,

khonapho bona sebayaziphorofidela nje.

22Kodwana nakube bebajame ebandla lami,

bebazokumemezela amezwami ebantwini bami

bebababuyisele eendleleni zabo ezimbi

nezenzweni zabo ezimbi.

23“NginguZimu eduzapha kwaphela na?” Kutjho uSomnini. “AngisinguZimu nakude na?

24Ukhona ongabhaca eendaweni ezisithekileko kobana ngingamboni na? Angisikhona koke ezulwini nephasini na?” Kutjho uSomnini.

25“Ngizwile kobana abaphorofidi abaphorofida amala ebizweni lami bonyana bathini. Bathi, ‘Ngibe nebhudango! Iye, ngibhudangile uyazi!’

26Kuzabe bekube kunini kobana phakathi kwabaphorofidi kube nalabo abaphorofida amala, iye, abaphorofidi abanekohliso eenhliziyweni zabo na?

27Bacabanga bonyana amabhudango abatjelana wona azakwenza abantu bami bakhohlwe ibizo lami njengombana kwenza aboyise ngebanga laboBhali na?

28Umphorofidi onebhudango akalitjho ibhudangwelo nonelizwi elibuya kimi akalikhulume ngokwethembeka. Amakhoba ahlangana njani namabele na?” Kutjho uSomnini.

29“Ilizwi lami alifani nomlilo na? Alifani nenondo ephadlhula idwala libe ziinququ na?” Kutjho uSomnini.

30“Ngalokho ngijamelene nabaphorofidi abebelana amezwami bese bathi avela kimi.” Kutjho uSomnini.

31Godu uSomnini uthi: “Ngijamelene nabaphorofidi abasebenzisa amalimabo bese bathi, ‘Kutjho uSomnini’.

32Ngambala ngijamelene nalabo abaphorofida ngamabhudango wamala.” Kutjho uSomnini. “Badurhisa abantu bami ngokubatjela amala nokuzikhukhumeza kwabo, khisibe azange ngibathume namkha ngibayale. Ekugcineni ababasizi ngalitho abantwaba.” Kutjho uSomnini.

33“Lokha abantwaba, abaphorofidi namkha abaphristi nabakubuza bathi, ‘Uthini umlayezo kaSomnini na?’ Uzakuphendula uthi, ‘USomnini uthi: Nibuzelani umlayezo khisibe nginilahlile na?’

34Nakube kunomphorofidi, umphristi namkha omunye othi, ‘Naku umlayezo kaSomnini’, ngizakuhlunguphaza umuntu loyo nomndenakhe.

35Nakhu okufanele kutjhiwo ngomunye nomunye wenu ebanganini bakhe namkha eenhlotjeni zakhe, ‘Ithini ipendulo kaSomnini?’ namkha, ‘USomnini utheni?’

36Nakumamezwi athi, ‘umlayezo kaSomnini’ ningabe nisawakhuluma godu. Umlayezo kaSomnini uzakuba ngewomuntu welizwi lakhe ngombana nina nitjhugulule amezwi kaZimu ophilako, uSomnini uMninimandlawoke, uZimethu.

37Nakhu enifanele nikutjho kumphorofidi, weqiniso, ‘USomnini uphendule wathini kuwe?’, namkha nithi, ‘USomnini ukhulume wathini?’ ”

38Mbala, nakhu okutjhiwo nguSomnini: “Nakube nihlalele ukukhuluma ngomlayezo kaSomnini, iye, nanihlalele ukukhuluma amezwi athi ‘umlayezo kaSomnini’ phezu kobana bengithumele umuntu bona anitjele ningabe nisathi ‘umlayezo kaSomnini’,

39ngalokho-ke, ngizanisusa ebukhoneni bami, nginilahle nina nedorobho enginiphe lona naboyihlo.

40Ngizanehlisela ukurhubutjhwa okungapheliko, iye, ukuhlaziseka kwamlibe nekungeze kwakhohlweka.”